വാഷിംഗ്ടണ്: ആഗോള തലത്തില് കൊവിഡ് രോഗികളുടെ എണ്ണം ഒരു കോടി 10 ലക്ഷത്തിലേക്ക് അടുക്കുന്നു. ഇതുവരെ രോഗം സ്ഥിരീകരിച്ചവരുടെ എണ്ണം 10,982,299 ആയി. 24 മണിക്കൂറിനിടെ രണ്ടു ലക്ഷത്തിലേറെ പേര്ക്ക് രോഗം സ്ഥിരീകരിച്ചു. അയ്യായിരത്തിലേറെ മരണവും റിപ്പോര്ട്ട് ചെയ്തു. ഇതോടെ ആകെ കൊവിഡ് മരണം 5.23 ലക്ഷം കടന്നു.
കൊവിഡ് കൂടുതല് നാശം വിതച്ച അമേരിക്കയില് രോഗബാധിതര് 28 ലക്ഷം കടന്നു. വേള്ഡോമീറ്ററിന്റെ കണക്കുപ്രകാരം നിലവില് 2,837,189 രോഗികളാണുള്ളത്. 1,31,485 പേരുടെ ജീവന് ഇതിനോടകം നഷ്ടമായി. കൊവിഡ് മരണത്തില് രണ്ടാമതുള്ള ബ്രസീലില് മരണസംഖ്യ 61,990 ആയി. ഇതുവരെ 1,501,353 പേര്ക്കാണ് രോഗം ബാധിച്ചത്. റഷ്യയില് മരണം 9,500 കടന്നു. രോഗികളുടെ എണ്ണം ഏഴു ലക്ഷത്തിലേക്ക് അടുക്കുന്നു.
കൊവിഡ് ബാധിതരില് നാലാമതുള്ള ഇന്ത്യയില് രോഗബാധിതര് ആറു ലക്ഷം കടന്നു. 18,000ത്തിലേറെ പേര് മരിച്ചു. പെറുവിലും വൈറസ് വ്യാപിക്കുകയാണ്. രോഗികളുടെ എണ്ണം മൂന്നു ലക്ഷത്തിലേക്ക് അടുക്കുകയാണ്. അതേസമയം ബ്രിട്ടണിലും സ്പെയ്നിലും ഇറ്റലിയിലും ജര്മനിയിലും പുതിയ രോഗികള് കുറവാണ്.
ലോകത്താകമാനം 61.39 ലക്ഷത്തിലേറെ പേര് ഇതുവരെ രോഗമുക്തരായി. 43.18 ലക്ഷത്തോളം രോഗികളാണ് നിലവില് ചികിത്സയിലുള്ളത്. ഇതില് 58,000ത്തോളം പേരുടെ ആരോഗ്യനില ഗുരുതരമായി തുടരുകയാണ്.