തിരുവനന്തപുരം: സംസ്ഥാനത്ത് കനത്ത മഴ തുടരുന്നു. ഇന്ന് ഏഴ് ജില്ലകളില് യെല്ലോ അലര്ട്ട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, കോട്ടയം, ആലപ്പുഴ, ഇടുക്കി, എറണാകുളം ജില്ലകളിലാണ് യെല്ലോ അലര്ട്ട് പ്രഖ്യാപിച്ചിട്ടുളളത്.
അറബിക്കടലില് രൂപപ്പെടുന്ന ന്യൂനമര്ദ്ദം നാളെയോടെ ചുഴലിക്കാറ്റായി രൂപപ്പെടാനുള്ള സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ആഴക്കടലില് മീന് പിടിക്കാന് പോയവര് നാളെയോടെ സുരക്ഷിത സ്ഥാനത്തെത്താന് നിര്ദ്ദേശമുണ്ട്. കേരള തീരത്ത് മത്സ്യബന്ധനത്തിന് വിലക്കും ഏര്പ്പെടുത്തി.
തീരപ്രദേശങ്ങളില് താമസിക്കുന്നവര്ക്ക് ദുരന്തനിവാരവകുപ്പ് ജാഗ്രത നിര്ദ്ദേശം നല്കിയിട്ടുണ്ട്. കടല് പ്രക്ഷുബ്ധമാണ്. മണിക്കൂറില് 50 കിലോമീറ്റര് വേഗതയില് കാറ്റ് വീശാനും സാധ്യതയുണ്ട്. ഇടിമിന്നലിനും സാധ്യതയുണ്ട്. 16 വരെ സംസ്ഥാനത്ത് കനത്ത മഴ തുടരുമെന്നാണ് മുന്നറിയിപ്പ്.
കൊല്ലം മുതല് തൃശ്ശൂര് വരെയുള്ള 6 ജില്ലകളില് നാളെ ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. ന്യൂനമര്ദത്തിന്റെ പ്രതീക്ഷിക്കപ്പെടുന്ന സഞ്ചാരപഥത്തില് നിലവില് കേരളം ഇല്ല. എന്നാല് കേരളത്തില് ശക്തമായ കാറ്റിനും മഴക്കും സാധ്യതയുണ്ട്. ന്യൂനമര്ദം രൂപപ്പെടുന്ന ഘട്ടത്തില് കടലാക്രമണം ശക്തിപ്പെടാനുള്ള സാധ്യതയുണ്ട്.
അപകടകരമായ അവസ്ഥയില് തീരപ്രദേശങ്ങളില് താമസിക്കുന്നവരെ ആവശ്യമായ ഘട്ടത്തില് സുരക്ഷിതമായ ക്യാമ്പുകളിലേക്ക് മാറ്റാന് മുഖ്യമന്ത്രി നിര്ദേശം നല്കി. തീരദേശത്തുള്ള തദ്ദേശ സ്വയംഭരണ സ്ഥാപനങ്ങളും റവന്യു ഉദ്യോഗസ്ഥരും ഈ കാര്യങ്ങള്ക്ക് നേതൃത്വം നല്കും.