ന്യൂഡൽഹി: നീറ്റ് ചോദ്യപേപ്പർ ചോർച്ചയുമായി ബന്ധപ്പെട്ട് കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജിക്കായും വിദ്യാർഥികളുടെ അവകാശങ്ങൾക്കായും ദില്ലിയിൽ അനിശ്ചിതകാല നിരാഹാര സമരം നടത്തുന്ന ലഡാക്ക് സമരനേതാവും പരിസ്ഥിതി പ്രവർത്തകനുമായ സോനം വാങ്ചുക്കിനോട് സമരം അവസാനിപ്പിക്കാൻ സിജെപി നേതൃത്വം അഭ്യർത്ഥിച്ചു. ദിവസങ്ങൾ പിന്നിട്ട നിരാഹാരത്തെ തുടർന്ന് വാങ്ചുക്കിന്റെ ആരോഗ്യം വൻതോതിൽ മോശമാകുന്ന സാഹചര്യത്തിലാണ് രാജ്യത്തിന് അദ്ദേഹത്തിന്റെ ജീവനും സേവനവും പരമപ്രധാനമാണെന്ന് ചൂണ്ടിക്കാട്ടി സിജെപി നേതാവ് അഭിജിത് ദീപ്കെ ഈ അഭ്യർത്ഥന നടത്തിയത്. ധർമ്മേന്ദ്ര പ്രധാൻ രാജിവെയ്ക്കും വരെ വിദ്യാർത്ഥി സംഘടനകൾ സമരം തുടരുമെന്നും അദ്ദേഹം വ്യക്തമാക്കി.
അതേസമയം, കേന്ദ്ര ആഭ്യന്തര മന്ത്രാലയവും സിജെപി നേതൃത്വവും തമ്മിൽ നടത്താനിരുന്ന ഒത്തുതീർപ്പ് ചർച്ചകൾക്ക് സാധ്യത മങ്ങുന്നതായാണ് സൂചനകൾ വ്യക്തമാക്കുന്നത്. ഭരണാധികാരികളുടെയോ കേന്ദ്രമന്ത്രിമാരുടെയോ ഔദ്യോഗിക വസതികളിലോ ഓഫീസുകളിലോ പോയി അടച്ചിട്ട മുറിയിൽ ചർച്ച നടത്താനില്ലെന്ന് സിജെപി വക്താക്കൾ കേന്ദ്രത്തെ കടുത്ത ഭാഷയിൽ അറിയിച്ചു. കഴിഞ്ഞ തവണ കേന്ദ്രമന്ത്രി ജെ.പി. നഡ്ഡയെ കാണാൻ പ്രതിനിധികൾ പോയ സമയത്താണ് ഡൽഹി പോലീസ് സമരക്കാരായ വിദ്യാർത്ഥികളെ തെരുവിൽ ക്രൂരമായി തല്ലിച്ചതച്ചതെന്നും അത്തരം ചതികൾ ആവർത്തിക്കാൻ അനുവദിക്കില്ലെന്നും സിജെപി നേതാവ് സൗരവ് ദാസ് വ്യക്തമാക്കി.
ചർച്ച സുതാര്യമാകാൻ കോൺസ്റ്റിറ്റ്യൂഷൻ ക്ലബ് പോലെയുള്ള നിഷ്പക്ഷമായ ഏതെങ്കിലും പൊതുവേദി (Neutral Venue) ഒരുക്കണമെന്ന് പ്രതിഷേധക്കാർ നിർദ്ദേശിച്ചെങ്കിലും കേന്ദ്ര സർക്കാർ ഇതിന് തയ്യാറാകുന്നില്ല. മാധ്യമങ്ങളുടെ സാന്നിധ്യത്തിൽ പരസ്യമായ ചർച്ചയ്ക്ക് കേന്ദ്രം മടിക്കുന്ന സാഹചര്യത്തിൽ ഇനിയൊരു ചർച്ചയ്ക്ക് സാധ്യതയില്ലെന്ന് സൗരവ് ദാസ് കൂട്ടിച്ചേർത്തു. എന്നാൽ, ദില്ലി ഹൈക്കോടതിയുടെ കർശനമായ നോട്ടീസും തെരുവ് യുദ്ധമായി മാറിയ വിദ്യാർത്ഥി പ്രക്ഷോഭവും കേന്ദ്ര ആഭ്യന്തര മന്ത്രാലയത്തെ വൻ പ്രതിരോധത്തിലാക്കിയിട്ടുണ്ട്.
