സ്വന്തം ശരീരം മാര്‍ക്കറ്റ് ചെയ്ത് ഉദ്ഘാടനങ്ങള്‍ക്ക് പോകുന്ന നടിമാര്‍ക്ക് എതിരെ ഫറ ഷിബ്ല; അത് വളരെ മോശം ഒരു ട്രെന്റ് ആണ്
കൊച്ചി:കക്ഷി അമ്മിണിപ്പിള്ള എന്ന സിനിമയിലൂടെ പ്രേക്ഷകര്‍ക്ക് പ്രിയങ്കരിയായിട്ടുള്ള നടിയാണ് ഫറ ഷിബ്ല. പിന്നീട് ഷിബ്ല ചെയ്ത കഥാപാത്രങ്ങളില്‍ ഓരോന്നിലും ഒരു വ്യത്യസ്തത ഉണ്ടായിരുന്നു. വിനയ് ഫോര്‍ട്ടിനൊപ്പമുള്ള സോമന്‍രെ കൃതാവ് ആണ് ഷിബ്ലയുടെ പുതിയ ചിത്രം.
സിനിമയുടെ പ്രമോഷനുമായി ബന്ധപ്പെട്ട അഭിമുഖത്തില്‍ സംസാരിക്കവെയാണ്, സിനിമയിലെ സ്ത്രീ പ്രാധാന്യത്തെ കുറിച്ചും, നായികാ സങ്കല്‍പത്തെ കുറിച്ചും, സ്ത്രീ സരക്ഷയെ കുറിച്ചുമൊക്കെ നടി സംസാരിച്ചത്. സൈന സൗത്തിന് ഷിബ്ല നല്‍കിയ അഭിമുഖത്തില്‍ പറഞ്ഞ കാര്യങ്ങള്‍ വൈറലാവുന്നു.
ഇപ്പോള്‍ മലയാള സിനിമയില്‍ സോ കോള്‍ഡ് ഹീറോയിന്‍ സങ്കല്‍പം ഇല്ല എന്നാണ് തനിക്ക് തോന്നിയിട്ടുള്ളത് എന്ന് ഷിബ്ല പറയുന്നു. ബോളിവുഡില്‍ എല്ലാം സൗന്ദര്യം നിലനിര്‍ത്തുന്നതിന് വേണ്ടി കോടികളാണ് നായികമാര്‍ മുടക്കുന്നത്. അങ്ങനെയുണ്ടെങ്കില്‍ മാത്രമാണ് അവര്‍ക്ക് നിലനില്‍പ്. പക്ഷെ മലയാള സിനിമയില്‍ അഭിനേതാക്കളുടെ ക്രാഫ്റ്റ് മനസ്സിലാക്കി കഥാപാത്രങ്ങള്‍ നല്‍കുന്ന ട്രെന്റ് കണ്ടുവരുന്നുണ്ട്. അത് കൂടാതെ മൊത്തത്തില്‍ ഒരു പോസിറ്റീവ് അന്തരീക്ഷമാണ് മലയാള സിനിമയില്‍ എന്ന് ഫറ പറഞ്ഞു.
മുന്‍പൊക്കെ ഓഡിഷന് ഹോട്ടല്‍ മുറികളിലായിരുന്നു വിളിച്ചു വരുത്തിയിരുന്നത്. ആ കാലത്താണ് ഒരുപാട് തെറ്റായ കാര്യങ്ങള്‍ നടന്നിട്ടുണ്ടാവുക. അത് കരുതി സിനിമയെ ഭയന്ന പെണ്‍കുട്ടികളും ഉണ്ടാവാം. പക്ഷെ ഇന്ന് അത് തീര്‍ത്തും വ്യത്യസ്തമാണ്. വളരെ പ്രൊഫഷണലായിട്ടാണ് ഓഡിഷന്‍സ് എല്ലാം നടന്നുവരുന്നത്.
ഇപ്പോള്‍ നായികയാകാന്‍ ഒരു പ്രത്യേക ബോഡി ഷേപ്പ് വേണം എന്നൊന്നും സംവിധായകരോ എഴുത്തുകാരോ ഡിമാന്റ് ചെയ്യുന്നില്ല. കഥാപാത്രങ്ങള്‍ക്ക് വേണ്ടി ശരീരത്തില്‍ മാറ്റം വരുത്തിയാലും, നിലനില്‍പിന് വേണ്ടി സ്വയം മാറാത്ത ഒരുപാട് നടിമാരുണ്ട്. ചെയ്യുന്ന തൊഴിലിനെ മാനിച്ച്, അതിന് വേണ്ടി എല്ലാ ദിവസവും പ്രാക്ടീസ് ചെയ്യുന്ന, സ്വയം മോള്‍ഡ് ചെയ്ത് എടുക്കുന്ന ഒരുപാട് ആര്‍ട്ടിസ്റ്റുകളെ എനിക്കറിയാം. പക്ഷെ അതിനിടയില്‍ ചിലര്‍ ശരീരം മാര്‍ക്കറ്റ് ചെയ്യാന്‍ ശ്രമിക്കുന്നതിനോട് എനിക്ക് യോജിപ്പില്ല.
ഇപ്പോള്‍ കണ്ടുവരുന്ന ഒരു ട്രെന്റ് ആണത്. അഭിനയം ഒരു ക്രാഫ്റ്റ് ആണ്, അത് ശരീര പ്രദര്‍ശനം അല്ല. സ്വന്തം ശരീരം മാര്‍ക്കറ്റ് ചെയ്ത് ഉദ്ഘാടനങ്ങളില്‍ പങ്കെടുക്കുന്ന നടിമാര്‍ വളരെ മോശം ഒരു ട്രെന്റാണ് സമൂഹത്തിന് പരിചയപ്പെടുത്തുന്നത്. ഇങ്ങനെ പോയാല്‍ അവസരം കിട്ടും എന്നും, ഇതാണ് സിനിമ എന്നുമുള്ള ഒരു ട്രെന്റ് കൊണ്ടുവരുന്നത് തീര്‍ത്തും മോശമായ ഒരു കാര്യമാണ്- ഷിബ്ല പറഞ്ഞു
