ന്യൂയോര്ക്ക്: ലോകത്തിലെ ഏറ്റവും വലിയ കോടീശ്വരനായ ഇലോണ് മസ്ക്, ചരിത്രത്തില് ഇതുവരെ ആരും കൈവരിക്കാത്ത ഒരു സാമ്പത്തിക നേട്ടത്തിലേക്ക് കുതിക്കുകയാണ്. പ്രവചനങ്ങള് യാഥാര്ത്ഥ്യമാവുകയാണെങ്കില്, അദ്ദേഹം ലോകത്തിലെ ആദ്യത്തെ ‘ട്രില്യണയര്’ അഥവാ ഒരു ലക്ഷം കോടി ഡോളര് ആസ്തിയുള്ളയാള് എന്ന റെക്കോര്ഡ് സ്വന്തമാക്കും. നിലവിലെ വിനിമയ നിരക്കനുസരിച്ച് ഇത് ഏകദേശം ഏതാണ്ട് 95 ലക്ഷം കോടി രൂപക്ക് തുല്യമാണ്. ഒരു ബാങ്ക് അക്കൗണ്ടില് കിടക്കുന്ന പണം പോലെയല്ല മസ്കിന്റെ ഈ മഹാസമ്പത്ത്. അദ്ദേഹത്തിന്റെ ഉടമസ്ഥതയിലുള്ള വിവിധ കമ്പനികളുടെ ഓഹരി പങ്കാളിത്തത്തെ അടിസ്ഥാനമാക്കിയുള്ളതാണ് ഈ ആസ്തികള്.
അതിനാല് തന്നെ ഇതിന്റെ മൂല്യം വിപണിയിലെ കയറ്റിറക്കങ്ങളെ ആശ്രയിച്ചിരിക്കുന്നു. മസ്കിന്റെ സമ്പത്തിന്റെ ഭൂരിഭാഗവും വരുന്നത് ഇലക്ട്രിക് കാര് നിര്മ്മാതാക്കളായ ടെസ്ലയില് നിന്നാണ്. നിലവില് ടെസ്ലയിലുള്ള അദ്ദേഹത്തിന്റെ ഓഹരികളുടെ മൂല്യം 273 ബില്യണ് ഡോളറാണ്. കൂടാതെ സ്പേസ് എക്സിന്റെ വരാനിരിക്കുന്ന ഐപിഒ അദ്ദേഹത്തിന്റെ ആസ്തിയിലേക്ക് 841 ബില്യണ് ഡോളര് കൂടി കൂട്ടിച്ചേര്ക്കുമെന്നാണ് സിഎന്എന് റിപ്പോര്ട്ട് ചെയ്യുന്നത്.
ഒരു ട്രില്യണ് ഡോളര് എന്ന വലിയ സംഖ്യയെ ലളിതമായി പറഞ്ഞാല്, അത് ലോകത്തിലെ ഭൂരിഭാഗം രാജ്യങ്ങളുടെയും ആകെ സമ്പദ്വ്യവസ്ഥയേക്കാള് വലുതാണ്. ലോകത്തിലെ പ്രമുഖ രാജ്യങ്ങളുടെ വാര്ഷിക സാമ്പത്തിക ഉല്പ്പാദനവുമായി താരതമ്യം ചെയ്യുമ്പോള് മാത്രമാണ് ഇലോണ് മസ്കിന്റെ വരാനിരിക്കുന്ന ഈ സമ്പത്തിന്റെ യഥാര്ത്ഥ വ്യാപ്തി നമുക്ക് മനസ്സിലാക്കാന് സാധിക്കുക. ഏതാനും ചില വികസിത രാജ്യങ്ങള്ക്ക് മാത്രമാണ് ഇലോണ് മസ്കിന്റെ പ്രവചിക്കപ്പെട്ട സമ്പത്തിനേക്കാള് വലിയ സമ്പദ്വ്യവസ്ഥയുള്ളത്.
വികസിത രാജ്യങ്ങളായ തായ്വാന് , അയര്ലന്ഡ്, സ്വീഡന് , സിംഗപ്പൂര് തുടങ്ങിയ രാജ്യങ്ങളുടെ ജിഡിപിയേക്കാള് മുകളിലാണ് മസ്കിന്റെ ഏകദേശ ആസ്തി. അതായത്, ഈ രാജ്യങ്ങളുടെയെല്ലാം വാര്ഷിക വരുമാനത്തേക്കാള് എത്രയോ അധികമാണ് ഈ ഒറ്റ മനുഷ്യന്റെ സമ്പാദ്യം. ആഗോള സാമ്പത്തിക തലസ്ഥാനമായ, വാള്സ്ട്രീറ്റ് ഉള്പ്പെടെയുള്ള പ്രമുഖ കോര്പ്പറേറ്റുകളുടെ ആസ്ഥാനമായ മാന്ഹട്ടന്റെ സാമ്പത്തിക ഉല്പ്പാദനവുമായി തുലനം ചെയ്യാവുന്നതാണ് മസ്കിന്റെ ആസ്തി. ഫെഡറല് റിസര്വിന്റെ 2024-ലെ കണക്കുകള് പ്രകാരം മാന്ഹട്ടന്റെ ആകെ സമ്പദ്വ്യവസ്ഥ ഏകദേശം ഒരു ട്രില്യണ് ഡോളറായിരുന്നു.
