മുംബൈ:1994 ൽ ലോകസുന്ദരി കിരീടം ചൂടിയ നാൾ മുതൽ ഇന്ത്യക്കാരുടെ വിശ്വസുന്ദരി ആരെന്ന ചോദ്യത്തിനുള്ള ഒരൊറ്റ ഉത്തരമാണ് ഐശ്വര്യ റായ്. ഫാഷൻ റാംപിൽ നിന്നും വെള്ളിത്തിരയിലേയ്ക്ക് ചുവടുവെച്ച ഐശ്വര്യ തമിഴ്, ഹിന്ദി തുടങ്ങിയ ഭാഷകൾ വഴി ഹോളിവുഡിൽ വരെ തന്റെ സാന്നിധ്യമറിയിച്ചു.
ഈയടുത്തിറങ്ങിയ പൊന്നിയിൻ സെൽവൻ എന്ന ചിത്രത്തിലും ഐശ്വര്യയുടെ ജ്വലിക്കുന്ന സൗന്ദര്യം ആരാധകരെ അത്ഭുതപ്പെടുത്തിയിരുന്നു. എന്നാൽ ഐശ്വര്യയോട് മേക് അപ് കുറയ്ക്കുവാൻ താൻ അഭ്യർത്ഥിച്ചു എന്നത് ഓർത്തെടുക്കുകയാണ് പ്രശസ്ത ബോളിവുഡ് സംവിധായകൻ സുഭാഷ് ഘായ്.
1969 ൽ ആദ്യചിത്രം സംവിധാനം ചെയ്ത അദ്ദേഹം കഴിഞ്ഞ അഞ്ചു പതിറ്റാണ്ടുകളായി ബോളിവുഡിലുണ്ട്. കർസ്, സൗദാഗർ, ഖൽനായക് തുടങ്ങി ശ്രദ്ധേയമായ നിരവധി ചിത്രങ്ങൾ സംവിധാനം ചെയ്ത സുഭാഷിന്റെ ഒരു മ്യൂസിക്കൽ മെഗാഹിറ്റ് ചിത്രമായിരുന്നു താൽ. ഐശ്വര്യ റായി, അക്ഷയ് ഖന്ന, അനിൽ കപൂർ തുടങ്ങി വലിയൊരു താരനിര തന്നെ അണിനിരന്ന ചിത്രം ആ വർഷത്തെ പണം വാരി ചിത്രങ്ങളിൽ മുൻപന്തിയിൽ തന്നെയായിരുന്നു. എന്നാൽ നായികയായ ഐശ്വര്യയോടും, മേക് അപ്പ് മാനോടും താൻ അധികം മേക്കപ്പ് പാടില്ലെന്ന് അഭ്യർത്ഥിച്ചതായി അദ്ദേഹം ഓർക്കുന്നു.
ഞാൻ ഐശ്വര്യയെ ആ സിനിമയിലേയ്ക്ക് ക്ഷണിച്ചത് തന്നെ തനി നാടൻ സുന്ദരിയായ, കൃത്രിമ ചായങ്ങൾ ഒന്നുമില്ലാത്ത ഒരു ഗ്രാമീണ സുന്ദരിയെ അവതരിപ്പിക്കാനാണ്. കഹി ആഗ് ലഗേ ലഗ് ജായേ എന്ന ഗാനത്തിന് വേണ്ടി ഐശ്വര്യ വലിയ രീതിയിൽ മേക് അപ് ചെയ്തുകൊണ്ട് വന്നു. എന്നാൽ ഇത് നായികാ സങ്കല്പത്തിന് ചേരില്ല എന്നതുകൊണ്ട് തന്നെ മേക് അപ് മാൻ മിക്കി കോൺട്രാക്ടറോടും ഐശ്വര്യയോടും ഞാൻ മേക് അപ് അധികമാകരുത് എന്നഭ്യർത്ഥിച്ചു. ഞാൻ എന്റെ എല്ലാ നായികമാരോടും അധികം മേക് അപ് ഉപയോഗിക്കരുത് എന്നഭ്യർത്ഥിക്കാറുണ്ട്.- സുഭാഷ് ഘായ് പറയുന്നു.
ഐശ്വര്യ റായിക്ക് മുൻപും ശേഷവും ഇന്ത്യയിൽ നിന്നും മിസ് വേൾഡ് കിരീടം കൂടിയവർ ഉണ്ടെങ്കിലും, ഇന്ത്യക്കാരെ സംബന്ധിച്ച് ലോകസുന്ദരി എന്ന് പറഞ്ഞാൽ അത് ഐശ്വര്യ റായിയാണ്. വയസ്സ് നാല്പത്തിയൊൻപതിൽ എത്തി നിൽക്കുമ്പോഴും ഒളി മങ്ങാത്ത ആ സൗന്ദര്യത്തിന്റെ ജ്വാല പൊന്നിയിൻ സെൽവനിലൂടെ ആരാധകർ കണ്ടതുമാണ്. അത്രയും പ്രാധാന്യം നൽകുന്നത് കൊണ്ട് തന്നെ ഐശ്വര്യയെ സംബന്ധിച്ച ഈ വാർത്തയും ഇപ്പോൾ സോഷ്യൽ മീഡിയയിൽ വൈറലാണ്.
കാളീചരൺ , കഴ്സ്, ഹീറോ മേരി ജംഗ്, കർമ, രാം ലഖൻ,സൗദാഗർ , ഖൽനായക് , പർദേശ് , താൾ തുടങ്ങിയവയാണ് സുഭാഷ് ഘായുടെ പ്രധാനപ്പെട്ട ചിത്രങ്ങൾ. ചിത്രങ്ങളിലെ കഥാപരമായും ദൃശ്യപരമായുമുള്ള പൊലിമ മൂലം ‘ഹിന്ദി സിനിമയിലെ ഷോമാൻ’ എന്നാണ് അദ്ദേഹം അറിയപ്പെടുന്നത്. 1982-ൽ മുക്ത ആർട്സ് എന്ന ചലച്ചിത്രനിർമ്മാണ കമ്പനി ആരംഭിച്ചു. പൂനെ ഫിലിം ഇൻസ്റ്റിറ്റ്യൂട്ടിൽ നിന്നും ഡിപ്ലോമ കരസ്ഥമാക്കിയ ശേഷം, 1970 മുതൽ ഹിന്ദി ചലച്ചിത്രവേദിയിൽ സജീവമാണ് അദ്ദേഹം.