കൊച്ചി: ഐസലേഷന് വാര്ഡില് നിരീക്ഷണത്തിലുണ്ടായിരുന്ന ആള് മരിച്ചു. കളമശേരി മെഡിക്കല് കോളജ് ഐസലേഷന് വാര്ഡില്, ആസാം സ്വദേശി ബിജോയ് കൃഷ്ണന് (23) ആണ് മരിച്ചത്. ഗുരുതര കരള് രോഗത്തെ തുടര്ന്നാണ് ഇയാളെ ആശുപത്രിയില് പ്രവേശിപ്പിച്ചത്. കോവിഡ് രോഗം ഇല്ലെന്ന് നേരത്തെ സ്ഥിരീകരിച്ചിരുന്നു. മൂന്നു വട്ടം സ്രവ പരിശോധന നടത്തിയപ്പോഴും നെഗറ്റീവായിരുന്നു ഫലം.
അതേസമയം കേരളത്തില് ഇന്ന് (വെള്ളിയാഴ്ച്ച) ഒരാള്ക്ക് മാത്രം കോവിഡ്-19. കോഴിക്കോട് ജില്ലയിലുള്ളയാള്ക്കാണ് രോഗം സ്ഥിരീകരിച്ചത്. സമ്പര്ക്കത്തിലൂടെയാണ് ഇയാള്ക്ക് രോഗം വന്നത്. 10 പേര് കൂടി ഇന്ന് രോഗമുക്തി നേടി, കാസര്ഗോഡ് ജില്ലയിലെ 6 പേരുടേയും എറണാകുളം ജില്ലയിലെ 2 പേരുടേയും ആലപ്പുഴ, മലപ്പുറം എന്നീ ജില്ലകളിലുള്ള ഓരോരുത്തരുടേയും പരിശോധനാഫലമാണ് നെഗറ്റീവായത്. 255 പേരാണ് ഇതുവരെ കോവിഡില് നിന്നും സുഖം പ്രാപിച്ചത്. നിലവില് 138 പേരാണ് സംസ്ഥാനത്തെ വിവിധ ആശുപത്രികളില് ചികിത്സയിലുള്ളത്.
സംസ്ഥാനത്തെ വിവിധ ജില്ലകളിലായി 78,980 പേര് നിരീക്ഷണത്തിലാണ്. ഇവരില് 78,454 പേര് വീടുകളിലും 526 പേര് ആശുപത്രികളിലും നിരീക്ഷണത്തിലാണ്. 84 പേരെയാണ് ഇന്ന് ആശുപത്രിയില് പ്രവേശിപ്പിച്ചത്. രോഗലക്ഷണങ്ങളുള്ള 18,029 വ്യക്തികളുടെ സാമ്പിള് പരിശോധനയ്ക്ക് അയച്ചിട്ടുണ്ട്. ഇതില് ലഭ്യമായ 17,279 സാമ്പിളുകളുടെ പരിശോധനാ ഫലം നെഗറ്റിവ് ആണ്.