ന്യൂഡൽഹി: നിയമസഭാ തിരഞ്ഞെടുപ്പ് സീറ്റ് ചർച്ചകളിൽ കെ. സുധാകരന് കടുത്ത അതൃപ്തി. ഡൽഹിയിലെ ഇന്നത്തെ സ്ഥാനാർഥി നിർണയ ചർച്ചകൾക്ക് നിൽക്കാതെ സുധാകരൻ കേരളത്തിലേക്ക് മടങ്ങി.കണ്ണൂർ നിയമസഭാ മണ്ഡലത്തിൽ മത്സരിക്കാനുള്ള താത്പര്യം കെ. സുധാകരൻ നേരത്തെ പാർട്ടിയെ അറിയിച്ചിരുന്നു. എന്നാൽ എംപിമാർ മത്സരിക്കുന്നതിൽ സംസ്ഥാനത്തെ നേതാക്കൾ ശക്തമായി എതിർത്തിരുന്നു.
ഹൈക്കമാൻഡും ഇതുവരെയും ഇതിന് പച്ചക്കൊടി കാട്ടിയിട്ടില്ല. സുധാകരനെ അനുനയിപ്പിക്കാൻ ഡൽഹിയിൽ പലഘട്ടങ്ങളിലായി ചർച്ച നടന്നു വരികയായിരുന്നു. ഇതിനിടെയാണ് സുധാകരൻ ഡൽഹിയിൽ നിന്ന് നാട്ടിലേക്ക് മടങ്ങിയത്.
കെപിസിസി പ്രസിഡന്റ് സണ്ണി ജോസഫ്, പ്രതിപക്ഷ നേതാവ് വി.ഡി. സതീശൻ, രമേശ് ചെന്നിത്തല അടക്കമുള്ളവർ ഡൽഹിയിൽ ഉണ്ട്. എംപിമാരുമായി നേതാക്കൾ ആശയവിനിമയം നടത്തുമെന്ന് റിപ്പോർട്ടുകളും ഉണ്ടായിരുന്നു. സണ്ണി ജോസഫ് മത്സര സന്നദ്ധത അറിയിച്ച എം.പിമാരായ കെ. സുധാകരൻ, അടൂർ പ്രകാശ് എന്നിവരുമായി വ്യാഴാഴ്ച കൂടിക്കാഴ്ച നടത്തിയിരുന്നു. സീറ്റിന്റെ കാര്യത്തിൽ ഉറപ്പ് ലഭിക്കാത്ത സാഹചര്യത്തിലാണ് അതൃപ്തി വ്യക്തമാക്കി തുടർചർച്ചകൾക്ക് നിൽക്കാതെ സുധാകരൻ നാട്ടിലേക്ക് മടങ്ങിയത്. പ്രതിഷേധിച്ചാണോ മടങ്ങുന്നതെന്ന ചോദ്യത്തിന് കെ. സുധാകരൻ പ്രതികരിക്കാൻ തയ്യാറായില്ല.
കെ. സുധാകരൻ അടക്കം മൂന്ന് എംപിമാർ കോൺഗ്രസ് നേതൃത്വത്തിന് മുമ്പിൽ മത്സരിക്കാനായി കടുത്ത സമ്മർദ്ദം ചെലുത്തുന്നുവെന്നാണ് സൂചന.
ഡൽഹിയിൽ നടന്ന സ്ക്രീനിംഗ് കമ്മിറ്റി യോഗത്തിൽ നിന്ന് സുധാകരൻ വിട്ടുനിന്നത് കോൺഗ്രസിനുള്ളിൽ വലിയ ചർച്ചകൾക്ക് വഴിവെച്ചിട്ടുണ്ട്. ഇതിന്റെ പ്രധാന കാരണങ്ങൾ ഇവയാണ്
സുധാകരന്റെ നിലപാടും തർക്കവും
കണ്ണൂർ സീറ്റിലെ അവകാശവാദം: കണ്ണൂർ നിയമസഭാ മണ്ഡലത്തിൽ താൻ 110 ശതമാനം മത്സരിക്കുമെന്ന് സുധാകരൻ പരസ്യമായി പ്രഖ്യാപിച്ചിരുന്നു. എന്നാൽ നിലവിലെ എംപിമാർ നിയമസഭയിലേക്ക് മത്സരിക്കേണ്ടതില്ലെന്ന ഹൈക്കമാൻഡ് നയം സുധാകരന് തിരിച്ചടിയായി.