സിജെപിയുമായുള്ള ചർച്ചകൾ വഴിമുട്ടിയെങ്കിലും, പാർലമെന്റിനകത്തും പുറത്തും പ്രതിപക്ഷം ഉയർത്തിയ അതിശക്തമായ പ്രതിഷേധത്തിനൊടുവിൽ നീറ്റ് ക്രമക്കേടിൽ പാർലമെന്റിൽ അടിയന്തര ചർച്ചയ്ക്ക് തയ്യാറാണെന്ന് കേന്ദ്ര സർക്കാർ ഔദ്യോഗികമായി അറിയിച്ചു. വിഷയത്തിൽ പ്രതിപക്ഷത്തിന് എപ്പോൾ വേണമെങ്കിലും ചർച്ച നടത്താൻ സന്നദ്ധമാണെന്ന് ലോക്സഭാ സ്പീക്കർ ഓം ബിർളയും പാർലമെന്ററി കാര്യമന്ത്രി കിരൺ റിജിജുവും സഭയെ അറിയിച്ചു. രാഹുൽ ഗാന്ധിയുടെ നേതൃത്വത്തിൽ പ്രതിപക്ഷം സഭ സ്തംഭിപ്പിച്ചതോടെയാണ് കേന്ദ്രത്തിന്റെ ഈ പിൻവാങ്ങൽ.
കേന്ദ്ര സർക്കാർ പാർലമെന്റിൽ ചർച്ചയ്ക്ക് തയ്യാറായെങ്കിലും, വിദ്യാഭ്യാസ മന്ത്രി ധർമ്മേന്ദ്ര പ്രധാൻ അടിയന്തരമായി രാജിവെയ്ക്കാതെ സഭയ്ക്കുള്ളിൽ യാതൊരുവിധ ചർച്ചയ്ക്കുമില്ലെന്ന് കോൺഗ്രസും മറ്റ് പ്രതിപക്ഷ കക്ഷികളും നിലപാട് കടുപ്പിച്ചു. ചോദ്യപേപ്പർ ചോർച്ചയ്ക്ക് ഉത്തരവാദിയായ മന്ത്രി സ്ഥാനത്ത് തുടരുന്നിടത്തോളം കാലം ചർച്ചകൾ പ്രഹസനമായി മാറുമെന്നാണ് പ്രതിപക്ഷ മുന്നണിയുടെ ആക്ഷേപം. വരും ദിവസങ്ങളിൽ പാർലമെന്റ് വർഷകാല സമ്മേളനത്തെ പൂർണ്ണമായി ഉലയ്ക്കുന്ന തരത്തിലേക്ക് നീറ്റ് പരീക്ഷാ തട്ടിപ്പ് വിവാദം കത്തിപ്പടരുകയാണ്.
English Summary
The Cockroach Janata Party (CJP) has appealed to environmental activist Sonam Wangchuk to end his hunger strike as his health continues to deteriorate, with CJP leader Abhijit Deepke stating that Wangchuk’s life and ongoing guidance are crucial for the nation’s youth. Meanwhile, prospects for direct talks between the Centre and CJP have dimmed, as CJP spokesperson Sourav Das reiterated that they will not participate in closed-door discussions at ministers’ residences and will only agree to meet at a neutral venue like the Constitution Club. Amid mounting pressure inside the Parliament, the Central Government, through Speaker Om Birla and Parliamentary Affairs Minister Kiren Rijiju, announced its readiness to hold an immediate discussion on the NEET irregularities. However, the opposition led by Congress remains firm, stating no talks will happen until Education Minister Dharmendra Pradhan resigns.