ശ്രീനഗർ: പ്രാദേശിക ക്രിക്കറ്റ് ടൂർണമെന്റിൽ പാലസ്തീന് പതാക പതിപ്പിച്ച ഹെൽമറ്റ് ധരിച്ച് കളിച്ച താരത്തിന് പിന്തുണയുമായി പീപ്പിൾസ് ഡെമോക്രാറ്റിക് പാർട്ടി (പിഡിപി) നേതാവും ജമ്മു കശ്മീർ മുൻ മുഖ്യമന്ത്രി മെഹബൂബ മുഫ്തിയുടെ മകളുമായ ഇൽതിജ മുഫ്തി രംഗത്തെത്തി. പാലസ്തീനിന്റെ സാഹചര്യത്തെക്കുറിച്ച് സംസാരിക്കുന്നതിൽ എന്താണ് തെറ്റെന്ന് ചോദിച്ച ഇൽതിജ, സംഭവത്തിൽ താരത്തെയും സംഘാടകനെയും ചോദ്യം ചെയ്യാൻ വിളിച്ചതിനെതിരെ അധികാരികൾക്കെതിരെയും ബിജെപിക്കെതിരെയും രൂക്ഷ വിമർശനം ഉന്നയിച്ചു.
ജമ്മു കശ്മീർ ചാംപ്യൻസ് ലീഗ് ടൂർണമെന്റിനിടെയാണ് ഫുർഖാൻ ഉൽ ഹഖ് എന്ന താരം പാലസ്തീന് പതാക പതിച്ച ഹെൽമറ്റുമായി ബാറ്റിങ്ങിന് ഇറങ്ങിയത്. സംഭവം സമൂഹമാധ്യമങ്ങളിൽ വൈറലായതോടെ താരത്തെയും ടൂർണമെന്റിന്റെ സംഘാടകനായ സാഹിദ് ബട്ടിനെയും പൊലീസ് ചോദ്യം ചെയ്യാൻ വിളിപ്പിച്ചു. 2026 ജനുവരി 03-ന് പ്രസിദ്ധീകരിച്ച വിവരമനുസരിച്ച്, 2025 ഡിസംബർ 29ന് ജമ്മുവിൽ ആരംഭിച്ച ടൂർണമെന്റിന് ക്രിക്കറ്റ് അസോസിയേഷന്റെ അംഗീകാരമില്ലെന്ന് ജമ്മു കശ്മീർ ക്രിക്കറ്റ് അസോസിയേഷൻ അറിയിച്ചിരുന്നു.
പാലസ്തീനെക്കുറിച്ച് സംസാരിക്കുന്നത് എന്തിന് തെറ്റാകുന്നുവെന്ന് ഇൽതിജ ചോദിച്ചു. ‘എല്ലാത്തിനും ഞങ്ങളെ ചോദ്യം ചെയ്യാൻ വിളിക്കുകയാണ്. സ്വതന്ത്രമായി സംസാരിക്കാൻ ഞങ്ങൾക്ക് സ്വാതന്ത്ര്യമില്ലേ? ലണ്ടൻ, യൂറോപ്പ്, അമേരിക്ക എന്നിവിടങ്ങളിലെല്ലാം ഗാസയിൽ ആളുകൾ കൊല്ലപ്പെടുന്നതിനെതിരെ പ്രതിഷേധങ്ങൾ നടക്കുന്നു. ഗാസയിൽ ഒരു തലമുറ മുഴുവൻ തുടച്ചുനീക്കപ്പെടുകയാണ്. ഇവിടെ എന്തിനും ഏതിനും ആളുകളെ പിടികൂടുന്നു. വിപിഎൻ പോലും നിരോധിക്കപ്പെടുന്നു. നിയമത്തിന്റെ മറവിൽ എന്തും നടക്കും, ഇവിടെ നിയമവാഴ്ചയില്ല,’ ഇൽതിജ പറഞ്ഞു.
ജമ്മു കശ്മീരിൽ ഹമാസ് പ്രത്യയശാസ്ത്രം നടപ്പിലാക്കാൻ അനുവദിക്കില്ലെന്ന ബിജെപി പ്രസ്താവന സംബന്ധിച്ച ചോദ്യത്തിന്, ബിജെപിയുടെ ഹിന്ദുത്വ പ്രത്യയശാസ്ത്രം ഇവിടെ നടപ്പിലാക്കാൻ അനുവദിക്കില്ലെന്ന് ഇൽതിജ മറുപടി നൽകി. ബിജെപിക്കും മുൻ മുഖ്യമന്ത്രി ഒമർ അബ്ദുല്ലയ്ക്കുമെതിരെയും അവർ ആഞ്ഞടിച്ചു. ‘ഞങ്ങൾ ഇവിടെ ഹിന്ദുത്വം അനുവദിക്കില്ല. ‘ജയ് ശ്രീ റാം’ അല്ലെങ്കിൽ ‘ഭാരത് മാതാ കീ ജയ്’ എന്ന് വിളിക്കാൻ നിങ്ങൾ ഞങ്ങളെ നിർബന്ധിച്ചാൽ, ഞങ്ങൾ അതു ചെയ്യാൻ പോകുന്നില്ല,’ ഇൽതിജ വ്യക്തമാക്കി. ഹിമാചൽ പ്രദേശിലും ഹരിയാനയിലും കശ്മീരി വിദ്യാർഥികളെയും ഷാൾ വിൽപനക്കാരെയും ആക്രമിക്കുന്നതും അവർ ചൂണ്ടിക്കാട്ടി.