സംസ്ഥാന നേതൃത്വത്തിന്റെ എതിർപ്പ്: കെപിസിസി പ്രസിഡന്റ് സണ്ണി ജോസഫ്, പ്രതിപക്ഷ നേതാവ് വി.ഡി. സതീശൻ തുടങ്ങിയവർ എംപിമാർ മത്സരിക്കുന്നതിനോട് വിയോജിപ്പ് പ്രകടിപ്പിച്ചിരുന്നു. സ്ഥാനാർഥി പ്രഖ്യാപനം വരും മുൻപ് തന്നെ സുധാകരൻ സ്വയം സ്ഥാനാർഥിത്വം പ്രഖ്യാപിച്ചതിനെ സണ്ണി ജോസഫ് പരസ്യമായി വിമർശിക്കുകയും അച്ചടക്ക നടപടിയുണ്ടാകുമെന്ന് മുന്നറിയിപ്പ് നൽകുകയും ചെയ്തിരുന്നു.
അണികളുടെ പ്രതിഷേധം: സുധാകരനെ തഴയുന്നതിനെതിരെ കണ്ണൂരിലെ കോൺഗ്രസ് പ്രവർത്തകർക്കിടയിൽ ശക്തമായ അമർഷമുണ്ട്. സുധാകരനെ മാറ്റിനിർത്തിയാൽ അത് കണ്ണൂർ ജില്ലയിലെ തിരഞ്ഞെടുപ്പ് ഫലത്തെ ബാധിക്കുമെന്ന് അദ്ദേഹത്തെ അനുകൂലിക്കുന്നവർ മുന്നറിയിപ്പ് നൽകുന്നു.കോൺഗ്രസ് ആദ്യഘട്ട പട്ടികകഴിഞ്ഞ ദിവസം ഡൽഹിയിൽ ചേർന്ന കേന്ദ്ര തിരഞ്ഞെടുപ്പ് സമിതി (CEC) 31 മണ്ഡലങ്ങളിലെ സ്ഥാനാർഥികളെ അംഗീകരിച്ചിട്ടുണ്ട്:
എംപിമാരുടെ അഭാവം: ആദ്യഘട്ട പട്ടികയിൽ നിലവിലെ എംപിമാരായ കെ. സുധാകരൻ, ശശി തരൂർ എന്നിവർ ഉൾപ്പെട്ടിട്ടില്ല.
സിറ്റിങ് എംഎൽഎമാർ: 19 സിറ്റിങ് എംഎൽഎമാർക്ക് ഇത്തവണയും സീറ്റ് ഉറപ്പിച്ചിട്ടുണ്ട്. വി.ഡി. സതീശൻ (പറവൂർ), ടി. സിദ്ദിഖ് (കൽപറ്റ), സണ്ണി ജോസഫ് (പേരാവൂർ) തുടങ്ങിയവർ പട്ടികയിലുണ്ട്.
പുതുമുഖങ്ങൾ: വട്ടിയൂർക്കാവിൽ കെ. മുരളീധരൻ, തൃത്താലയിൽ വി.ടി. ബൽറാം എന്നിവരുടെ പേരുകളും സജീവമായി പരിഗണനയിലുണ്ട്.
English Summary: Senior Congress leader K. Sudhakaran has expressed strong dissatisfaction over Assembly election seat discussions. He left Delhi for Kerala today, skipping the candidate selection meetings. Although Sudhakaran had expressed interest in contesting from the Kannur Assembly constituency, state leaders strongly opposed MPs contesting in the upcoming elections.