കോഴിക്കോട് : നടുറോഡില്‍ ഭാര്യയ്‌ക്ക് ഭര്‍ത്താവിന്റെ ക്രൂരമര്‍ദ്ദനം. അശോകപുരത്ത് മീന്‍കട നടത്തിവരുന്ന ശ്യാമിലിയ്‌ക്കാണ് മര്‍ദ്ദനമേറ്റത്.
സംഭവത്തില്‍ ഭര്‍ത്താവ് നിധീഷിനെതിരെ പോലീസ് വധശ്രമത്തിന് കേസ് എടുത്തു.
അശോകപുരത്തെ കോസ്റ്റ്ഗാര്‍ഡ് ഓഫീസിനു മുന്‍പില്‍ മീന്‍ കട നടത്തിയാണ് ശ്യാമിലി ഉപജീവനം നയിച്ചിരുന്നത്. ഇവിടെയെത്തിയായിരുന്നു നിധീഷിന്റെ അതിക്രമം. മര്‍ദ്ദനത്തിന്റെ കാരണം വ്യക്തമല്ല. കുടുംബ പ്രശ്‌നങ്ങളാണ് ആക്രമണത്തിന് പിന്നില്‍ എന്നാണ് പ്രാഥമിക നിഗമനം. മദ്യലഹരിയില്‍ നിധീഷ് ശ്യാമിലിയെ ഇതിന് മുന്‍പും ഉപദ്രവിച്ചിട്ടുണ്ടെന്നാണ് വിവരം. നിധീഷ് ശ്യാമിലിയെ മര്‍ദ്ദിക്കുന്നതിന്റെ ദൃശ്യങ്ങള്‍ സമൂഹമാദ്ധ്യമങ്ങളില്‍ വ്യാപകമായി പ്രചരിക്കുന്നുണ്ട്.
ശ്യാമിലിയ്‌ക്കെപ്പാമുണ്ടായിരുന്ന സ്ത്രീകളില്‍ ഒരാളാണ് മര്‍ദ്ദനത്തിന്റെ ദൃശ്യങ്ങള്‍ മൊബൈല്‍ ഫോണില്‍ പകര്‍ത്തിയത്. പോലീസിനെ വിളിച്ചതും ഇവരാണ്. മര്‍ദ്ദനത്തിന് പുറമേ ശ്യാമിലിയെ ഇയാള്‍ കേട്ടാല്‍ അറയ്‌ക്കുന്ന അസഭ്യം പറയുന്നതായും വീഡിയോയില്‍ കാണാം. സംഭവത്തില്‍ നടക്കാവ് പോലീസാണ് നിധീഷിനെതിരെ കേസ് എടുത്തത്.
