കൊച്ചി: മരടിലെ ഫ്ലാറ്റ് പൊളിക്കലിനെ ആസ്പദമാക്കി കണ്ണൻ താമരക്കുളം ഒരുക്കുന്ന മരട് 357 സിനിമയുടെ പ്രദര്ശനം ഹൈക്കോടതി തടഞ്ഞു. നാലാഴ്ചത്തേക്കാണ് പ്രദര്ശനം തടഞ്ഞത്. ഫ്ലാറ്റ് നിർമ്മാതാക്കൾ നൽകിയ ഹർജിയിലാണ് കോടതി നടപടി.
ഫ്ലാറ്റ് നിർമാതാക്കളെ അപകീർത്തിപ്പെടുത്തുന്ന രീതിയിലാണ് സിനിമ ഒരുക്കുന്നതെന്നും, കോടതിയിൽ നിൽക്കുന്ന കേസിനെ ഇത് പ്രതികൂലമായി ബാധിക്കുമെന്നും ചൂണ്ടാകാട്ടി സിർമ്മാതാക്കൾ കേന്ദ്ര സർക്കാറിന് പരാതി നൽകിയിരുന്നു. ഇതില് തീരുമാനം വരും വരെയാണ് പ്രദര്ശനം തടഞ്ഞത്.
ജയറാം നായകനായ ‘പട്ടാഭിരാമന്’ ശേഷം കണ്ണന് താമരക്കുളം സംവിധാനം ചെയ്തിരിക്കുന്ന ചിത്രത്തില് അനൂപ് മേനോനൊപ്പം ധര്മ്മജന് ബോല്ഗാട്ടി, ഷീലു എബ്രഹാം, നൂറിന് ഷെരീഫ്, മനോജ് കെ ജയന്, ബൈജു സന്തോഷ്, സാജില് സുദര്ശന്, സെന്തില് കൃഷ്ണ, സുധീഷ്, ഹരീഷ് കണാരന്, കൈലാഷ്, ശ്രീജിത്ത് രവി, ജയന് ചേര്ത്തല, സരയു തുടങ്ങി നിരവധി താരങ്ങളാണ് അണിനിരക്കുന്നത്
ദിനേശ് പള്ളത്തിന്റേതാണ് തിരക്കഥ. അബാം മൂവീസിന്റെ ബാനറില് അബ്രഹാം മാത്യുവും സ്വര്ണ്ണലയ സിനിമാസിന്റെ ബാനറില് സുദര്ശന് കാഞ്ഞിരംകുളവും ചേര്ന്നാണ് സിനിമയുടെ നിര്മ്മാണം.