ലക്നൗ: ഇന്ത്യന് ക്രിക്കറ്റ് താരം റിങ്കു സിങ് വിവാഹിതനാകുന്നു. റിങ്കു സിങ്ങിന്റെ സ്വദേശമായ ഉത്തര്പ്രദേശില്നിന്നുള്ള സമാജ്വാദി പാര്ട്ടി എംപി പ്രിയ സരോജാണ് വധു. ജൂണ് എട്ടിന് ലക്നൗവില്വച്ച് വിവാഹനിശ്ചയം നടക്കുമെന്ന് ദേശീയ മാധ്യമങ്ങള് റിപ്പോര്ട്ട് ചെയ്തു. ഇന്ത്യന് പ്രിമിയര് ലീഗില് കൊല്ക്കത്ത നൈറ്റ് റൈഡേഴ്സ് താരമായിരുന്ന റിങ്കു സിങ്, ഇതുവരെ ഇന്ത്യയ്ക്കായി രണ്ട് ഏകദിനങ്ങളും 33 ട്വന്റി20 മത്സരങ്ങളും കളിച്ചു.
ഉത്തര്പ്രദേശിലെ മച്ലിഷഹര് ലോക്സഭാ മണ്ഡലത്തില് നിന്നുള്ള പാര്ലമെന്റ് അംഗമായ പ്രിയ സരോജ് ആണ് വധു. നിലവിലെ ലോക്സഭയിലെ ഏറ്റവും പ്രായം കുറഞ്ഞ രണ്ടാമത്തെ അംഗം കൂടിയാണ് 25കാരിയായ പ്രിയ സരോജ്. സമാജ്വാദി പാര്ട്ടിയുടെ ഉത്തര്പ്രദേശിലെ മുതിര്ന്ന നേതാവും മൂന്ന് തവണ എംപിയും നിലവിലെ കേരാകട് എംഎല്എയുമായ തുഫാനി സരോജിന്റെ മകളാണ് പ്രിയ സരോജ്. അഭിഭാഷക കൂടിയായ പ്രിയ സരോജ് ജഡ്ജിയാവണമെന്ന മോഹം മാറ്റിവെച്ചാണ് പിതാവിന്റെ പാത പിന്തുടര്ന്ന് രാഷ്ട്രീയത്തില് ഇറങ്ങിയത്.
ഇരുവരും വിവാഹിതരായേക്കുമെന്ന അഭ്യൂഹങ്ങള് കുറച്ചുനാളായി സമൂഹമാധ്യമങ്ങളില് ഉള്പ്പെടെ പ്രചരിച്ചിരുന്നു. വിവാഹക്കാര്യത്തില് ചര്ച്ചകള് നടക്കുന്നതായി പ്രിയയുടെ പിതാവും സമാജ്വാദി പാര്ട്ടി എംഎല്എയുമായ തുഫാനി സരോജ് ഇക്കഴിഞ്ഞ ജനുവരിയില് വെളിപ്പെടുത്തുകയും ചെയ്തു. ഒരു പൊതുസുഹൃത്ത് വഴിയാണ് ഇരുവരും പരിചയപ്പെട്ടതെന്നും അദ്ദേഹം വെളിപ്പെടുത്തിയിരുന്നു.
വാരണാസിയിലെ കര്ഗിയാവോനില് നിന്നുള്ള പ്രിയ സരോജ്, വര്ഷങ്ങളായി സമാജ്വാദി പാര്ട്ടിയുമായി ബന്ധപ്പെട്ട് സജീവ രാഷ്ട്രീയത്തില് പ്രവര്ത്തിക്കുന്നയാളാണ്. 2024ലെ ലോക്സഭാ തിരഞ്ഞെടുപ്പില് ജുവാന്പുരിലെ മച്ച്ലിഷഹര് മണ്ഡലത്തില്നിന്ന് സമാജ്വാദി പാര്ട്ടി ടിക്കറ്റില് മത്സരിച്ചാണ് പ്രിയ എംപിയായി.
മുന്പ് സുപ്രീം കോടതി അഭിഭാഷകയായിരുന്ന പ്രിയ സരോജ്, 2022ലെ ഉത്തര്പ്രദേശ് നിയമസഭാ തിരഞ്ഞെടുപ്പില് പിതാവിനായി പ്രചാരണരംഗത്ത് ഇറങ്ങിയതോടെയാണ് ശ്രദ്ധ നേടിയത്. ഡല്ഹി സര്വകലാശാലയില്നിന്ന് ആര്ട്സില് ബിരുദവും അമിറ്റി സര്വകലാശാലയില്നിന്ന് നിയമത്തില് ബിരുദവും നേടി. കഴിഞ്ഞ ലോക്സഭാ തെരഞ്ഞെടുപ്പില് ബിജെപി എംപിയായിരുന്ന ഭോലാനാഥിനെ 35,850 വോട്ടുകളുടെ ഭൂരിപക്ഷത്തില് പരാജയപ്പെടുത്തിയാണ് പ്രിയ സരോജ് ലോക്സഭയിലെ പ്രായം കുറഞ്ഞ രണ്ടാമത്തെ അംഗമായത്.
2023ലെ ഐപിഎല് സീസണില് കൊല്ക്കത്തയ്ക്കായി പുറത്തെടുത്ത മിന്നുന്ന പ്രകടനത്തിലൂടെയാണ് റിങ്കു സിങ് ഇന്ത്യന് ക്രിക്കറ്റില് ശ്രദ്ധാകേന്ദ്രമായത്. ആ സീസണില് ഗുജറാത്ത് ടൈറ്റന്സ് താരം യഷ് ദയാലിനെതിരെ ഒരു ഓവറില് തുടര്ച്ചയായി അഞ്ച് സിക്സറുകളുമായി കയ്യടി നേടി. ഗുജറാത്ത് ടൈറ്റന്സിനെതിരായ മത്സരത്തില് കൊല്ക്കത്ത നൈറ്റ് റൈഡേഴ്സിനുവേണ്ടി ഇറങ്ങിയ റിങ്കു അവസാന ഓവറില് ജയിക്കാന് 29 റണ്സ് വേണ്ടിയിരിക്കെയാണ് അഞ്ച് സിക്സ് അടിച്ച് ടീമിന് അവിശ്വസനീയ ജയം സമ്മാനിച്ചത്.
55 ലക്ഷം രൂപക്ക് കൊല്ക്കത്ത ടീം നിലനിര്ത്തിയ താരത്തെ ഇത്തവണത്തെ മെഗാ താരലേലത്തിന് മുമ്പ് 13 കോടി രൂപക്കാണ് ടീം നിലനിര്ത്തിയത്. എന്നാല് ഇത്തവണ ഐപിഎല്ലില് റിങ്കുവിന് കാര്യമായി തിളങ്ങാനായിരുന്നില്ല. ഈ സീസണില് 13 മത്സരങ്ങളില് 29.42 ശരാശരിയിലും 153.73 സ്ട്രൈക്ക് റേറ്റിലും 206 രണ്സ് മാത്രമാണ് റിങ്കു നേടിയത്.നിലവിലെ ചാമ്പ്യന്മാരായ കൊല്ക്കത്ത ഇത്തവണ പ്ലേ ഓഫിലേക്ക് യോഗ്യത നേടുന്നതിലും പരാജയപ്പെട്ടിരുന്നു. എട്ടാം സ്ഥാനത്താണ് കൊല്ക്കത്ത ഫിനിഷ് ചെയ്തത്.