IPL🏏സമഗ്രാധിപത്യം,മുംബൈയെ തകര്‍ത്ത് ഗുജറാത്ത്‌

അഹമ്മദാബാദ്: ഇന്ത്യന്‍ പ്രീമിയര്‍ ലീഗിലെ ചാമ്പ്യന്മാരുടെ പോരില്‍ മുംബൈ ഇന്ത്യന്‍സിനെ തകര്‍ത്ത് ഗുജറാത്ത് ടൈറ്റന്‍സ്. 55 റണ്‍സിനാണ് ഗുജറാത്ത് മുംബൈ ഇന്ത്യന്‍സിനെ പരാജയപ്പെടുത്തിയത്. ഗുജറാത്ത് ഉയര്‍ത്തിയ 208 റണ്‍സ് വിജയലക്ഷ്യത്തിലേക്ക് ബാറ്റേന്തിയ മുംബൈയ്ക്ക് നിശ്ചിത ഓവറില്‍ ഒന്‍പത് വിക്കറ്റ് നഷ്ടത്തില്‍ 152 റണ്‍സെടുക്കാനേ സാധിച്ചുള്ളൂ. ബൗളിങ്ങിലും ബാറ്റിങ്ങിലും ഒരുപോലെ തിളങ്ങിയ ഗുജറാത്ത് അനായാസ വിജയം കുറിച്ചു. മുംബൈയ്ക്ക് വേണ്ടി നേഹല്‍ വധേരയും കാമറൂണ്‍ ഗ്രീനും മാത്രമാണ് തിളങ്ങിയത്.

ഗുജറാത്ത് ഉയര്‍ത്തിയ കൂറ്റന്‍ വിജയലക്ഷ്യത്തിലേക്ക് ബാറ്റിങ് ആരംഭിച്ച മുംബൈയുടെ തുടക്കം തന്നെ തകര്‍ച്ചയോടെയായിരുന്നു. ഓപ്പണര്‍മാരായ ഇഷാന്‍ കിഷനും നായകന്‍ രോഹിത് ശര്‍മയും റണ്‍സ് കണ്ടെത്താന്‍ നന്നായി ബുദ്ധിമുട്ടി. ഒടുവില്‍ രണ്ടാം ഓവറില്‍ എട്ട് പന്തില്‍ നിന്ന് രണ്ട് റണ്‍സെടുത്ത രോഹിത് ശര്‍മയെ ഹാര്‍ദിക് പാണ്ഡ്യ പുറത്താക്കി. രോഹിത്തിന് പകരം വന്ന കാമറൂണ്‍ ഗ്രീനിന്റെ ചെറുത്തുനില്‍പ്പ് മുംബൈ ഇന്ത്യന്‍സിനെ വലിയ തകര്‍ച്ചയില്‍ നിന്ന് രക്ഷിച്ചു.

ഒരുവശത്ത് ഗ്രീന്‍ നന്നായി ബാറ്റുവീശിയപ്പോള്‍ മറുവശത്ത് ഇഷാന്‍ കിഷന്‍ പരാജയമായി. 21 പന്തില്‍ 13 റണ്‍സെടുത്ത താരത്തെ റാഷിദ് ഖാന്‍ പുറത്താക്കി. പിന്നാലെ വന്ന തിലക് വര്‍മയെ രണ്ട് റണ്‍സില്‍ പുറത്താക്കി റാഷിദ് മത്സരത്തില്‍ ഗുജറാത്തിന് ആധിപത്യം നല്‍കി. വൈകാതെ ഗ്രീനിന്റെ പോരാട്ടവും അവസാനിച്ചു. 26 പന്തില്‍ 33 റണ്‍സെടുത്ത താരത്തെ നൂര്‍ അഹമ്മദ് ക്ലീന്‍ ബൗള്‍ഡാക്കി. തൊട്ടടുത്ത പന്തില്‍ ടിം ഡേവിഡിനെയും മടക്കി നൂര്‍ അഹമ്മദ് മുബൈയ്ക്ക് കനത്ത തിരിച്ചടി സമ്മാനിച്ചു.

