മുംബൈ:ഇന്‍സ്റ്റഗ്രാം റീലിലൂടെ വൈറലായ മലയാളി മോഡലാണ് ശ്രീലക്ഷ്മി സതീഷ്. ആഘോഷ് വൈഷ്ണവ് എന്ന ഛായാഗ്രാഹകനാണ് ഇന്‍സ്റ്റഗ്രാമില്‍ സാരിയുടുത്തുള്ള ശ്രീലക്ഷ്മിയുടെ റീല്‍ പോസ്റ്റ് ചെയ്തത്. ഇത് സംവിധായകന്‍ രാംഗോപാല്‍ വര്‍മയുടെ ശ്രദ്ധയില്‍പെടുകയും ശ്രീലക്ഷ്മിയെ നായികയായി അഭിനയിക്കാന്‍ ക്ഷണിക്കുകയും ചെയ്തു.
സാരി എന്നുതന്നെയാണ് ചിത്രത്തിന് പേര് നല്‍കിയിരിക്കുന്നത്. ആഘോഷ് സംവിധാനം ചെയ്യുന്ന ചിത്രം കുറച്ച് മുമ്പ് പ്രഖ്യാപിക്കുകയും ചെയ്തിരുന്നു. ഇതോടൊപ്പം തന്റെ പേര് ആരാധ്യ ദേവി എന്ന് മാറ്റുകയും ചെയ്തിരുന്നു ശ്രീലക്ഷ്മി.
ഇപ്പോഴിതാ ശ്രീലക്ഷ്മിയുടെ പുതിയ ഗ്ലാമറസ് ഫോട്ടോഷൂട്ടാണ് സോഷ്യല്‍ മീഡിയയില്‍ വൈറലാകുന്നത്. സെക്രട്ടറി എന്ന പുതിയ ചിത്രത്തിനായി രാംഗോപാല്‍ വര്‍മയുടെ പഴ്സണല്‍ ഫോട്ടോഗ്രാഫര്‍ യശ്വന്ത് ഗൗഡാണ് ഈ ചിത്രങ്ങള്‍ പകര്‍ത്തിയത്. ശ്രീലക്ഷ്മിയുടെ ഗ്ലാമര്‍ ട്രാന്‍സ്ഫര്‍മേഷന്‍ കണ്ട് താന്‍ അദ്ഭുതപ്പെട്ടുവെന്ന് രാംഗോപാല്‍ വര്‍മ എക്സില്‍ കുറിക്കുകയും ചെയ്തു.
‘യശ്വന്ത്, നിങ്ങളുടെ ഫോട്ടോഗ്രാഫിയില്‍ ആരാധ്യ ദേവിയുടെ മാറ്റം കണ്ട് ഞാന്‍ ഞെട്ടിപ്പോയി. ഇന്‍സ്റ്റ റീലിലുടെ ആര്‍ജിവി ടീം കണ്ടെത്തിയ മലയാളി പെണ്‍കുട്ടിയായ ആരാധ്യ ദേവിയാണ് ഈ ചിത്രങ്ങളില്‍ കാണുന്നത്. ഞങ്ങള്‍ക്കൊപ്പം സാരി എന്ന ചിത്രത്തിലും ആരാധ്യ കരാര്‍ ഒപ്പിട്ടിട്ടുണ്ട്. ആ സിനിമയുടെ പ്രൊഡക്ഷന്‍ പുരോഗമിക്കുകയാണ്.’ രാംഗോപാല്‍ വര്‍മ ആരാധ്യയുടെ ചിത്രത്തിനൊപ്പം എക്സില്‍ കുറിച്ചു.
ഈ ഫോട്ടോഷൂട്ടില്‍ നിന്നുള്ള ചിത്രങ്ങള്‍ ശ്രീലക്ഷ്മിയും ഇന്‍സ്റ്റഗ്രാമില്‍ പങ്കുവെച്ചിട്ടുണ്ട്. ഒപ്പം ആരാധകരുടെ ചോദ്യങ്ങള്‍ക്കുള്ള മറുപടിയും നല്‍കിയിട്ടുണ്ട്. രാംഗോപാല്‍ വര്‍മയുമായി ഡേറ്റ് ചെയ്തോ എന്നതായിരുന്നു ഒരു ആരാധകന്റെ ചോദ്യം. ‘ഈ ചോദ്യം കണ്ടാല്‍ അദ്ദേഹം പൊട്ടിച്ചിരിക്കു’മെന്നായിരുന്നു ഇതിന് ശ്രീലക്ഷ്മിയുടെ മറുപടി. പുതിയ ഫോട്ടോഷൂട്ടുകളില്ലെന്നും സിനിമയുടെ തിരക്കിലാണെന്നും ആരാധ്യ വ്യക്തമാക്കുന്നു.
ശ്രീലക്ഷ്മി നായികയായെത്തുന്ന സാരിയുടെ ചിത്രീകരണം പുരോഗമിക്കുകയാണ്. ലോക സാരി ദിനത്തോട് അനുബന്ധിച്ചാണ് സിനിമയുടെ ഫസ്റ്റ് ലുക്ക് പോസ്റ്റര്‍ പുറത്തിറക്കിയത്. അഞ്ച് ഭാഷകളില്‍ ചിത്രം റിലീസ് ചെയ്യും. ഇന്‍സ്റ്റഗ്രാം ഇന്‍ഫ്ളുവന്‍സര്‍ കൂടിയായ ശ്രീലക്ഷ്മി പരസ്യ ചിത്രങ്ങളിലും അഭിനയിച്ചിട്ടുണ്ട്.
