കൊച്ചി: മലയാള സിനിമാ ചരിത്രത്തിൽ വീണ്ടുമൊരു സുവർണ്ണ അധ്യായം കുറിച്ച് മോഹൻലാൽ-ജീത്തു ജോസഫ് (Mohanlal-Jeethu Joseph) കൂട്ടുകെട്ടിന്റെ ‘ദൃശ്യം 3’ (Drishyam 3). റിലീസ് ചെയ്ത് വെറും ഏഴ് ദിവസങ്ങൾക്കുള്ളിൽ ചിത്രം ആഗോള ബോക്സോഫീസിൽ നിന്നും 200 കോടി രൂപയുടെ തകർപ്പൻ കളക്ഷൻ സ്വന്തമാക്കി. ഇതോടെ ഏറ്റവും വേഗത്തിൽ 200 കോടി ക്ലബിൽ ഇടംപിടിക്കുന്ന പ്രമുഖ ഇന്ത്യൻ ചിത്രങ്ങളുടെ പട്ടികയിലേക്ക് ‘ദൃശ്യം 3’ ഉം തിരഞ്ഞെടുക്കപ്പെട്ടു. ‘എമ്പുരാൻ’, ‘തുടരും’ എന്നീ മെഗാ ഹിറ്റ് ചിത്രങ്ങൾക്ക് ശേഷം ഈ അപൂർവ്വ നേട്ടം കൈവരിക്കുന്ന മൂന്നാമത്തെ മോഹൻലാൽ ചിത്രമെന്ന ഖ്യാതിയും ഇതോടെ ജോർജുകുട്ടിയുടെ മൂന്നാം അധ്യായം സ്വന്തമാക്കി.
തന്റെ ഔദ്യോഗിക സോഷ്യൽ മീഡിയ അക്കൗണ്ടുകളിലൂടെ 200 കോടി കളക്ഷൻ പോസ്റ്റർ പങ്കുവെച്ചുകൊണ്ട് നടൻ മോഹൻലാൽ ആഗോള സിനിമാ പ്രേക്ഷകർക്ക് നന്ദി അറിയിച്ചു. “മൂന്ന് സിനിമകൾ. മൂന്ന് അധ്യായങ്ങൾ. അഭേദ്യമായ ഒരു ബന്ധം. ജോർജ്ജ്കുട്ടിക്കും കുടുംബത്തിനും ഒപ്പമുണ്ടായിരുന്നതിന് എല്ലാവർക്കും ഹൃദയം നിറഞ്ഞ നന്ദി,” എന്ന് മോഹൻലാൽ കുറിച്ചു.
ലാലേട്ടന്റെ പിറന്നാൾ ദിനത്തിൽ (മേയ് 21) തിയേറ്ററുകളിലെത്തിയ ‘ദൃശ്യം 3’ ആദ്യ പ്രദർശനം മുതൽക്കേ പ്രശംസനീയമായ പ്രതികരണങ്ങളാണ് നേടിയത്. മോഹൻലാലിന്റെ വിസ്മയിപ്പിക്കുന്ന അഭിനയമുഹൂർത്തങ്ങളും പ്രേക്ഷകരെ മുൾമുനയിൽ നിർത്തുന്ന മാസ്മരിക ക്ലൈമാക്സും കോർത്തിണക്കി ഒരു മികച്ച ഇമോഷനൽ ത്രില്ലറായാണ് ജീത്തു ജോസഫ് ഈ അവസാന ഭാഗം അണിയിച്ചൊരുക്കിയത്.
മലയാള സിനിമയ്ക്ക് മുൻപെങ്ങും ലഭിക്കാത്ത വിധത്തിലുള്ള വമ്പൻ റിലീസാണ് ചിത്രത്തിന് ലഭിച്ചത്. കേരളത്തിൽ മാത്രം 465 സ്ക്രീനുകളിലും, ലോകമെമ്പാടുമായി ആകെ 3000-ത്തിലധികം സ്ക്രീനുകളിലുമാണ് ചിത്രം ഒരേസമയം പ്രദർശനത്തിനെത്തിയത്. മോഹൻലാലിനൊപ്പം മീന, എസ്തർ അനിൽ, അൻസിബ ഹസ്സൻ, സിദ്ദിഖ്, ആശാ ശരത്, മുരളി ഗോപി എന്നിവർ മുൻ ഭാഗങ്ങളിലെപ്പോലെ തന്നെ മൂന്നാം ഭാഗത്തിലും തങ്ങളുടെ കഥാപാത്രങ്ങളെ ഭദ്രമാക്കി.
2013-ലാണ് മലയാളത്തിലെ എക്കാലത്തെയും മികച്ച ഇൻവെസ്റ്റിഗേറ്റീവ് ത്രില്ലറുകളിലൊന്നായ ‘ദൃശ്യം’ ആദ്യമായി പുറത്തിറങ്ങുന്നത്. മലയാളത്തിൽ ആദ്യമായി 50 കോടി ക്ലബ്ബ് രൂപീകരിച്ച ഈ ചിത്രം പിന്നീട് നിരവധി ഇന്ത്യൻ, അന്താരാഷ്ട്ര ഭാഷകളിലേക്ക് റീമേക്ക് ചെയ്യപ്പെട്ടു. ജോർജുകുട്ടിയുടെയും കുടുംബത്തിന്റെയും രണ്ടാം അധ്യായം എട്ടുവർഷങ്ങൾക്കുശേഷം 2021-ലാണ് പ്രേക്ഷകർ കണ്ടത്.
കോവിഡ് മഹാമാരിയുടെ മൂർധന്യാവസ്ഥയായതിനാൽ ‘ദൃശ്യം 2’ നേരിട്ട് ഒ.ടി.ടി (OTT) പ്ലാറ്റ്ഫോമിലാണ് റിലീസ് ചെയ്തതെങ്കിലും ആഗോളതലത്തിൽ വലിയ രീതിയിൽ തരംഗം സൃഷ്ടിച്ചിരുന്നു. ഇപ്പോൾ മൂന്നാം ഭാഗം തിയേറ്ററുകളിൽ നേരിട്ടെത്തി റെക്കോർഡുകൾ ഒന്നൊന്നായി തകർക്കുമ്പോൾ, മലയാള സിനിമയുടെ ബോക്സോഫീസ് കരുത്ത് അന്താരാഷ്ട്ര തലത്തിൽ വീണ്ടും തെളിയുകയാണ്.
Shattering global box office records, the Mohanlal-Jeethu Joseph duo’s Drishyam 3 has entered the elite ₹200-crore club in just seven days of its release. This marks the third Mohanlal starrer to achieve this milestone, following the massive success of Empuraan and Thudarum. Released on the superstar’s birthday, the emotional thriller received rave reviews worldwide. Celebrating the milestone, Mohanlal shared a special poster on social media, thanking fans for standing by Georgekutty and his family through three unforgettable chapters. The film had a massive global release across 3,000 screens, including 465 screens in Kerala.