കണ്ണൂർ: സിപിഐഎം പരിപാടികളിൽ നിന്ന് വിട്ടുനിൽക്കുന്നുവെന്ന് ആരോപണങ്ങൾ ഉയരുന്നതിനിടെ പരിഭവം മറച്ചുവെക്കാതെ ഇ പി ജയരാജൻ. പ്രത്യയ ശാസ്ത്രപരമായി തനിക്ക് പ്രശ്നങ്ങളില്ല. താൻ കൂടി ഉൾപ്പെട്ടതാണ് നേതൃത്വമെന്നും ഇ പി ജയരാജൻ പറഞ്ഞു.
പലരുടെയും ആഗ്രഹങ്ങൾക്കനുസരിച്ച് എത്താൻ കഴിയില്ല. പരിഭവവും പ്രശ്നങ്ങളുമില്ലാത്ത മനുഷ്യരുണ്ടോയെന്നും ഇ പി ജയരാജൻ ചോദിച്ചു. കോഴിക്കോട് നടന്ന സിപിഐഎം സെമിനാറിൽ ഇ പി ജയരാജൻ പങ്കെടുത്തിരുന്നില്ല. അദ്ദേഹത്തിന്റെ അസാന്നിദ്ധ്യം ചർച്ചയായിരുന്നു.
രമേശ് ചെന്നിത്തലയ്ക്കുള്ള മറുപടിയും ഇപി നൽകി. രമേശ് ചെന്നിത്തല എത്ര നാൾ കോൺഗ്രസിൽ ഉണ്ടാവുമെന്ന് നോക്കണമെന്ന് അദ്ദേഹം പരിഹസിച്ചു. സെമിനാറിൽ നിന്ന് വിട്ടുനിന്നതിൽ, ഇ പി ജയരാജൻ എത്ര നാൾ സിപിഐഎമ്മിലുണ്ടാകുമെന്നാണ് കഴിഞ്ഞ ദിവസം ചെന്നിത്തല പ്രതികരിച്ചത്.
ഇതിന് മറുപടി നൽകുകയായിരുന്നു ഇപി. മുന്നണി യോഗം ആവശ്യത്തിന് ചേരുന്നുണ്ട്. മുഖ്യമന്ത്രിയെ കണ്ടതിൽ പ്രത്യേകതയില്ല. തിരുവനന്തപുരത്ത് പോയാൽ മുഖ്യമന്ത്രിയെ കാണും. മുഖ്യമന്ത്രിയുമായുളള ചർച്ചയിൽ വിവാദങ്ങൾ ചർച്ചയായില്ല.
ആരും ക്ഷണിച്ചിട്ടല്ല തങ്ങൾ സെമിനാറിനെത്തിയതെന്ന് എം വി ഗോവിന്ദൻ കഴിഞ്ഞ ദിവസം പറഞ്ഞിരുന്നു. ഇതേ കുറിച്ച് ചോദിച്ചപ്പോൾ എം വി ഗോവിന്ദൻ പറഞ്ഞതിന്റെ അർത്ഥം എം വി ഗോവിന്ദനോട് തന്നെ ചോദിക്കണമെന്നായിരുന്നു ഇപിയുടെ മറുപടി.
താൻ ഒരു വ്യാഖ്യാനത്തിനുമില്ല. കോഴിക്കോട്ടെ പരിപാടി താൻ നിർബന്ധമായി പങ്കെടുക്കേണ്ടതല്ല. വിമർശിക്കുന്നവർക്ക് വിമർശിക്കാം. വിമർശിക്കുന്നവരോട് പ്രശ്നമില്ല. കോഴിക്കോട്ടെ സെമിനാറിൽ എല്ലാവരും പങ്കെടുക്കേണ്ട കാര്യമില്ല. പിബി അംഗമായ എം എ ബേബി, എ വിജയരാഘവൻ എന്നിവർ പങ്കെടുത്തിട്ടില്ലല്ലോ എന്നും ഇ പി ജയരാജൻ ചോദിച്ചു.