ഇതോടെ മുംബൈ 10.4 ഓവറില്‍ അഞ്വുവിക്കറ്റിന് 59 റണ്‍സ് എന്ന സ്‌കോറിലേക്ക് കൂപ്പുകുത്തി. പിന്നീട് ക്രീസിലൊന്നിച്ച സൂര്യകുമാര്‍ യാദവും നേഹല്‍ വധേരയും ചേര്‍ന്ന് രക്ഷാപ്രവര്‍ത്തനം ആരംഭിച്ചെങ്കിലും ഈ കൂട്ടുകെട്ടും അധികദൂരം പോയില്ല. 12 പന്തില്‍ 23 റണ്‍സെടുത്ത സൂര്യകുമാറിനെ മടക്കി നൂര്‍ അഹമ്മദ് മത്സരത്തിലെ തന്റെ മൂന്നാം വിക്കറ്റ് സ്വന്തമാക്കി.

പിന്നീട് ക്രീസിലൊന്നിച്ച വധേരയും പീയുഷ് ചൗളയും ചേര്‍ന്ന് ടീം സ്‌കോര്‍ 130 കടത്തി. എന്നാല്‍ 18 റണ്‍സെടുത്ത ചൗളയെ റണ്‍ ഔട്ടാക്കി ഗുജറാത്ത് മത്സരത്തില്‍ പിടിമുറുക്കി. പിന്നാലെ വധേരയും പുറത്തായി. 21 പന്തില്‍ 40 റണ്‍സെടുത്ത താരത്തെ മോഹിത് ശര്‍മയാണ് പുറത്താക്കിയത്. ഇതോടെ ഗുജറാത്ത് വിജയമുറപ്പിച്ചു.

അവസാന ഓവറില്‍ അര്‍ജുന്‍ തെണ്ടുല്‍ക്കര്‍ പുറത്തായി. 13 റണ്‍സെടുത്ത താരത്തെ മോഹിത് ശര്‍മ പുറത്താക്കി. ബെഹ്‌റെന്‍ഡോര്‍ഫും (3) മെറെഡിത്തും (0) പുറത്താവാതെ നിന്നു.ഗുജറാത്തിന് വേണ്ടി നൂര്‍ അഹമ്മദ് മൂന്ന് വിക്കറ്റെടുത്തപ്പോള്‍ റാഷിദ് ഖാന്‍, മോഹിത് ശര്‍മ എന്നിവര്‍ രണ്ട് വിക്കറ്റ് വീതം സ്വന്തമാക്കി. ഹാര്‍ദിക് ഒരു വിക്കറ്റ് വീഴ്ത്തി.

ആദ്യം ബാറ്റുചെയ്ത ഗുജറാത്ത് 20 ഓവറില്‍ ആറ് വിക്കറ്റ് നഷ്ടത്തില്‍ 207 റണ്‍സെടുത്തു. ശുഭ്മാന്‍ ഗില്ലിന്റെയും ഡേവിഡ് മില്ലറിന്റെയും അഭിനവ് മനോഹറിന്റെയും തകര്‍പ്പന്‍ ബാറ്റിങ്ങാണ് ഗുജറാത്തിന് മികച്ച സ്‌കോര്‍ സമ്മാനിച്ചത്.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഗുജറാത്തിന് തുടക്കത്തില്‍ തന്നെ തിരിച്ചടി ലഭിച്ചു. ഓപ്പണറായ വൃദ്ധിമാന്‍ സാഹ മൂന്നാം ഓവറില്‍ തന്നെ പുറത്തായി. നാല് റണ്‍സെടുത്ത താരത്തെ അര്‍ജുന്‍ തെണ്ടുല്‍ക്കര്‍ പുറത്താക്കി. പിന്നാലെ വന്ന ഹാര്‍ദിക് പാണ്ഡ്യയെ കൂട്ടുപിടിച്ച് ഓപ്പണര്‍ ശുഭ്മാന്‍ ഗില്‍ അടിച്ചുതകര്‍ത്തു. പാണ്ഡ്യ റണ്‍സെടുക്കാന്‍ ബുദ്ധിമുട്ടിയെങ്കിലും ഗില്‍ അനായാസം ബാറ്റുവീശി. ഇരുവരും ചേര്‍ന്ന് ടീം സ്‌കോര്‍ 50 കടത്തി.

