മൂവാറ്റുപുഴ: പലചരക്കു കടയിൽ സാധനങ്ങൾ വാങ്ങാൻ എന്ന വ്യാജേന എത്തിയ മോഷ്ടാവ് കടയുടമയായ സ്ത്രീയുടെ കണ്ണിൽ മുളകുപൊടി വിതറി മാല പൊട്ടിച്ചു കടന്നു. രണ്ടാർ പുനത്തിൽ പരേതനായ കുമാരന്റെ ഭാര്യ മാധവി (60)യുടെ ഒന്നര പവന്റെ മാലയാണ് കവർന്നത്. കണ്ണിൽ മുളകുപൊടി വീണെങ്കിലും മോഷ്ടാവുമായി നടത്തിയ ബലപ്രയോഗത്തിനിടെ ഇയാളുടെ മൊബൈൽ ഫോൺ മാധവി തട്ടി താഴെയിട്ടു. മൊബൈൽ ഫോൺ ഉപയോഗിച്ചു മോഷ്ടാവിനെ കണ്ടെത്താനുള്ള ശ്രമത്തിലാണ് പൊലീസ്.
മാധവി വീടിനോടു ചേർന്നു പലചരക്കു കട നടത്തുന്നുണ്ട്. ഇന്നലെ വൈകിട്ട് അഞ്ചോടെ ഹെൽമറ്റ് ധരിച്ച് ബൈക്കിലാണ് മോഷ്ടാവ് കടയിൽ എത്തിയത്. ബൈക്ക് സ്റ്റാർട്ട് ചെയ്തു നിർത്തിയ ശേഷം ഇയാൾ കടയിൽ നിന്നു സോപ്പുപൊടി, പഞ്ചസാര, തീപ്പെട്ടി എന്നിവ വാങ്ങി. ഇവയുടെ വില കണക്കുകൂട്ടുന്നതിനിടെ അതിവേഗം കയ്യിൽ സൂക്ഷിച്ചിരുന്ന മുളകുപൊടി മാധവിയുടെ കണ്ണിലേക്കെറിഞ്ഞു മോഷ്ടാവ് ഒന്നര പവന്റെ മല പൊട്ടിച്ചെടുക്കുകയായിരുന്നു.
കണ്ണിൽ മുളകു പൊടി വീണതിന്റെ നീറ്റലിലും ബൈക്കിൽ കയറിയ യുവാവിനെ മാധവി ബലപ്രയോഗത്തിലൂടെ തടഞ്ഞു. ഏറെ നേരത്തെ പിടിവലിക്കൊടുവിൽ മാധവിയെ തള്ളിവീഴ്ത്തിയ മോഷ്ടാവ് കടന്നെങ്കിലും ഇയാളുടെ മൊബൈൽ ഫോൺ മാധവി തട്ടി താഴെയിട്ടു. ഇതെടുക്കാൻ ശ്രമിക്കാതെയാണ് യുവാവ് ബൈക്കിൽ കടന്നു കളഞ്ഞത്. മൂവാറ്റുപുഴ പൊലീസ് സ്ഥലത്തെത്തി പരിശോധന നടത്തി. മോഷ്ടാവിന്റെ മൊബൈൽ ഫോൺ പൊലീസിനെ ഏൽപിച്ചിട്ടുണ്ട്. മോഷ്ടാവിനെ തിരിച്ചറിഞ്ഞിട്ടുണ്ടെന്നും ഉടനെ പിടികൂടുമെന്നും പൊലീസ് പറഞ്ഞു.
