ബെയ്റൂത്ത്: തെക്കൻ ലെബനനിലെ അതിർത്തി ഗ്രാമങ്ങളിൽ സൈനിക നീക്കം ശക്തമാക്കി ഇസ്രയേൽ യുദ്ധം പുതിയ തലത്തിലേക്ക് വ്യാപിപ്പിക്കുന്നു. ഇറാനിലെ സംയുക്ത ആക്രമണങ്ങൾ അവസാനിപ്പിക്കാനുള്ള ചർച്ചകൾ നടക്കവേയാണ് സുരക്ഷാ ഭീഷണി ചൂണ്ടിക്കാട്ടി ഇസ്രയേൽ ലെബനനുനേരെ ആക്രമണം കടുപ്പിച്ചിരിക്കുന്നത്. അതിർത്തി ഗ്രാമങ്ങളിലെ വീടുകൾക്കുള്ളിൽ ഹിസ്ബുള്ള ഒളിപ്പിച്ചിരിക്കുന്ന ആയുധങ്ങളും സൈനിക സൗകര്യങ്ങളും നശിപ്പിക്കാനാണ് ഈ നടപടിയെന്നാണ് ഇസ്രയേൽ സൈന്യത്തിന്റെ വിശദീകരണം. ലിതാനി നദി വരെ ഒരു ‘സുരക്ഷാ മേഖല’ സ്ഥാപിക്കുക എന്ന ലക്ഷ്യത്തോടെ വലിയൊരു പ്രദേശം പിടിച്ചെടുക്കാനാണ് ഇസ്രയേൽ ഇപ്പോൾ പദ്ധതിയിടുന്നത്. ഇതിന്റെ ഭാഗമായി അതിർത്തി ഗ്രാമങ്ങളിലെ വീടുകളിൽ സ്ഫോടകവസ്തുക്കൾ സ്ഥാപിച്ച് അവ തകർക്കുന്ന രീതിയാണ് ഇസ്രയേൽ സൈന്യം പിന്തുടരുന്നത്.
അതിർത്തി ഗ്രാമങ്ങളിലെ കെട്ടിടങ്ങൾ നിയന്ത്രിത സ്ഫോടനങ്ങളിലൂടെ തകർക്കുന്നതായി അന്താരാഷ്ട്ര മാധ്യമമായ ‘ദി ഗാർഡിയൻ’ റിപ്പോർട്ട് ചെയ്തിട്ടുണ്ട്. ലെബനനിലെ തായ്ബെ, നഖുറ, ദൈർ സെര്യൻ എന്നീ ഗ്രാമങ്ങളിൽ ഇത്തരത്തിൽ സ്ഫോടനങ്ങൾ നടന്നതായി ഇസ്രയേൽ സൈന്യം ഇതിനോടകം സ്ഥിരീകരിച്ചു. മറ്റ് പല അതിർത്തി ഗ്രാമങ്ങളിലും സമാനമായ രീതിയിൽ സ്ഫോടനങ്ങൾ തുടരുന്നതായി ലെബനീസ് മാധ്യമങ്ങളും ആശങ്കയോടെ റിപ്പോർട്ട് ചെയ്യുന്നുണ്ട്. ഗാസയിലെ റഫയിലും ബെയ്ത് ഹനൂനിലും നടപ്പിലാക്കിയ അതേ മാതൃകയിൽ ഗ്രാമങ്ങൾ പൂർണ്ണമായും നശിപ്പിക്കാനാണ് ഇസ്രയേലിന്റെ നീക്കം. അതിർത്തിയിലെ എല്ലാ വീടുകളും നശിപ്പിക്കാൻ ഇസ്രയേൽ പ്രതിരോധ മന്ത്രി ഇസ്രയേൽ കാറ്റ്സ് പരസ്യമായി ആഹ്വാനം ചെയ്തത് വലിയ പ്രതിഷേധത്തിന് ഇടയാക്കിയിട്ടുണ്ട്.
യുദ്ധം ആരംഭിച്ചത് മുതൽ ലെബനനിൽ കൊല്ലപ്പെട്ടവരുടെ എണ്ണം ഇപ്പോൾ 2,000 കടന്നതായാണ് ഗാർഡിയൻ റിപ്പോർട്ടിൽ വ്യക്തമാക്കുന്നത്. ഗ്രാമങ്ങൾ ഒന്നൊന്നായി തകർക്കപ്പെടുന്നത് മേഖലയിൽ വലിയൊരു മാനുഷിക പ്രതിസന്ധിക്ക് കാരണമാകുമെന്ന് മനുഷ്യാവകാശ സംഘടനകൾ മുന്നറിയിപ്പ് നൽകുന്നു. അതേസമയം, പശ്ചിമേഷ്യയിലെ സംഘർഷം ലഘൂകരിക്കാൻ ഇറാനും അമേരിക്കയും പാകിസ്താനിൽ നടത്തിയ ചർച്ചകൾ ഫലം കാണാതെ പിരിഞ്ഞു. ഈ ചർച്ചകൾ തീരുമാനമാകാതെ അവസാനിച്ചത് വരും ദിവസങ്ങളിൽ മേഖലയിലെ സ്ഥിതി കൂടുതൽ വഷളാക്കുമെന്ന ആശങ്കയുണർത്തുന്നുണ്ട്. നയതന്ത്ര നീക്കങ്ങൾ പരാജയപ്പെടുന്നത് ലെബനനിലെയും ഗാസയിലെയും സാധാരണക്കാരുടെ ജീവിതം കൂടുതൽ ദുരിതത്തിലാഴ്ത്തുകയാണ്.
srael has intensified its military operations in southern Lebanon, targeting border villages to establish a ‘security zone’ up to the Litani River. Following a strategy used in Gaza, Israeli forces are using controlled explosions to demolish homes allegedly hiding Hezbollah military infrastructure. While the death toll in Lebanon has surpassed 2,000, the failure of high-level US-Iran peace talks in Pakistan has heightened fears of further escalation in the Middle East.