ചിങ്ങവനം: ഗോമതി കവലയിൽ നിയന്ത്രണം വിട്ട കാർ മീൻകടയിലേയ്ക്ക് ഇടിച്ചുകയറി ജീവനക്കാരനായ അസം സ്വദേശി മരിച്ചു. ഗോമതിക്കവലയിലെ ഗോപുവിന്റെ ഉടമസ്ഥതയിലുള്ള ചേരിക്കൽ ഫിഷ്മാർട്ടിലെ ജീവനക്കാരനായ അസം സ്വദേശി അനിൽ ഹേമന്ദാണ് (40) മരിച്ചത്. കടയിലുണ്ടായിരുന്ന ജീവനക്കാരായ ശശിധരൻ, ലാലു എന്നിവർക്കും പരിക്കേറ്റിട്ടുണ്ട്. ഇവരെ ആശുപത്രിയിൽ പ്രവേശിപ്പിച്ചു.
കടയ്ക്കുമുന്നിൽ പാർക്കുചെയ്തിരുന്ന ഓട്ടോറിക്ഷയും, ബൈക്കും കാർ ഇടിച്ചുതകർത്തു. വ്യാഴാഴ്ച രാവിലെ എട്ടുമണിയോടെയായിരുന്നു അപകടം. കോട്ടയം ഭാഗത്തുനിന്നും എത്തിയ കാർ ചിങ്ങവനം മീൻകടയിലേയ്ക്ക് ഇടിച്ചു കയറുകയായിരുന്നു. ഇടിയുടെ ആഘാതത്തിൽ കാറിന്റെ മുൻഭാഗം പൂർണമായും തകർന്നു. തൊഴിലാളി കാറിനും കടയ്ക്കുമിടയിൽ കുടുങ്ങി. ഈ ദ്യശ്യങ്ങളാണ് പുറത്തുവന്നിരിയ്ക്കുന്നത്.
വയനാട്ടിൽനിന്നും അടൂരിലെ കുടുംബവീട്ടിലേയ്ക്കു പോകുകയായിരുന്ന മൂന്നംഗസംഘം സഞ്ചരിച്ച കാറാണ് അപകടത്തിൽപ്പെട്ടത്. വയനാട് ഗൂഡല്ലൂർ പാലയ്ക്കാത്തൊടിയിൽ സമീർ (28)ആണ് കാർ ഓടിച്ചിരുന്നത്. സമീർ ഉറങ്ങിപ്പോയതാണ് അപകടത്തിന് കാരണമെന്നാണ് കരുതുന്നത്. നാട്ടുകാരും പോലീസും ചേർന്നുനടത്തിയ രക്ഷാപ്രവർത്തനത്തിനൊടുവിൽ ഇതരസംസ്ഥാന തൊഴിലാളിയെ കാറിനടിയിൽനിന്നും പുറത്തെടുത്തു. തുടർന്ന് ആശുപത്രിയിൽ എത്തിച്ചെങ്കിലും മരിച്ചു.
മീൻകടയിലെ മറ്റൊരു ജീവനക്കാരനും പരിക്കേറ്റിട്ടുണ്ട്. ഇദ്ദേഹത്തെ ജില്ലാ ജനറൽ ആശുപത്രിയിൽ പ്രവേശിപ്പിച്ചു. അപകടത്തെ തുടർന്ന് എം.സി. റോഡിൽ അരമണിക്കൂറോളം ഗതാഗതവും തടസ്സപ്പെട്ടിരുന്നു സംഭവത്തിൽ ചിങ്ങവനം പോലീസ് കേസെടുത്തു.