ന്യൂഡൽഹി: രാജ്യത്തെ ടെലിവിഷൻ ചാനലുകളുടെ പ്രേക്ഷകസംഖ്യ (TRP) നിശ്ചയിക്കുന്ന രീതിയിൽ സുതാര്യതയും വിശ്വാസ്യതയും ഉറപ്പാക്കാൻ ലക്ഷ്യമിട്ട് കേന്ദ്ര വാർത്താവിനിമയ മന്ത്രാലയം പുതിയ റേറ്റിങ് നയം പ്രഖ്യാപിച്ചു. 2014-ലെ മാർഗനിർദേശങ്ങൾക്ക് പകരമായാണ് പരിഷ്കരിച്ച ചട്ടങ്ങൾ നിലവിൽ വരുന്നത്. റേറ്റിങ് ഏജൻസികളുടെ രജിസ്ട്രേഷൻ, പ്രവർത്തനം, ഓഡിറ്റിങ്, മേൽനോട്ടം എന്നിവയിൽ കർശനമായ മാനദണ്ഡങ്ങളാണ് സർക്കാർ മുന്നോട്ടുവെച്ചിരിക്കുന്നത്.
പ്രധാന പരിഷ്കാരങ്ങൾ ഒറ്റനോട്ടത്തിൽ:
- മൂലധന ഇളവ്: റേറ്റിങ് ഏജൻസിയായി രജിസ്റ്റർ ചെയ്യുന്നതിന് ആവശ്യമായ ആസ്തി 20 കോടി രൂപയിൽ നിന്നും 5 കോടി രൂപയായി കുറച്ചു. ഇത് കൂടുതൽ ഏജൻസികൾക്ക് ഈ രംഗത്തേക്ക് വരാൻ അവസരമൊരുക്കും.
- ഡയറക്ടർ ബോർഡ് ഘടന: ഏജൻസികളുടെ ഡയറക്ടർ ബോർഡിൽ കുറഞ്ഞത് 50 ശതമാനം സ്വതന്ത്ര ഡയറക്ടർമാർ ഉണ്ടായിരിക്കണം. ചാനൽ ഉടമകളുമായോ ബ്രോഡ്കാസ്റ്റർമാരുമായോ ബന്ധമുള്ളവർ ബോർഡിൽ ഉണ്ടാകാൻ പാടില്ല.
- സാമ്പിൾ ശേഖരണ വ്യാപ്തി: ഡേറ്റ ശേഖരിക്കുന്ന വീടുകളുടെ എണ്ണം ഘട്ടംഘട്ടമായി വർധിപ്പിക്കും. 18 മാസത്തിനുള്ളിൽ ഇത് 80,000 വീടുകളിലേക്കും, തുടർന്ന് 1,20,000 വീടുകളിലേക്കും വ്യാപിപ്പിക്കണം.
- ഡിജിറ്റൽ സുരക്ഷ: ഡേറ്റാ ശേഖരണം പുതിയ ‘ഡിജിറ്റൽ പേഴ്സണൽ ഡേറ്റാ പ്രൊട്ടക്ഷൻ ആക്ട്’ പ്രകാരമായിരിക്കണം. കേബിൾ, ഡി.ടി.എച്ച് എന്നിവയ്ക്ക് പുറമെ ഒ.ടി.ടി, കണക്റ്റഡ് ടിവി പ്ലാറ്റ്ഫോമുകളെയും ഇതിൽ ഉൾപ്പെടുത്തിയിട്ടുണ്ട്.
- ലാൻഡിങ് പേജ് ഒഴിവാക്കി: ടിവി ഓൺ ചെയ്യുമ്പോൾ ആദ്യം തെളിയുന്ന ചാനലുകളെ (Landing Page) റേറ്റിങ്ങിനായി പരിഗണിക്കില്ല. ഇത് കൃത്രിമമായി റേറ്റിങ് വർധിപ്പിക്കുന്നത് തടയാൻ സഹായിക്കും.
- പരാതി പരിഹാരം: പരാതികൾ പത്ത് ദിവസത്തിനുള്ളിൽ തീർപ്പാക്കാൻ നോഡൽ ഓഫീസറെയും അപ്പീലറ്റ് സംവിധാനത്തെയും നിയമിക്കണം. ചട്ടങ്ങൾ ലംഘിക്കുന്ന ഏജൻസികളുടെ രജിസ്ട്രേഷൻ റദ്ദാക്കുന്നത് ഉൾപ്പെടെയുള്ള ശിക്ഷാനടപടികളും നയത്തിലുണ്ട്.
പൊതുജനഹിതം സംരക്ഷിക്കുന്നതിനൊപ്പം ചാനലുകൾക്കിടയിൽ ആരോഗ്യകരമായ മത്സരം ഉറപ്പാക്കാനും പുതിയ നയം സഹായിക്കുമെന്ന് സർക്കാർ വ്യക്തമാക്കി. ടിവി ചാനലുകൾക്കും ഒടിടി പ്ലാറ്റ്ഫോമുകൾക്കും തങ്ങളുടെ പ്രേക്ഷക ഡേറ്റ വെബ്സൈറ്റുകളിൽ പ്രസിദ്ധീകരിക്കാനും അനുമതി നൽകിയിട്ടുണ്ട്.
The Union Ministry of Information and Broadcasting has introduced a new policy for television rating agencies in India, replacing the outdated 2014 guidelines. The primary goal is to ensure transparency, neutrality, and credibility in how TRPs (Television Rating Points) are calculated.