ന്യൂഡൽഹി: രാജ്യത്തെ സി.ബി.എസ്.ഇ. സ്കൂളുകളിലെ 9, 10 ക്ലാസുകളിലെ ഭാഷാ പഠനത്തിൽ വിപ്ലവകരമായ പരിഷ്കാരങ്ങളുമായി സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ. 2026-27 അധ്യയന വർഷം മുതൽ ഈ ക്ലാസുകളിൽ മൂന്ന് ഭാഷകളുടെ പഠനം നിർബന്ധമാക്കിക്കൊണ്ട് മെയ് 15-ന് ബോർഡ് പുതിയ ഔദ്യോഗിക സർക്കുലർ പുറത്തിറക്കി. കേന്ദ്ര സർക്കാരിന്റെ ദേശീയ വിദ്യാഭ്യാസ നയത്തിനും (NEP) ദേശീയ പാഠ്യപദ്ധതി ചട്ടക്കൂടിനും (NCF) അനുസൃതമായാണ് ഈ ചരിത്രപരമായ മാറ്റം കൊണ്ടുവന്നിരിക്കുന്നത്. വരാനിരിക്കുന്ന 2026 ജൂലൈ 1 മുതൽ പുതിയ നിയമം രാജ്യത്തുടനീളം പ്രാബല്യത്തിൽ വരും.
പുതിയ പരിഷ്കാരപ്രകാരം വിദ്യാർത്ഥികൾ തിരഞ്ഞെടുക്കുന്ന മൂന്ന് ഭാഷകളിൽ കുറഞ്ഞത് രണ്ടെണ്ണമെങ്കിലും നിർബന്ധമായും ഇന്ത്യൻ ഭാഷകളായിരിക്കണം. വിദേശ ഭാഷകൾ പഠിക്കാൻ താല്പര്യമുള്ള വിദ്യാർത്ഥികൾക്ക് മറ്റ് രണ്ട് ഭാഷകൾ ഇന്ത്യൻ ഭാഷകളാണെന്ന് ഉറപ്പുവരുത്തിക്കൊണ്ട് മാത്രമേ അത് തിരഞ്ഞെടുക്കാൻ സാധിക്കൂ. അല്ലെങ്കിൽ വിദേശ ഭാഷ നാലാമതൊരു അധിക ഭാഷയായി (Additional Language) പഠിക്കാനുള്ള അവസരവും വിദ്യാർത്ഥികൾക്കുണ്ടാകും. ഇത് കുട്ടികളിൽ മാതൃഭാഷയോടും മറ്റ് പ്രാദേശിക ഭാഷകളോടുമുള്ള ആഭിമുഖ്യം വർദ്ധിപ്പിക്കാൻ സഹായിക്കുമെന്നാണ് വിലയിരുത്തൽ.
ഭൂരിഭാഗം സി.ബി.എസ്.ഇ സ്കൂളുകളിലും ഏപ്രിൽ മാസം തന്നെ പുതിയ അധ്യയന വർഷം ആരംഭിച്ചതിനാൽ, താൽക്കാലികമായ ചില ക്രമീകരണങ്ങളോടെയായിരിക്കും ഈ വർഷം പരിഷ്കാരം നടപ്പിലാക്കുക. പുതിയ സിലബസ് പ്രകാരമുള്ള പാഠപുസ്തകങ്ങൾ പൂർണ്ണമായി ലഭ്യമാകുന്നത് വരെ, നിലവിലെ 9, 10 ക്ലാസുകളിലെ വിദ്യാർത്ഥികൾക്ക് അവരുടെ മൂന്നാമത്തെ ഭാഷയ്ക്കായി ആറാം ക്ലാസിലെ പാഠപുസ്തകങ്ങൾ ഉപയോഗിക്കാമെന്ന് സി.ബി.എസ്.ഇ വ്യക്തമാക്കിയിട്ടുണ്ട്. ഇതിന് പുറമെ പ്രാദേശിക സാഹിത്യകൃതികളും കഥകളും കവിതകളും അധികമായി ഉൾപ്പെടുത്താൻ സ്കൂളുകൾക്ക് നിർദ്ദേശം നൽകിയിട്ടുണ്ട്. ഇത് സംബന്ധിച്ച വിശദമായ മാർഗ്ഗരേഖ ജൂൺ 15-നകം ബോർഡ് പുറത്തിറക്കും.
പെട്ടെന്ന് പുതിയ പരിഷ്കാരം വരുമ്പോൾ ഇന്ത്യൻ ഭാഷകൾ പഠിപ്പിക്കാൻ യോഗ്യരായ അധ്യാപകരുടെ കുറവ് പരിഹരിക്കാൻ സ്കൂളുകൾക്ക് താൽക്കാലിക ഇളവുകളും ബോർഡ് അനുവദിച്ചിട്ടുണ്ട്. ഇതിനായി അടുത്തുള്ള സ്കൂളുകൾ തമ്മിൽ അധ്യാപകരെ പങ്കിടുക, ഓൺലൈൻ-ഓഫ്ലൈൻ രീതികൾ സമന്വയിപ്പിച്ചുള്ള ഹൈബ്രിഡ് ക്ലാസുകൾ നൽകുക, വിരമിച്ച അധ്യാപകരെയും തത്തുല്യ യോഗ്യതയുള്ള പി.ജി ബിരുദധാരികളെയും താൽക്കാലികമായി നിയമിക്കുക തുടങ്ങിയ മാർഗ്ഗങ്ങൾ സ്കൂളുകൾക്ക് സ്വീകരിക്കാവുന്നതാണ്. ഇതിനായുള്ള 19 ഇന്ത്യൻ ഭാഷകളിലെ ആറാം ക്ലാസ് പുസ്തകങ്ങൾ ജൂലൈ ഒന്നിന് മുൻപ് എല്ലാ സ്കൂളുകളിലും ലഭ്യമാക്കുമെന്നും സി.ബി.എസ്.ഇ അറിയിച്ചു.
The Central Board of Secondary Education (CBSE) has issued a new circular making the study of three languages mandatory for classes 9 and 10 starting from the 2026-27 academic year. Aligned with the National Education Policy (NEP), the rule requires at least two of the selected languages to be native Indian languages. To manage the sudden transition mid-session, CBSE has permitted schools to use class 6 textbooks for the third language temporarily and allowed flexible teacher-sharing and hybrid models to address staff shortages.