കൊച്ചി: രാജ്യത്ത് ഇന്ധന വില ഇന്നും കൂടി. പെട്രോളിന് 25 പൈസയും ഡീസലിന് 32 പൈസയുമാണ് ഇന്ന് കൂട്ടിയത്. കൊച്ചിയില് ഇന്ന് പെട്രോള് ലിറ്ററിന് 101.95 രൂപയും ഡീസലിന് 94.90 രൂപയുമാണ് പുതിയ ഇന്ധനവില. തിരുവനന്തപുരത്ത് പെട്രോളിന് 103.93 രൂപയും ഡീസലിന് 96.81 രൂപയുമാണ്. കോഴിക്കോട്ട് പെട്രോളിനും ഡീസലിനും യഥാക്രമം 102.16 രൂപയും 95.11 രൂപയുമാണ്.
നാല് ദിവസം തുടര്ച്ചയായി വര്ധിച്ച ശേഷം ഇന്നലെ വിലയില് മാറ്റമില്ലാതെ തുടര്ന്നിരിന്നു. 21 ദിവസത്തിന് ശേഷമാണ് ഇന്നലെ പെട്രോള് വിലയില് വര്ധനവുണ്ടായത്. സെപ്തംബര് അഞ്ചിനായിരുന്നു ഇതിന് മുമ്പ് പെട്രോള് വിലയില് കുറവുണ്ടായത്.
അന്താരാഷ്ട്ര വിപണിയില് ഇന്ന് ക്രൂഡ് ഓയില് ബാരലിന് 78.24 ഡോളറിലാണ് വ്യാപാരം നടക്കുന്നത്. അതേസമയം ഡോളറിനെതിരേ 74.15 ലാണ് രൂപ വിനിമയം നടത്തുന്നത്. ഭാരത് പെട്രോളിയം, ഇന്ത്യന് ഓയില്, ഹിന്ദുസ്ഥാന് പെട്രോളിയം തുടങ്ങിയ ഇന്ധന കമ്പനികളാണ് ദിവസവും പെട്രോള് ഡീസല് വില പുതുക്കുന്നത്.
അന്താരാഷ്ട്ര വിപണിയിലെ ക്രൂഡ് ഓയില് വിലയും ഡോളര് – രൂപാ വിനിമയ നിരക്കും അടിസ്ഥാനമാക്കിയാണ് ഇന്ധന വില നിശ്ചയിക്കുന്നത്. ഓരോ ദിവസവും രാവിലെ 6 മണി മുതലാണ് പുതിയ ഇന്ധന നിരക്കുകള് പ്രാബല്യത്തില് വരുന്നത്. അഞ്ച് സംസ്ഥാനങ്ങളിലെ നിയമ സഭാ തെരഞ്ഞെടുപ്പ് ഫലം പുറത്തു വന്നതിന് ശേഷം മെയ് നാല് മുതലാണ് എണ്ണ കമ്പനികള് ഇന്ധന നിരക്ക് വര്ധന പുനരാരംഭിച്ചത്.
കേരളം, രാജസ്ഥാന്, മധ്യപ്രദേശ്, മഹാരാഷ്ട്ര, ആന്ധ്രാപ്രദേശ്, തെലങ്കാന, കര്ണാടക, ഒഡീഷ, തമിഴ്നാട്, ബിഹാര്, പഞ്ചാബ് തുടങ്ങി 15 സംസ്ഥാനങ്ങളിലെയും ഉത്തര്പ്രദേശിലെയും ഹരിയാനയിലെയും രണ്ട് ജില്ലകളിലും പെട്രോള് വില ലിറ്ററിന് 100 രൂപയ്ക്ക് മുകളിലെത്തിയിട്ടുണ്ട്. ഡല്ഹി, ജമ്മു കശ്മീര്, ലഡാക്ക് എന്നിവയുള്പ്പെടെ നാല് കേന്ദ്രഭരണ പ്രദേശങ്ങളിലെ പെട്രോള് വിലയും ലിറ്ററിന് 100 രൂപയ്ക്ക് മുകളിലാണ്. പശ്ചിമ ബംഗാള്, കേരളം, ആസ്സാം, തമിള് നാട്, പുതുച്ചേരി തുടങ്ങിയ സംസ്ഥാനങ്ങളിലെയും കേന്ദ്ര ഭരണ പ്രദേശങ്ങളിലെയും നിയമ സഭാ തെരഞ്ഞെടുപ്പുകള് പൂര്ത്തിയായതിന് ശേഷം മെയ് 4 മുതല് രാജ്യത്തെ ഇന്ധന വില തുടര്ച്ചയായി മുകളിലേക്ക് തന്നെയായിരുന്നു.
ഒന്നാം തീയതി പാചക വാതക വിലയും വര്ധിച്ചിരുന്നു. ഗാര്ഹിക ആവശ്യത്തിനുള്ള സിലിണ്ടറിന് 25.50 രൂപയാണ് വര്ധിപ്പിച്ചത്. വാണിജ്യ ആവശ്യങ്ങള്ക്ക് ഉപയോഗിക്കുന്ന സിലിണ്ടറുകള്ക്ക് 73.50 രൂപയും വര്ധിപ്പിച്ചു. പുതുക്കിയ നിരക്ക് പ്രകാരം ഗാര്ഹിക സിലിണ്ടറിന് 892 രൂപയും വാണിജ്യ സിലിണ്ടറിന് 1692.50 രൂപയുമാണ്. 15 ദിവസത്തിനുള്ളില് ഗാര്ഹിക സിലിണ്ടറിന് 50 രൂപയാണു വര്ധിച്ചിരിക്കുന്നത്. കഴിഞ്ഞമാസം 15നും ഗാര്ഹിക ആവശ്യങ്ങള്ക്കുള്ള പാചകവാതക സിലിണ്ടറുകള്ക്ക് 25 രൂപ വര്ധിപ്പിച്ചിരുന്നു.