ന്യൂഡല്ഹി: താന് സജീവ രാഷ്ട്രീയത്തില് നിന്ന് വിരമിക്കുകയാണെന്ന പ്രഖ്യാപനവുമായി കാശ്മീരില് നിന്നുള്ള മുതിര്ന്ന കോണ്ഗ്രസ് നേതാവ് ഗുലാം നബി ആസാദ്. രാഷ്ട്രീയത്തില് നിന്നും വിരമിച്ച് സമൂഹിക സേവനത്തില് കൂടുതല് ശ്രദ്ധകൊടുക്കാന് താന് ആഗ്രഹിക്കുന്നുവെന്ന് മുതിര്ന്ന പ്രയാസകരമായ ഘട്ടത്തില് പൊതുസമൂഹത്തിന് പ്രധാന പങ്ക് വഹിക്കാനുണ്ടെന്നും അദ്ദേഹം വ്യക്തമാക്കി.
‘സമൂഹത്തില് നമുക്കൊരു മാറ്റം കൊണ്ടുവരേണ്ടതുണ്ട്. ഞാന് വിരമിച്ച് സാമൂഹിക സേവനത്തില് മുഴുകാന് പോകുന്നതായി കേട്ടാല് അത് വലിയ സംഭവമായി നിങ്ങള്ക്ക് തോന്നണമെന്നില്ല’-പത്മഭൂഷണ് ലഭിച്ച ഗുലാംനബി ആസാദിനെ ആദരിക്കുന്നതിന് സംഘടിപ്പിച്ച ചടങ്ങില് വെച്ചായിരുന്നു അദ്ദേഹത്തിന്റെ പ്രസ്താവന.
ജമ്മു കാശ്മീര് ഹൈക്കോടതി ബാര് അസോസിയേഷന് പ്രസിഡന്റും മുതിര്ന്ന അഭിഭാഷകനുമായ എംകെ ഭരദ്വാജാണ് പരിപാടി സംഘടിപ്പിച്ചത്. ഇന്ത്യയിലെ രാഷ്ട്രീയം വളരെ വൃത്തികെട്ടതായി മാറിയിരിക്കുന്നുവെന്നും ചിലപ്പോള് നമ്മള് മനുഷ്യരാണോ എന്ന് സംശയിക്കേണ്ട സ്ഥിതിയിലെത്തിയിരിക്കുന്നെന്നും ഗുലാം നബി ആസാദ് പ്രസംഗത്തില് പരാമര്ശിച്ചു.