ഇതിനേക്കാള് മുകളിലാണ് ഇപ്പോള് മസ്കിന്റെ ആസ്തി പ്രവചിക്കപ്പെട്ടിരിക്കുന്നത്. സാങ്കേതിക ലോകത്തെ മറ്റ് പ്രമുഖ ശതകോടീശ്വരന്മാരുടെ ആകെ സ്വത്തുമായി താരതമ്യം ചെയ്യുമ്പോഴാണ് മസ്കിന്റെ കുതിപ്പ് എത്രത്തോളം പ്രകടമാണെന്ന് വ്യക്തമാകുക. ആമസോണ് സ്ഥാപകന് ജെഫ് ബെസോസ്, ഒറാക്കിള് സ്ഥാപകന് ലാറി എലിസണ്, ഗൂഗിളിന്റെ സഹസ്ഥാപകരായ ലാറി പേജ്, സെര്ജി ബ്രിന് എന്നിവരുടെയെല്ലാം ആകെ സമ്പത്ത് ചേര്ത്തുവെച്ചാല് ഏകദേശം 1.09 ട്രില്യണ് ഡോളര് വരും. ഈ നാല് പ്രമുഖരുടെ ആകെ സമ്പത്തിനോടൊപ്പമാണ് മസ്ക് ഒറ്റയ്ക്ക് എത്തുന്നത്.
അമേരിക്കയിലെ ഏറ്റവും വലിയ മൂന്നാമത്തെ നഗരവും എണ്ണ-വാതക വ്യവസായങ്ങളുടെ പ്രധാന കേന്ദ്രവുമായ ഹൂസ്റ്റണിലെ മുഴുവന് വസ്തുവകകളുടെയും മൂല്യത്തേക്കാള് കൂടുതലാണ് ഇലോണ് മസ്കിന്റെ ഈ പ്രവചിത ആസ്തി. സമീപകാലത്തെ കണക്കുകള് പ്രകാരം ഹൂസ്റ്റണ് നഗരത്തിലെ എല്ലാ പാര്പ്പിട-വാണിജ്യ സമുച്ചയങ്ങളുടെയും ആകെ മൂല്യം 879 ബില്യണ് ഡോളര് മാത്രമാണ്. കായിക ലോകത്തെ സാമ്രാജ്യങ്ങള് മുഴുവന് വിലയ്ക്കു വാങ്ങാന് മസ്കിന്റെ ഈ ഒരൊറ്റ ട്രില്യണ് ഡോളര് സമ്പത്ത് മതിയാകും.
ഫോബ്സിന്റെ കണക്കനുസരിച്ച് ലോകത്തിലെ ഏറ്റവും മൂല്യമുള്ള ആദ്യത്തെ 50 കായിക ടീമുകളുടെ ആകെ മൂല്യം 353 ബില്യണ് ഡോളര് മാത്രമാണ്. അതായത് മസ്കിന്റെ ആസ്തിയുടെ മൂന്നിലൊന്ന് പോലുമാകില്ല ഇത്. ലോകത്തിലെ പ്രമുഖ പ്രൊഫഷണല് സ്പോര്ട്സ് ടീമുകളെ മുഴുവന് സ്വന്തമാക്കാന് ഈ പണം ധാരളമാണ്. തന്റെ ബിസിനസ്സ് തന്ത്രങ്ങളിലൂടെയും സാങ്കേതിക വിപ്ലവത്തിലൂടെയും ലോകത്തെ വിസ്മയിപ്പിക്കുന്ന മസ്ക്, സാമ്പത്തിക ലോകത്തും പുതിയ ചരിത്രമെഴുതാന് ഒരുങ്ങുകയാണ്.
വിപണിയിലെ അനുകൂല സാഹചര്യങ്ങള് തുടരുകയാണെങ്കില് ചരിത്രത്തിലെ ആദ്യത്തെ ട്രില്യണയര് എന്ന പദവി ഇലോണ് മസ്കിന് സ്വന്തമാകും. അതേസമയം, പേപ്പര് മൂല്യത്തിലുള്ള ഈ സ്വത്ത് വിപണിയിലെ മാറ്റങ്ങള്ക്ക് വിധേയമാണെങ്കിലും, ഇത് നല്കുന്ന സാമ്പത്തിക സ്വാധീനം ചെറുതല്ല. ആഗോള വിപണിയില് ടെസ്ലയും സ്പേസ് എക്സും നടത്തുന്ന കുതിപ്പ് വരും ദിവസങ്ങളിലും മസ്കിന്റെ ആസ്തി വര്ദ്ധിപ്പിക്കുമെന്നാണ് സാമ്പത്തിക വിദഗ്ധരുടെ വിലയിരുത്തല്.
Elon Musk is rapidly on track to become the world’s first trillionaire, with his net worth projected to touch a staggering 95 lakh crore rupees. His total wealth surpasses the combined assets of top tech giants like Amazon’s Jeff Bezos and Google’s founders, positioning him far ahead in the global wealth race. Remarkably, Musk’s individual fortune now exceeds the total GDP of developed nations like Taiwan and Singapore, showcasing his monumental financial dominance.