ഇടുക്കി : ജലനിരപ്പ് വീണ്ടും ഉയരുന്ന സാഹചര്യത്തിൽ മുല്ലപ്പെരിയാറിലെ മുഴുവൻ സ്പിൽവേ ഷട്ടറുകളും തുറന്നു.നിലവില് തുറന്നിരിക്കുന്ന 10 ഷട്ടറുകള് ( V1,V2, V3, V4, V5, V6,V7,V8, V9 &V10) കൂടാതെ അണക്കെട്ടിന്റെ R1, R2, R3 എന്നീ ഷട്ടറുകള് കൂടിയാണ് 30 സെന്റി മീറ്റര് തുറക്കുക. നിലവിൽ സെക്കന്റിൽ 8741 ഘനയടി വെള്ളമാണ് പുറത്തേക്ക് ഒഴുക്കി വിടുന്നത്. കൂടുതൽ വെള്ളം തുറന്ന് വിട്ടിട്ടും അണക്കെട്ടിലെ ജലനിരപ്പിൽ കാര്യമായ കുറവില്ലെന്നത് ആശങ്ക സൃഷ്കിക്കുകയാണ്. ഈ സാഹചര്യത്തിൽ ഷട്ടറുകൾ കൂടുതൽ ഉയർത്തി കൂടുതൽ വെള്ളം പുറത്തേക്ക് ഒഴുക്കാനാണ് നീക്കം.
ഇടമലയാര്
കോതമംഗലം: ഇടമലയാര് അണക്കെട്ടില് റൂള് കര്വ് പിന്നിട്ടതിനാല് ഡാമിന്റെ രണ്ട് ഷട്ടറുകള് ഉയര്ത്തി. ഡാമിന്റെ സ്പില്വേയുടെ രണ്ട്, മൂന്ന് ഷട്ടറുകളാണ് തുറന്നത്. 25 സെന്റിമീറ്റര് വീതം ഉയര്ത്തി 50 മുതല് 100 ക്യുമെക്സ് (സെക്കന്ഡില് അമ്പതിനായിരം മുതല് ഒരു ലക്ഷം വരെ ലിറ്റര്) വെള്ളമാണ് ഒഴുക്കുന്നത്.
തിങ്കളാഴ്ച 45 എം.സി.എം. (മില്യണ് ക്യുബിക് മീറ്റര്) വെള്ളമാണ് ഡാമിലെത്തിയത്. വൈകുന്നേരം ഡാമിലെ ജലനിരപ്പ് 163.40 മീറ്ററായിരുന്നു. ഇടമലയാര് സ്പില്വേയ്ക്ക് നാല് ഷട്ടറുകളാണുള്ളത്. ജലനിരപ്പ് റൂള് കര്വില്നിന്ന് താഴ്ന്നില്ലെങ്കില് മറ്റ് ഷട്ടറുകള് കൂടി തുറക്കും. ഇപ്പോള് ഡാമിന്റെ വൃഷ്ടിപ്രദേശത്ത് മഴയും നീരൊഴുക്കും ശക്തമാണ്.
ഇടമലയാര് അണക്കെട്ടില്നിന്ന് ജലമൊഴുക്കുന്ന സാഹചര്യത്തില് ഉച്ചയോടെ പെരിയാറിലെ ജലനിരപ്പ് ചെറിയ തോതില് ഉയരാന് സാധ്യതയുണ്ടെന്ന് വിലയിരുത്തല്. ആശങ്കപ്പെടേണ്ടതില്ലെങ്കിലും പെരിയാര് തീരത്ത് ജാഗ്രത പുലര്ത്തണമെന്ന് ജില്ലാ കളക്ടര് രേണുരാജ് അറിയിച്ചു.
ഇടുക്കിയില്നിന്ന് ചൊവ്വാഴ്ച 500 ക്യുമെക്സ് ജലം പുറത്തേക്ക് ഒഴുക്കുമെന്നാണ് സൂചന. ഇടമലയാറില്നിന്ന് 50 മുതല് 100 ക്യുമെക്സ് വരെ ജലം പെരിയാറിലേക്ക് ഒഴുക്കും. കാലാവസ്ഥ റിപ്പോര്ട്ട് പ്രകാരം ജില്ലയില് അടുത്ത മൂന്നു ദിവസവും ഗ്രീന് അലര്ട്ടാണ്. മഴ മാറിനില്ക്കുന്ന സാഹചര്യത്തില് ഡാമുകളില്നിന്നുള്ള വെള്ളം ഉള്ക്കൊള്ളാന് പെരിയാറിനാകുമെന്ന് ജലസേചന വകുപ്പ് അധികൃതര് പറഞ്ഞു.
ഇടുക്കിയില്നിന്ന് കൂടുതല് വെള്ളം എത്തിയ പശ്ചാത്തലത്തില് ലോവര് പെരിയാര് ഡാമിന്റെ രണ്ട് ഷട്ടര് കൂടി തുറന്നിട്ടുണ്ട്. ഇടുക്കിയുടെ ചെറുതോണി അണക്കെട്ടില്നിന്ന് സെക്കന്ഡില് 2.60 ലക്ഷം ലിറ്റര് (260 ക്യുമെക്സ്) വെള്ളമാണ് ലോവര് പെരിയാര് ഡാമിലെത്തുന്നത്. ഭൂതത്താന്കെട്ട് അണക്കെട്ടിന്റെ മുഴുവന് ഷട്ടറും തുറന്നിരിക്കുകയാണ്. ഭൂതത്താന്കെട്ടില് 28.40 മീറ്ററാണ് തിങ്കളാഴ്ച വൈകീട്ടത്തെ ജലനിരപ്പ്. ഭൂതത്താന്കെട്ട് ഡാമിലൂടെ പെരിയാറിലേക്ക് സെക്കന്ഡില് 12 ലക്ഷം ലിറ്റര് (1200 ക്യുമെക്സ്) വെള്ളമാണ് ഒഴുക്കുന്നത്.
കൺട്രോൾ റൂം
മുല്ലപെരിയാർ ഡാം ഷട്ടറുകൾ എല്ലാം തുറന്ന സാഹചര്യത്തിൽ മഞ്ചുമലയിൽ വില്ലേജ് ഓഫീസ് ആസ്ഥാനമായി 24X7 അടിസ്ഥാനത്തിൽ പ്രവർത്തിക്കുന്ന പ്രത്യേക കൺട്രോൾ റും ജില്ലാ ഭരണകൂടം സജ്ജീകരിച്ചിട്ടുണ്ട്. ഫോൺ നമ്പർ 04869-253362, മൊബൈൽ 8547612910 അടിയന്തിര സാഹചര്യങ്ങളിൽ താലൂക്ക് കൺട്രോൾ റൂം നമ്പർ 04869-232077, മൊബൈൽ 9447023597 എന്നിവയും പൊതുജനങ്ങൾക്ക് ഉപയോഗപ്പെടുത്താം.