ന്യൂഡല്ഹി: ആളുകള് നോക്കിനില്ക്കെ ഡല്ഹി പോലീസ് കോണ്സ്റ്റബിള് സ്വന്തം ഭാര്യയെ നടുറോഡില് വെടിവെച്ചുകൊന്നു. കിഴക്കന് ഡല്ഹിയായ കല്യാണ്പുരിയില് കഴിഞ്ഞ ഞായറാഴ്ചയാണ് ദാരുണമായ ഈ സംഭവം നടന്നത്. ഡല്ഹി പോലീസിലെ ആന്റി ഓട്ടോ തെഫ്റ്റ് സ്ക്വാഡ് (AATS) അംഗമായ മനീഷ് ഭാട്ടിയാണ് ഭാര്യയും അധ്യാപികയുമായ പ്രിയങ്കയെ (26) ക്രൂരമായി കൊലപ്പെടുത്തിയത്. പ്രിയങ്കയുടെ ജന്മദിനത്തിലായിരുന്നു ഈ ദാരുണ സംഭവം അരങ്ങേറിയത് . കുടുംബപരമായ തര്ക്കങ്ങളാണ് ഈ ക്രൂരകൃത്യത്തിലേക്ക് നയിച്ചതെന്നാണ് പോലീസിന്റെ പ്രാഥമിക അന്വേഷണത്തില് വ്യക്തമാകുന്നത്.
പോലീസ് നല്കുന്ന വിവരമനുസരിച്ച് കോണ്സ്റ്റബിള് മനീഷും ഭാര്യ പ്രിയങ്കയും തമ്മില് ദീര്ഘനാളായി വ്യക്തിപരമായ പല കാര്യങ്ങളിലും നിരന്തരം വഴക്കിടാറുണ്ടായിരുന്നു. സംഭവദിവസം ഇരുവരും തമ്മില് വീട്ടില് വെച്ച് കടുത്ത വാക്കേറ്റമുണ്ടായി. തുടര്ന്ന് ഇരുവരും ഒരു സ്കൂട്ടറില് പുറത്തേക്ക് പോയെങ്കിലും യാത്രാമധ്യേയും വഴക്ക് തുടരുകയായിരുന്നു. തുടര്ന്ന് റോഡരികില് സ്കൂട്ടര് നിര്ത്തി ഇരുവരും ഇറങ്ങി സംസാരിക്കുന്നതിന്റെ സി.സി.ടി.വി ദൃശ്യങ്ങള് പോലീസിന് ലഭിച്ചിട്ടുണ്ട്. ഈ ദൃശ്യങ്ങളില് ഇരുവരും തമ്മില് രൂക്ഷമായ തര്ക്കത്തിലേര്പ്പെടുന്നത് വ്യക്തമായി കാണാം. ഇതിനിടയില് നിയന്ത്രണം വിട്ട മനീഷ് തന്റെ കയ്യിലുണ്ടായിരുന്ന സര്വീസ് പിസ്റ്റള് എടുത്ത് പ്രിയങ്കയ്ക്ക് നേരെ വെടിയുതിര്ക്കുകയായിരുന്നു.
വെടിയേറ്റ് വീണ പ്രിയങ്കയെ ഒരു വഴിയാത്രക്കാരന് ഉടന് തന്നെ സമീപത്തെ ലാല് ബഹാദൂര് ശാസ്ത്രി ആശുപത്രിയില് എത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു. കൃത്യം നിര്വഹിച്ച ശേഷം പ്രതിയായ മനീഷ് ഭാട്ടി സംഭവസ്ഥലത്തുനിന്ന് വേഗത്തില് രക്ഷപ്പെട്ടു. പ്രതിയെ പിടികൂടാനായി പോലീസ് പ്രത്യേക സംഘങ്ങള് രൂപീകരിച്ച് ഊര്ജിതമായ അന്വേഷണം ആരംഭിച്ചിട്ടുണ്ട്. ഇയാള് രക്ഷപ്പെടാന് സാധ്യതയുള്ള വഴികളിലെ സി.സി.ടി.വി ദൃശ്യങ്ങള് പോലീസ് വിശദമായി പരിശോധിച്ചുവരികയാണ്. സംഭവത്തെക്കുറിച്ച് കൂടുതല് വിവരങ്ങള് ശേഖരിക്കുന്നതിനായി ഇവരുടെ കുടുംബാംഗങ്ങളെയും സുഹൃത്തുക്കളെയും പോലീസ് ചോദ്യം ചെയ്തുവരികയാണ്. കൊലപാതകത്തിന് പിന്നിലെ കൃത്യമായ കാരണങ്ങള് പുറത്തുകൊണ്ടുവരാന് കേസ് രജിസ്റ്റര് ചെയ്ത് വിശദമായ അന്വേഷണം നടന്നുവരികയാണെന്ന് ഉന്നത പോലീസ് ഉദ്യോഗസ്ഥര് അറിയിച്ചു.
English Summary
In a shocking incident, a Delhi Police constable shot dead his 26-year-old schoolteacher wife in broad daylight on a busy road in East Delhi’s Kalyanpuri. The accused, Manish Bhati, who is a member of the Anti Auto Theft Squad (AATS), committed the horrific crime on his wife Priyanka’s birthday following a heated domestic dispute. CCTV footage recovered by the police shows the couple arguing intensely on the roadside after parking their scooter, before Bhati pulled out his service pistol and fired at her. Priyanka was rushed to the hospital but was declared brought dead, and the Delhi Police have arrested the constable and initiated strict legal action.