ന്യൂഡല്‍ഹി: ലോക്ക് ഡൗണിനിടയില്‍ ഓണ്‍ലൈന്‍ വ്യാപാരത്തിന് ഇളവ് നല്‍കി കേന്ദ്ര സര്‍ക്കാര്‍. ഏപ്രില്‍ 20ന് ശേഷം ഓണ്‍ലൈന്‍ വ്യാപാരം സാധാരണ നിലയിലാക്കാനാണ് നീക്കം.
ഇതിന്റെ ഭാഗമായി ഇലക്ട്രോണിക്സ് ഉപത്ന്നങ്ങള്‍ ഉള്‍പ്പടെയുള്ളവ വില്‍ക്കുന്നതിന് ഇ-കൊമേഴ്‌സ് സ്ഥാപനങ്ങള്‍ക്ക് കേന്ദ്രസര്‍ക്കാര്‍ അനുമതി നല്‍കിയിട്ടുണ്ട്. മൊബൈല്‍ ഫോണ്‍, ടെലിവിഷന്‍, റഫ്രിജറേറ്റര്‍, ലാപ് ടോപ്, സ്റ്റേഷനറി വസ്തുക്കള്‍ എന്നിവ ആമസോണ്‍, ഫ്‌ളിപ്കാര്‍ട്ട്, സ്‌നാപ്ഡീല്‍ തുടങ്ങിയ ഇ-കൊമേഴ്‌സ് പോര്‍ട്ടലുകള്‍ വഴി ഏപ്രില്‍ 20 മുതല്‍ വിതരണം തുടങ്ങും.
കൊവിഡ് പ്രതിരോധപ്രവര്‍ത്തനങ്ങളുടെ ഭാഗമായി മെയ് മൂന്നുവരെ അടച്ചിടല്‍ നീട്ടിയതിനെതുടര്‍ന്ന് പുറത്തിറക്കിയ മാര്‍ഗനിര്‍ദേശങ്ങളില്‍ ഭക്ഷണം, മരുന്ന്, മെഡിക്കല്‍ ഉപകരണങ്ങള്‍, അവശ്യവസ്തുക്കള്‍ എന്നിവമാത്രം വിതരണം ചെയ്യാനായിരുന്നു നേരത്തെ ഇ-കൊമേഴ്‌സ് കമ്പനികള്‍ക്ക് അനുമതി ലഭിച്ചിരുന്നത്.
എന്നാല്‍ നേരത്തെ പുറത്തിറക്കിയ മാര്‍ഗനിര്‍ദേങ്ങള്‍ക്ക് വ്യക്തത വരുത്തിക്കൊണ്ടാണ് ആഭ്യന്തര മന്ത്രാലയത്തിന്റെ പുതിയ നിര്‍ദേശം ഇപ്പോള്‍ പുറത്തിറക്കിയിരിക്കുന്നത്. തളര്‍ച്ചയിലായ വാണിജ്യ-വ്യവസായ സ്ഥാപനങ്ങള്‍ക്ക് ഉണര്‍വേകാനാണ് സര്‍ക്കാരിന്റെ നടപടിയിലൂടെ ഉദ്ദേശിക്കുന്നത്.
