തിരുവനന്തപുരം: സ്വപ്ന സുരേഷിനെ ചോദ്യം ചെയ്യാന് ഇ.ഡി സംഘം അട്ടക്കുളങ്ങര ജയിലിലെത്തി. നാല് ഉദ്യോഗസ്ഥരടങ്ങുന്ന സംഘമാണ് എത്തിയത്. സ്വപ്ന സുരേഷിനെയും സരിത്തിനെയും ചോദ്യം ചെയ്യാന് എന്ഫോഴ്സ്മെന്റ് ഡയറക്ടറേറ്റിന് അനുമതി ലഭിച്ചിരുന്നു. ജയില് ഉദ്യോഗസ്ഥരുടെ സാന്നിധ്യം പാടില്ലെന്ന ഇ ഡിയുടെ ആവശ്യം കോടതി അംഗീകരിച്ചു.
ജയില് സൂപ്രണ്ടിന്റെ മേല്നോട്ടത്തില് സ്വപ്നയെയും സരിത്തിനെയും ഇ ഡിക്ക് ചോദ്യം ചെയ്യാം. പക്ഷെ ചോദ്യം ചെയ്യുന്നിടങ്ങളില് ജയില് അധികൃതരുടെ സാന്നിധ്യം പാടില്ലെന്നും കോടതി പ്രത്യേകം നിര്ദേശിച്ചു.
രാവിലെ 10 മണി മുതല് 4 മണി വരെ തുടര്ച്ചയായി മൂന്ന് ദിവസമാണ് ചോദ്യം ചെയ്യാന് അനുമതി നല്കിയിരിക്കുന്നത്. ചോദ്യം ചെയ്യുന്നതിനിടെ പ്രതികളെ മാനസികമായി പീഡിപ്പിക്കരുതെന്ന നിര്ദേശവും കോടതി ഉത്തരവിലുണ്ട്. ഇന്നും നാളെയും മറ്റന്നാളുമായാണ് എന്ഫോഴ്സ്മെന്റ് ചോദ്യം ചെയ്യല്.