തിരുവനന്തപുരം: കൊവിഡ് ബാധിച്ചു മരിച്ചതു വീട്ടില്വച്ചാണെങ്കില് സര്ക്കാരിന്റെ കൊവിഡ് മരണ ലിസ്റ്റില് ഉള്പ്പെടുമെന്നതു വ്യാമോഹം മാത്രം. കൊവിഡ് മരണങ്ങള് ഉള്പ്പെടുത്താനും അപ്പീല് നല്കാനുമായി ആരോഗ്യവകുപ്പ് തയാറാക്കിയിരിക്കുന്ന വെബ്സൈറ്റിലാണ് കെണിയൊരുക്കി വച്ചിരിക്കുന്നത്.
സൈറ്റില് കൊവിഡ് ബാധിച്ചു മരിച്ചവരുടെ രജിസ്ട്രേഷന് പൂര്ത്തിയാക്കണമെങ്കില് ആശുപത്രി രേഖകള് നിര്ബന്ധമാക്കിയതാണ് ആയിരക്കണക്കിനു പേര്ക്കു കുരുക്കായിരിക്കുന്നത്. ഇതുമൂലം വീട്ടില് തന്നെ കഴിഞ്ഞു കൊവിഡ് ബാധിച്ചു മരിച്ചവരുടെ ബന്ധുക്കള്ക്കൊന്നും സൈറ്റില് രജിസ്റ്റര് ചെയ്യാനോ അപ്പീല് നല്കാനോ കഴിയാത്ത സ്ഥിതിയാണ്.
ആശുപത്രി രേഖകള് സൈറ്റില് സമര്പ്പിച്ചെങ്കില് മാത്രം അപേക്ഷാ ഫോം സമ്മിറ്റ് ചെയ്യാന് കഴിയുന്ന തരത്തിലാണ് വെബ്സൈറ്റ് ക്രമീകരിച്ചിരിക്കുന്നത്. ആശുപത്രിയിലെ ചികിത്സാ രേഖ നിര്ബന്ധമാക്കിയതോടെ കോവിഡും അനുബന്ധ രോഗങ്ങളും ബാധിച്ചു വീട്ടില് മരിച്ചവരുടെ ബന്ധുക്കള്ക്ക് ഓണ്ലൈനില് അപേക്ഷിക്കാനോ അപ്പീല് അപേക്ഷ സമര്പ്പിക്കാനോ കഴിയാത്ത അവസ്ഥയായി. സാങ്കേതികത്വത്തില് കുടുങ്ങി സാധാരണക്കാര് ആനുകൂല്യങ്ങള് ലഭിക്കേണ്ടവരുടെ പട്ടികയില്നിന്നു പുറത്താകുമെന്ന സ്ഥിതിയാണ്.
ചികിത്സ തേടിയ ആശുപത്രിയിലെ രേഖകളും തീയതിയും അടക്കമുള്ള വിവരങ്ങള് നല്കാത്തവരുടെ ഓണ്ലൈന് അപേക്ഷകള് പൂര്ത്തിയാക്കാനാകുന്നില്ലെന്നാണു പ്രധാന പരാതി. കൊവിഡ് പോസിറ്റീവ് സര്ട്ടിഫിക്കറ്റും തദ്ദേശ സ്ഥാപനത്തിന്റെ മരണ സര്ട്ടിഫിക്കറ്റും അപ്ലോഡ് ചെയ്തിട്ടും മരിച്ചവരുടെ ആശുപത്രി രേഖകള് നിര്ബന്ധമാക്കിയത് സംസ്ഥാനത്തെ കോവിഡ് മരണസംഖ്യ കുറച്ചുകാണിക്കുന്നതിനുള്ള ഗൂഢശ്രമമാണെന്ന് ആരോപണമുണ്ട്.
ആശുപത്രി രേഖകള് ഹാജരാകാത്തവര്ക്കു തദ്ദേശ സ്ഥാപനത്തിലെ പ്രാഥമികാരോഗ്യ കേന്ദ്രം പോലും ഓണ്ലൈന് അപേക്ഷാ പോര്ട്ടലില്നിന്ന് എടുക്കാന് കഴിയാത്ത അവസ്ഥയാണിപ്പോള്. ആരോഗ്യവകുപ്പിന്റെ അനാസ്ഥ മൂലം അപ്പീല് അപേക്ഷ പോലും നല്കാനാകാതെ സാധാരണക്കാര് വലയുമ്പോള്, ചികിത്സാരേഖ നിര്ബന്ധമാക്കിയിട്ടില്ലെന്ന പതിവു മറുപടി മാത്രമാണ് ആരോഗ്യമന്ത്രിയുടെ ഓഫീസ് പറയുന്നത്.
കൊവിഡ് ബാധിച്ചു വീട്ടില് മരിച്ചവരെ സംസ്ഥാനത്തെ കോവിഡ് മരണസംഖ്യയില് ഉള്പ്പെടുത്തുന്നില്ലെന്ന ആക്ഷേപം വ്യാപകമായതോടെയാണ് ഓണ്ലൈന് രജിസ്ട്രേഷന് നടപടികള്ക്ക് സംസ്ഥാന സര്ക്കാര് തുടക്കമിട്ടത്. കോവിഡ് ബാധിച്ചു വീട്ടില് മരിച്ചവര്ക്കും ആശുപത്രിയില് മരിച്ചവരുടെ ആനുകൂല്യങ്ങള് ലഭിക്കുന്നതിനായി സാങ്കേതിക നടപടിക്രമങ്ങള് ലഘൂകരിക്കുമെന്നായിരുന്നു മുഖ്യമന്ത്രി പിണറായി വിജയനും ആരോഗ്യമന്ത്രിയും അടക്കമുള്ളവര് നിയമസഭയെ അറിയിച്ചത്.
കേരളത്തിലെ കോവിഡ് മരണസംഖ്യ കുറച്ചു കാണിക്കുന്നതിനായി സര്ക്കാര് തലത്തില് ഗൂഢാലോചന നടക്കുന്നതായി ആരോപിച്ചു പ്രതിപക്ഷം നിയമസഭയില് നിന്ന് ഇറങ്ങിപ്പോയിരുന്നു. കോവിഡ് ബാധിച്ചു മരിച്ചവരുടെ ആശ്രിതര്ക്കു സുപ്രീംകോടതി നിര്ദേശ പ്രകാരം 50,000 രൂപയുടെ ഒറ്റത്തവണ ധനസഹായം നല്കുമെന്നു സര്ക്കാര് പ്രഖ്യാപിച്ചിരുന്നു. സാമ്പത്തികമായി പിന്നാക്കം നില്ക്കുന്ന (ബിപിഎല്) കുടുംബങ്ങള്ക്ക് പ്രതിമാസം 5,000 രൂപ വീതം മൂന്നു വര്ഷം ധനസഹായം വിതരണം ചെയ്യാനും സര്ക്കാര് തീരുമാനിച്ചിരുന്നു.