കൊച്ചി: കേരള നിയമസഭാ തെരഞ്ഞെടുപ്പിനുള്ള കോൺഗ്രസ് സ്ഥാനാർത്ഥി പട്ടിക പുറത്തുവന്നപ്പോൾ പാർട്ടിയിലെ അധികാര സമവാക്യങ്ങളിൽ വലിയ മാറ്റം. എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ പക്ഷത്തിനാണ് സ്ഥാനാർത്ഥി നിർണ്ണയത്തിൽ വലിയ നേട്ടമുണ്ടായിരിക്കുന്നത്. കോൺഗ്രസ് മത്സരിക്കുന്ന 92 സീറ്റുകളിൽ മൂന്നിലൊന്നും (ഏകദേശം 30 സീറ്റുകൾ) കെ.സി. വേണുഗോപാലിനോട് ആഭിമുഖ്യം പുലർത്തുന്നവരാണ്. ഉമ്മൻ ചാണ്ടിയുടെ അഭാവത്തിൽ നടക്കുന്ന ആദ്യ നിയമസഭാ തെരഞ്ഞെടുപ്പിൽ, ഒരു ദശാബ്ദക്കാലം പാർട്ടിയിൽ അപ്രമാദിത്വമുണ്ടായിരുന്ന എ ഗ്രൂപ്പിനെ മറികടന്ന് കെ.സി. പക്ഷം കരുത്താർജ്ജിക്കുന്ന കാഴ്ചയാണ് ദൃശ്യമാകുന്നത്. പഴയ എ, ഐ ഗ്രൂപ്പുകളിലെ പ്രമുഖ നേതാക്കൾ പലരും ഇപ്പോൾ കെ.സി. വേണുഗോപാലിനൊപ്പമാണ് നിലയുറപ്പിച്ചിരിക്കുന്നത്.
സ്ഥാനാർത്ഥികളുടെ എണ്ണത്തിൽ രണ്ടാം സ്ഥാനത്ത് എ ഗ്രൂപ്പാണ്. ഉമ്മൻ ചാണ്ടിയുടെ മരണശേഷം കൃത്യമായൊരു നായകനില്ലാതെ ശിഥിലമായ എ ഗ്രൂപ്പിൽ നിന്നും 21 പേരാണ് ഇത്തവണ ജനവിധി തേടുന്നത്. ഷാഫി പറമ്പിൽ, പി.സി. വിഷ്ണുനാഥ്, ബെന്നി ബെഹനാൻ എന്നിവരുടെ സജീവമായ ഇടപെടലുകളാണ് എ ഗ്രൂപ്പിന് ഇത്രയും സീറ്റുകൾ ഉറപ്പാക്കിയത്. എറണാകുളം ജില്ലയിലാണ് എ ഗ്രൂപ്പിന് ഏറ്റവും കൂടുതൽ പ്രാതിനിധ്യം ലഭിച്ചത്; അഞ്ച് പേർ ഇവിടെ മത്സരിക്കുന്നു. എന്നാൽ, വരുംകാലത്ത് ഈ ഗ്രൂപ്പിലെ പലരും കെ.സി. പക്ഷത്തേക്ക് ചേക്കേറാൻ സാധ്യതയുണ്ടെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
രമേശ് ചെന്നിത്തലയുടെ നേതൃത്വത്തിലുള്ള ഐ ഗ്രൂപ്പിന് ഇത്തവണ വലിയ തിരിച്ചടിയാണ് നേരിട്ടിരിക്കുന്നത്. ചെന്നിത്തലയുടെ വിശ്വസ്തരായ ജോസഫ് വാഴയ്ക്കൻ, ബാബു പ്രസാദ്, എൻ. സുബ്രഹ്മണ്യം തുടങ്ങിയ പ്രമുഖരെ അവസാന നിമിഷം പട്ടികയിൽ നിന്ന് വെട്ടിമാറ്റി. നിലവിൽ 16 സ്ഥാനാർത്ഥികൾ മാത്രമാണ് ചെന്നിത്തല ഗ്രൂപ്പിന്റേതായി പട്ടികയിലുള്ളത്. വയനാട്, പാലക്കാട്, എറണാകുളം, കൊല്ലം ജില്ലകളിൽ രണ്ട് വീതം സ്ഥാനാർത്ഥികളാണ് ചെന്നിത്തല പക്ഷത്തിനുള്ളത്. ഗ്രൂപ്പ് സമവാക്യങ്ങൾ മാറിയതോടെ ഐ ഗ്രൂപ്പിന്റെ പ്രസക്തി പാർട്ടിയിൽ കുറഞ്ഞുവരുന്നതായാണ് സൂചന.
പ്രതിപക്ഷ നേതാവ് വി.ഡി. സതീശന്റെ വിശ്വസ്തരായ എട്ടുപേരും ഇത്തവണ കൈപ്പത്തി ചിഹ്നത്തിൽ മത്സരിക്കുന്നുണ്ട്. തിരുവനന്തപുരം, എറണാകുളം ജില്ലകളിൽ സതീശൻ പക്ഷത്തുനിന്ന് രണ്ട് വീതം പേർ ജനവിധി തേടുന്നു. ഗ്രൂപ്പുകൾക്ക് അതീതമായി നിൽക്കുന്ന 9 പേരും പട്ടികയിൽ ഇടംപിടിച്ചിട്ടുണ്ട്. തൃശ്ശൂർ ജില്ലയിലാണ് കെ.സി. വേണുഗോപാൽ പക്ഷത്തിന് ഏറ്റവും കൂടുതൽ സ്വാധീനമുള്ളത്; അഞ്ച് സ്ഥാനാർത്ഥികളാണ് ഇവിടെ അദ്ദേഹത്തോട് അടുപ്പമുള്ളവരായിട്ടുള്ളത്. ഇതിൽ മൂന്ന് മണ്ഡലങ്ങളും കോൺഗ്രസിന്റെ എ ക്ലാസ് മണ്ഡലങ്ങളാണെന്നത് ശ്രദ്ധേയമാണ്.
