ഭുവനേശ്വര്: ഇന്ത്യയുടെ ആണവ വാഹക ശേഷിയുള്ള ബാലിസ്റ്റിക് മിസൈല് അഗ്നി-5 ന്റെ നൈറ്റ് ട്രയല് വിജയകരമായി പൂര്ത്തിയാക്കി. ഒഡിഷയില് വെച്ച് വൈകീട്ട് 5.30 നാണ് മിസൈല് പരീക്ഷിച്ചത്. 5000 കിലോമീറ്റര് അകലെയുള്ള ലക്ഷ്യം ഭേദിക്കാന് ശേഷിയുണ്ട് ഈ മിസൈലിന്.
മിസൈലില് പുതിയതായി ഉള്പ്പെടുത്തിയ സാങ്കേതിക വിദ്യകളും ഉപകരണങ്ങളും പരീക്ഷിക്കുന്നതിന് വേണ്ടിയാണ് അഗ്നി-5 ന്റെ നൈറ്റ് ട്രയല് നടത്തിയത്. മുന് പതിപ്പുകളേക്കാള് ഭാരം കുറവാണിതിന്. ഒരു മൊബൈല് മിസൈല് ലോഞ്ചര് ഉപയോഗിച്ചാണ് ഇന്നത്തെ വിക്ഷേപണം നടന്നത്.
ആവശ്യമെങ്കില് അഗ്നി 5 മിസൈലിന്റെ ദൂരപരിധി വര്ധിപ്പിക്കാന് സാധിക്കുമെന്ന് ഈ പരീക്ഷണത്തിലൂടെ വ്യക്തമായെന്നും പ്രതിരോധമേഖലയിലുള്ളവർ പറയുന്നു.
അഗ്നി മിസൈല് പരമ്പരയിലെ അത്യാധുനിക പതിപ്പാണ് അഗ്നി-5. 5000 കിലോമീറ്റര് ദൂരം സഞ്ചരിച്ച് ലക്ഷ്യസ്ഥാനത്ത് പതിക്കാന് ഇതിന് സാധിക്കും. ഭൂഖണ്ഡാന്തര ബാലിസ്റ്റിക് മിസൈലായ അഗ്നി-5 നെ കൂടാതെ 700 കിമീ പരിധിയുള്ള അഗ്നി-1, 2000 കിമീ പരിധിയുള്ള അഗ്നി-2, 2500 കിമീ പരിധിയിലുള്ള അഗ്നി-3, 3500 കിമീ പരിധിയുള്ള അഗ്നി -4 എന്നിവയാണ് ഈ ശ്രേണിയിലെ മുന്ഗാമികള്.
ഇന്ത്യയുടെ ഡിഫന്സ് റിസര്ച്ച് ആന്റ് ഡെവലപ്പ്മെന്റ് ഓര്ഗനൈസേഷന് (ഡിആര്ഡിഒ) ആണ് അഗ്നി-5 മിസൈല് വികസിപ്പിച്ചത്. ട്രക്കുകളില് കൊണ്ടുപോവാനും കാനിസ്റ്റര് ഉപയോഗിച്ച് വിക്ഷേപിക്കാനും സാധിക്കുന്ന മിസൈല് ആണിത്. 2012 ഏപ്രില് 19 ന് ആയിരുന്നു അഗ്നി-5ന്റെ ആദ്യ പരീക്ഷണ വിക്ഷേപണം. ശേഷം 2018 വരെ ആറ് പരീക്ഷണ വിക്ഷേപണങ്ങളും 2021 ല് യൂസര് ട്രയലും നടത്തി.