IPL🏏കൊല്‍ക്കത്തയെ തകര്‍ത്തു,7 വിക്കറ്റ് വിജയം; ഗുജറാത്ത് വീണ്ടും തലപ്പത്ത്‌

കൊൽക്കത്ത: ഐപിഎല്ലിൽ കൊൽക്കത്ത നൈറ്റ് റൈഡേഴ്സിനെ കീഴടക്കി ഗുജറാത്ത് ടൈറ്റൻസ് വീണ്ടും പോയിന്റ് പട്ടികയിൽ ഒന്നാമതെത്തി. ഈഡൻ ഗാർഡൻസ് സ്റ്റേഡിയത്തിൽ നടന്ന പോരാട്ടത്തിൽ ഏഴു വിക്കറ്റിനാണു ഗുജറാത്തിന്റെ വിജയം. കൊൽക്കത്ത ഉയർത്തിയ 180 റൺസ് വിജയലക്ഷ്യത്തിലേക്ക് മൂന്ന് വിക്കറ്റ് നഷ്ടത്തിൽ 13 പന്തുകൾ ബാക്കി നിൽക്കെ ഗുജറാത്ത് എത്തി.

സ്കോർ: കൊൽക്കത്ത ഏഴിന് 179 (20), ഗുജറാത്ത് മൂന്നിന് 180 (17.5). ആറാം വിജയത്തോടെ ഗുജറാത്തിന് 12 പോയിന്റായി. അര്‍ധ സെഞ്ചറി നേടിയ വിജയ് ശങ്കർ (24 പന്തിൽ 51), ഡേവിഡ് മില്ലർ (18 പന്തിൽ 32) എന്നിവരാണ് ഗുജറാത്തിനെ വിജയത്തിലെത്തിച്ചത്. 35 പന്തിൽ 49 റൺസെടുത്ത് ഓപ്പണർ ശുഭ്മൻ ഗില്ലും തിളങ്ങി. മറുപടി ബാറ്റിങ്ങിൽ ഓപ്പണർമാർ മികച്ച തുടക്കമാണ് ഗുജറാത്തിനു നൽകിയത്. നാല് ഓവറിൽ 41 റൺസ് കൂട്ടിച്ചേർത്താണ് ഓപ്പണിങ് കൂട്ടുകെട്ട് പിരിഞ്ഞത്. ശുഭ്മൻ ഗിൽ തകർത്തടിച്ചപ്പോൾ വൃദ്ധിമാൻ സാഹ 10 പന്തിൽ 10 റൺസ് മാത്രമെ നേടിയുള്ളൂ. ആന്ദ്രെ റസ്സലിന്റെ പന്തിൽ ഹർഷിത് റാണ ക്യാച്ചെടുത്താണ് ്സാഹയെ പുറത്താക്കിയത്.

വൺഡൗണായി ഇറങ്ങിയ ഗുജറാത്ത് ക്യാപ്റ്റൻ ഹാർദിക് പാണ്ഡ്യ 20 പന്തിൽ 26 റൺസെടുത്തു പുറത്തായി. അർധസെഞ്ചറിക്ക് ഒരു റൺസ് വേണ്ടപ്പോൾ ശുഭ്മൻ ഗിൽ മടങ്ങി. സുനിൽ നരെയ്ന്റെ പന്തിൽ ആന്ദ്രെ റസ്സലിന്റെ ക്യാച്ചിലാണു ഗില്ലിന്റെ പുറത്താകൽ. മധ്യനിരയിൽ വിജയ് ശങ്കറും ഡേവിഡ് മില്ലറും തകർത്തടിച്ചതോടെ 17.5 ഓവറിൽ ഗുജറാത്ത് വിജയത്തിലെത്തി.

ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ കൊൽക്കത്ത ഏഴു വിക്കറ്റ് നഷ്ടത്തിൽ 179 റൺസെടുത്തു. 39 പന്തുകളിൽനിന്ന് 81 റൺസെടുത്താണ് അഫ്ഗാൻ താരം റഹ്മാനുല്ല ഗുർബാസ് പുറത്തായത്. മികച്ച ഫോമിലുള്ള ജേസൺ റോയ്ക്കു പരുക്കേറ്റതോടെയാണ് പകരക്കാരനായി റഹ്മാനുല്ല ടീമിലെത്തിയത്. ഓപ്പണറായി ഇറങ്ങിയ അഫ്ഗാനിസ്ഥാൻ യുവതാരം ഏഴ് സിക്സുകളും അഞ്ച് ഫോറുകളുമാണു ഗാലറിയിലേക്ക് അടിച്ചുവിട്ടത്.

കൊൽക്കത്ത സ്കോർ 23 ല്‍ നില്‍ക്കെ എൻ. ജഗദീശൻ മുഹമ്മദ് ഷമിയുടെ പന്തിൽ എൽബിഡബ്ല്യു ആയി പുറത്തായി. വൺഡൗണായി ഇറങ്ങിയ ഷാർദൂൽ ഠാക്കൂർ പൂജ്യത്തിന് പുറത്തായി. നേരിട്ട നാലാം പന്തിൽ മോഹിത് ശർമയുടെ ക്യാച്ചിലാണു മടക്കം. 27 പന്തുകളിൽനിന്ന് റഹ്മാനുല്ല ഗുർബാസ് 50 തികച്ചു. വെങ്കടേഷ് അയ്യരെയും (14 പന്തിൽ 11), ക്യാപ്റ്റൻ നിതീഷ് റാണയെയും (മൂന്ന് പന്തിൽ നാല്) പുറത്താക്കി ജോഷ് ലിറ്റിൽ കളി ഗുജറാത്തിന് അനുകൂലമാക്കി.

അഫ്ഗാൻ താരമായ റഹ്മാനുള്ള ഗുർബാസ് മടങ്ങിയത് ഗുജറാത്തിന്റെ അഫ്ഗാൻ താരം നൂർ അഹമ്മദിന്റെ പന്തിൽ മറ്റൊരു അഫ്ഗാൻ കളിക്കാരനായ റാഷിദ് ഖാൻ ക്യാച്ചെടുത്താണ്. അവസാന ഓവറുകളിൽ റിങ്കു സിങ്ങും (20 പന്തിൽ 19), ആന്ദ്രെ റസ്സലും (19 പന്തിൽ 34) പൊരുതി നോക്കിയെങ്കിലും കൊൽക്കത്തയുടെ പോരാട്ടം ഏഴു വിക്കറ്റ് നഷ്ടത്തിൽ 179 റൺസിന് അവസാനിച്ചു. ഗുജറാത്തിനായി മുഹമ്മദ് ഷമി മൂന്നു വിക്കറ്റുകൾ വീഴ്ത്തി. ജോഷ് ലിറ്റിൽ, നൂർ അഹമ്മദ് എന്നിവർ രണ്ടു വിക്കറ്റു വീതവും നേടി.