എം.പിമാർക്ക് നേരിട്ട് മത്സരിക്കാൻ സീറ്റ് നിഷേധിച്ചുവെങ്കിലും അവർ നിർദ്ദേശിച്ച പല പേരുകളും പട്ടികയിൽ ഇടംപിടിച്ചിട്ടുണ്ട്. കെ. സുധാകരൻ നിർദ്ദേശിച്ച കെ.പി. ഷാജു തലശ്ശേരിയിൽ മത്സരിക്കും. അടൂർ പ്രകാശിന്റെ നിർദ്ദേശപ്രകാരം രമ്യ ഹരിദാസ് ഉൾപ്പെടെ മൂന്ന് പേർക്ക് സീറ്റ് ലഭിച്ചു. ആന്റോ ആന്റണി, കൊടിക്കുന്നിൽ സുരേഷ്, ബെന്നി ബെഹനാൻ എന്നിവർ നിർദ്ദേശിച്ചവർക്കും അർഹമായ പരിഗണന ലഭിച്ചിട്ടുണ്ട്. ഗ്രൂപ്പ് താല്പര്യങ്ങൾക്കൊപ്പം തന്നെ പ്രമുഖ നേതാക്കളുടെ താല്പര്യങ്ങളും സംരക്ഷിക്കാൻ ഹൈക്കമാൻഡ് ശ്രമിച്ചിട്ടുണ്ട്.
തിരുവനന്തപുരം, കണ്ണൂർ, കോഴിക്കോട്, ഇടുക്കി ജില്ലകളിൽ മൂന്ന് വീതം സ്ഥാനാർത്ഥികളാണ് കെ.സി. പക്ഷത്തുള്ളത്. മലപ്പുറം, പാലക്കാട്, കോട്ടയം, ആലപ്പുഴ, പത്തനംതിട്ട ജില്ലകളിൽ രണ്ട് വീതം പേരും മത്സരിക്കുന്നു. എറണാകുളം ജില്ലയിലാണ് കെ.സി. പക്ഷത്തിന് ഏറ്റവും കുറഞ്ഞ പ്രാതിനിധ്യമുള്ളത്; ഇവിടെ ഒരു ജനപ്രതിനിധി മാത്രമാണ് ഈ ഗ്രൂപ്പിൽ നിന്നും വീണ്ടും മത്സരിക്കുന്നത്. ഗ്രൂപ്പ് അതിപ്രസരം കുറയ്ക്കാനാണ് ശ്രമിച്ചതെന്ന് നേതൃത്വം അവകാശപ്പെടുമ്പോഴും പട്ടികയിലെ കണക്കുകൾ പുതിയ ഗ്രൂപ്പ് ചേരിതിരിവുകളെയാണ് വ്യക്തമാക്കുന്നത്.
ഈ നിയമസഭാ തെരഞ്ഞെടുപ്പ് ഫലം കോൺഗ്രസിലെ ഗ്രൂപ്പ് രാഷ്ട്രീയത്തിൽ നിർണ്ണായക മാറ്റങ്ങൾ വരുത്തും. കെ.സി. വേണുഗോപാൽ പക്ഷത്തിന്റെ വളർച്ചയും എ ഗ്രൂപ്പിന്റെ തളർച്ചയും വരും ദിവസങ്ങളിൽ പാർട്ടിയിൽ കൂടുതൽ ചർച്ചകൾക്ക് വഴിതുറക്കും. വിജയസാധ്യത മുൻനിർത്തിയാണ് സ്ഥാനാർത്ഥികളെ നിശ്ചയിച്ചതെന്ന് നേതൃത്വം ആവർത്തിക്കുമ്പോഴും, ഗ്രൂപ്പ് വീതംവെപ്പിലെ അതൃപ്തി പലയിടങ്ങളിലും പുകയുന്നുണ്ട്. ഒറ്റക്കെട്ടായി തെരഞ്ഞെടുപ്പിനെ നേരിടുമെന്ന് നേതാക്കൾ പറയുമ്പോഴും അടിത്തട്ടിലെ ഗ്രൂപ്പ് പോര് പരിഹരിക്കുക എന്നത് കോൺഗ്രസിന് വലിയ വെല്ലുവിളിയാകും.
In the final candidate list for the 2026 Kerala Assembly elections, K.C. Venugopal’s faction has emerged as the most powerful within the Congress party, securing nearly one-third of the 92 seats. For the first time without Oommen Chandy, the traditional ‘A’ group has weakened, with many former loyalists shifting to Venugopal’s side. While the ‘A’ group still holds 21 seats and Ramesh Chennithala’s faction 16, Venugopal’s growing dominance signals a major shift in the party’s internal power dynamics.