ആലപ്പുഴ: ആത്മഹത്യ ചെയ്ത നിലയില്‍ കണ്ടെത്തിയ എസ്.എന്‍.ഡി.പി യൂണിയന്‍ സെക്രട്ടറി കെ.കെ മഹേശന്റെ ഡയറിക്കുറിപ്പ് പുറത്ത്. ഈ മാസം 23ന് എഴുതിയ ഡയറിക്കുറിപ്പിലെ വിവരങ്ങളാണ് ഇപ്പോള്‍ പുറത്തുവന്നിരിക്കുന്നത്. മൈക്രോഫിനാന്‍സ് കേസുമായി ബന്ധപ്പെട്ട കാര്യങ്ങള്‍ ഡയറിക്കുറിപ്പിലുണ്ട്.
സാമ്പത്തിക തട്ടിപ്പു കേസ് തന്റെ മേല്‍ കെട്ടിവയ്ക്കാന്‍ ശ്രമം നടക്കുന്നുണ്ടെന്ന് ഡയറിക്കുറിപ്പിലുണ്ട്. കേസുമായി ബന്ധപ്പെട്ട് തനിക്കെതിരെ ഗൂഢാലോചനയുണ്ട്. വേട്ടയാടപ്പെടാന്‍ നിന്നുകൊടുക്കില്ലെന്നും ഡയറിക്കുറിപ്പില്‍ വ്യക്തമാക്കുന്നു. മഹേശന്റെ ആത്മഹത്യാ കുറിപ്പ് ഇന്നലെ പുറത്തുവന്നിരുന്നു.
ഇന്നലെയാണ് ചേര്‍ത്തല യൂണിയന്‍ അഡ്മിനിസ്‌ട്രേറ്റര്‍ കൂടിയായിരുന്ന കെ കെ മഹേശനെ യൂണിയന്‍ ഓഫീസില്‍ തൂങ്ങി മരിച്ച നിലയില്‍ കണ്ടെത്തിയത്. മൈക്രോഫിനാന്‍സ് കേസില്‍ ആരോപണ വിധേയനായ മഹേശനെ ക്രൈംബ്രാഞ്ച് വിളിച്ചുവരുത്തി മൊഴിയെടുത്തിരുന്നു. ഇദ്ദേഹത്തിനെതിരെ 21 ഓളം കേസുകളാണ് രജിസ്റ്റര്‍ ചെയ്തിട്ടുള്ളത്.