കണ്ണൂര്: കണ്ണൂര് ജില്ലയില് ആരോഗ്യമന്ത്രി കെ.കെ ഷൈലജയും വ്യവസായമന്ത്രി ഇ.പി ജയരാജനും പങ്കെടുക്കുന്ന സര്ക്കാര് അദാലത്തില് കൊവിഡ് മാനദണ്ഡങ്ങള് ലംഘിച്ച് ആള്ക്കൂട്ടം. തളിപ്പറമ്പ്, പയ്യന്നൂര് താലൂക്കുകളുടെ അദാലത്താണ് ഇന്ന് നടക്കുന്നത്. രാവിലെ നടക്കുന്ന തളിപ്പറമ്പ് താലൂക്കിന്റെ അദാലത്തിലാണ് ജനങ്ങള് തിങ്ങിനില്ക്കുന്നത്. ഉച്ചകഴിഞ്ഞാണ് പയ്യന്നൂര് താലൂക്കിന്റെ അദാലത്ത്.
സംഘടകരുടെ ഭാഗത്തുനിന്നുള്ള പിഴവാണ് കാരണമായി ചൂണ്ടിക്കാട്ടുന്നത്. ആളുകള്ക്ക് വേണ്ടത്ര കൗണ്ടറുകള് ഏര്പ്പെടുത്താത്തതും ആദാലത്ത് ആരംഭിക്കാന് വൈകിയതും ആളുകള് തിക്കിതിരക്കാന് ഇടയാക്കി. എന്നാല് മന്ത്രിമാരുടെ അടുത്തേക്ക് ആളുകളെ കടത്തിവിടുന്നത് കൊവിഡ് മാനദണ്ഡങ്ങള് പാലിച്ചാണ്.
കഴിഞ്ഞ ദിവസം ആലപ്പുഴ ജില്ലയില് നടന്ന അദാലത്തില് എല്ലാ നിയന്ത്രണങ്ങളും ലംഘിച്ച് ജനക്കൂട്ടം തിക്കിതിരക്കിയിരുന്നു. സംസ്ഥാനത്ത് കോവിഡ് വ്യാപനം വര്ധിച്ചുവരുന്നതിനിടെയാണ് സര്ക്കാര് പരിപാടിയില് തന്നെ നിയന്ത്രണങ്ങള് ലംഘിക്കുന്നത്.