എന്നാല്‍ അധികം വൈകാതെ പാണ്ഡ്യ പുറത്തായി. 13 റണ്‍സെടുത്ത താരത്തെ പീയുഷ് ചൗള പുറത്താക്കി. പിന്നാലെ വന്ന വിജയ് ശങ്കറിനെ കൂട്ടുപിടിച്ച് ഗില്‍ തകര്‍ത്തടിച്ചു. പിന്നാലെ താരം അര്‍ധസെഞ്ചുറി നേടുകയും ചെയ്തു. എന്നാല്‍ അര്‍ധസെഞ്ചുറിയ്ക്ക് പിന്നാലെ ഗില്‍ പുറത്തായി. 34 പന്തില്‍ നിന്ന് ഏഴ് ഫോറിന്റെയും ഒരു സിക്‌സിന്റെയും സഹായത്തോടെ 56 റണ്‍സെടുത്ത താരത്തെ കുമാര്‍ കാര്‍ത്തികേയ പുറത്താക്കി.

പിന്നാലെ 19 റണ്‍സെടുത്ത വിജയ് ശങ്കറിനെ പീയുഷ് ചൗള മടക്കിയതോടെ ഗുജറാത്ത് പതറി. എന്നാല്‍ അഞ്ചാം വിക്കറ്റില്‍ ഡേവിഡ് മില്ലറും അഭിനവ് മനോഹറും ഗ്രൗണ്ടിലൊന്നിച്ചതോടെ കഥമാറി. ഇരുവരും അനായാസം ബാറ്റുവീശി. അഭിനവും മില്ലറും ചേര്‍ന്ന് അവസാന ഓവറുകളില്‍ അടിച്ചുതകര്‍ത്തു. ഇരുവരും ചേര്‍ന്ന് അഞ്ചാം വിക്കറ്റില്‍ വെറും 35 പന്തുകളില്‍ നിന്ന് 71 റണ്‍സാണ് കൂട്ടിച്ചേര്‍ത്തത്.

എന്നാല്‍ 19-ാം ഓവറില്‍ അഭിനവ് പുറത്തായി. 21 പന്തില്‍ 42 റണ്‍സെടുത്ത അഭിനവ് മെറെഡിത്തിന്റെ പന്തില്‍ പുറത്തായി. പിന്നാലെ വന്ന രാഹുല്‍ തെവാത്തിയ നേരിട്ട ആദ്യ പന്തില്‍ തന്നെ സിക്‌സടിച്ച് വരവറിയിച്ചു. അതേ ഓവറിലെ അഞ്ചാം പന്തില്‍ മില്ലറെ പുറത്താക്കാനുള്ള അവസരം ബെഹ്‌റെന്‍ഡോര്‍ഫ് വിട്ടുകളഞ്ഞു. ബൗണ്ടറി ലൈനില്‍ വന്ന ക്യാച്ച് താരത്തിന്റെ കൈയ്യില്‍ തട്ടി സിക്‌സായി. അവസാന പന്തിലും സിക്‌സടിച്ച് മില്ലര്‍ കൊടുങ്കാറ്റായി.

ബെഹ്‌റെന്‍ഡോര്‍ഫ് ചെയ്ത അവസാന ഓവറിലെ ആദ്യ രണ്ട് പന്തിലും സിക്‌സടിച്ച് തെവാത്തിയ ടീം സ്‌കോര്‍ 200 കടത്തി. അതേ ഓവറിലെ അഞ്ചാം പന്തില്‍ മില്ലര്‍ പുറത്തായി. 22 പന്തില്‍ നിന്ന് 46 റണ്‍സെടുത്താണ് താരം ക്രീസ് വിട്ടത്. തെവാത്തിയ അഞ്ച് പന്തില്‍ 20 റണ്‍സെടുത്തും റാഷിദ് ഖാന്‍ രണ്ട് റണ്‍സ് നേടിയും പുറത്താവാതെ നിന്നു.

മുംബൈയ്ക്ക് വേണ്ടി പീയുഷ് ചൗള രണ്ട് വിക്കറ്റെടുത്തു. അര്‍ജുന്‍ തെണ്ടുല്‍ക്കര്‍, ബെഹ്‌റെന്‍ഡോര്‍ഫ്, മെറെഡിത്ത്, കാര്‍ത്തികേയ എന്നിവര്‍ ഓരോ വിക്കറ്റ് വീതം സ്വന്തമാക്കി.