കോട്ടയം: സീറ്റ് വിഭജന തര്ക്കത്തെ തുടര്ന്ന് എന്ഡിഎ വിട്ട കേരള കോണ്ഗ്രസ് പിസി തോമസ് വിഭാഗവും ജോസഫ് വിഭാഗവും ഒന്നായി് യുഡിഎഫിലേക്ക്. പിജെ ജോസഫ് ഗ്രൂപ്പുമായി സഹകരിച്ച് മുന്നോട്ട് പോകുമെന്ന് പിസി തോമസ് കടുത്തുരുത്തിയില് നടന്ന ലയന സമ്മേളനത്തില് വ്യക്തമാക്കി. പിജെ ജോസഫാണ് ഇനി കേരള കോണ്ഗ്രസിന്റെ ചെയര്മാന്. പിസി തോമസ് ഡപ്യൂട്ടി ചെയര്മാനാകും. ജോസ് കെ മാണി വിഭാഗവുമായുള്ള കേസില് രണ്ടില ചിഹ്നവും പാര്ട്ടിയുടെ പേരും നഷ്ടപ്പെട്ട ജോസഫ് വിഭാഗത്തിന്റെ താത്പര്യ പ്രകാരമാണ് ലയനം നടന്നത്.
ലയന ശേഷം നടന്ന യുഡിഎഫിന്റെ കടുത്തുരുത്തി മണ്ഡലം കണ്വന്ഷന് ഉമ്മന്ചാണ്ടി ഉദ്ഘാടനം ചെയ്തു. പിസി തോമസിന്റെ വരവ് യുഡിഎഫിന് ശക്തിപകരുമെന്ന് ഉമ്മന്ചാണ്ടി വ്യക്തമാക്കി. പിസി തോമസ് എത്തേണ്ടിടത്ത് എത്തി. പിന്വാതില് നിയമനത്തിനും അഴിമതിക്കുമെതിരെ ജനങ്ങള്ക്ക് പ്രതികരിക്കാന് അവസരമാണ് ഈ തെരഞ്ഞെടുപ്പെന്നും ഉമ്മന്ചാണ്ടി പറഞ്ഞു.
രണ്ടില ചിഹ്നവും കേരള കോണ്ഗ്രസ് എം എന്ന പേരും നഷ്ടപ്പെട്ട ജോസഫ് വിഭാഗത്തിന് നിയമസഭ തെരഞ്ഞെടുപ്പിനു മുമ്പ് പുതിയ പാര്ട്ടിയുടെ രജിസ്ട്രേഷന് സാധ്യമല്ലാതെ വന്നതോടെയാണ് പിസി തോമസ് വിഭാഗവുമായി ലയിക്കാന് തീരുമാനിച്ചത്. കേരള കോണ്ഗ്രസ് എന്ന പേരാണ് പിസി തോമസ് വിഭാഗത്തിന്റേത്. ഈ പേരിന് തെരഞ്ഞെടുപ്പ് കമ്മീഷന്റെ അനുമതിയും ഉണ്ട്. ലയനത്തോടെ ജോസഫ് വിഭാഗവും കേരള കോണ്ഗ്രസ് ആകും. നിലവില് കസേരയാണ് പിസി തോമസ് വിഭാഗത്തിന്റെ ചിഹ്നം.
രജിസ്ട്രേഷനും ചിഹ്നവും ഇല്ലാതിരുന്ന ജോസഫ് വിഭാഗത്തിന് നിയമസഭ തെരഞ്ഞെടുപ്പില് ഒറ്റ ചിഹ്നത്തില് മത്സരിക്കാനാകില്ലായിരുന്നു. ലയനത്തോടെ ആ തടസ്സം മാറി. പാര്ട്ടിക്ക് അംഗീകാരം ഇല്ലാത്തതിനാല് ജയിച്ചു വരുന്ന ജോസഫ് വിഭാഗം എംഎല്എമാരെ സ്വതന്ത്രരായി പരിഗണിക്കേണ്ടി വന്നേനെ. അവര്ക്ക് കൂറുമാറ്റ നിരോധന നിയമവും ബാധകമാകില്ലായിരുന്നു.
ഇതെല്ലാം ഒഴിവാക്കാനാണ് തെരഞ്ഞെടുപ്പ് കമ്മീഷന്റെ അംഗീകാരമുള്ള പിസി തോമസ് വിഭാഗവുമായി ജോസഫിന്റെ ലയനം. ബിജെപി നേതൃത്വവുമായി ഇണങ്ങിയും പിണങ്ങിയും എന്ഡിഎയുടെ ഭാഗമായിരുന്ന പിസി തോമസ് കെ സുരേന്ദ്രന്റെ ജാഥയിലും പങ്കാളിയായിരുന്നു. എന്നാല് നിയമസഭ തെരഞ്ഞെടുപ്പില് പിസി തോമസ് വിഭാഗത്തിന് സീറ്റ് കിട്ടാത്തതോടെയാണ് മുന്നണി വിടാന് തീരുമാനിച്ചത്.