തിരുവനന്തപുരം: തിരുവനന്തപുരത്ത് സ്കൂട്ടറും കാറും കൂട്ടിയിടിച്ചുണ്ടായ അപകടത്തില് മോട്ടോര് വാഹന വകുപ്പ് ഉദ്യോഗസ്ഥന് മരിച്ചു. കല്ലിയൂര് പെരിങ്ങമ്മല സാഫല്യത്തില് എസ്. മധു(47) ആണ് മരിച്ചത്. വഴുതയ്ക്കാട് ട്രാന്സ്പോര്ട് കമ്മീഷണറേറ്റിലെ ജീവനക്കാരനും തെരഞ്ഞെടുപ്പ് ബൂത്ത് ലെവല് ഓഫീസറും ആയിരുന്നു മധു. വിഴിഞ്ഞം ഭാഗത്ത് നിന്നും ബാലരാമപുരം ഭാഗത്തേക്ക് പോയ കാര് എതിരെ വന്ന സ്കൂട്ടറില് ഇടിക്കുകയായിരുന്നു.
ഇടിയുടെ ആഘാതത്തില് റോഡിലേക്ക് തെറിച്ചുവീണ മധുവിന്റെ തലയ്ക്കും ശരീരത്തിലും ഗുരുതരമായ പരിക്കേറ്റു. നാട്ടുകാര് ഓടിയെത്തി ആംബുലന്സില് മെഡിക്കല് കോളെജില് എത്തിച്ചുവെങ്കിലും ജീവന് രക്ഷിക്കാനായില്ല. ബാലരാമപുരം ഉച്ചക്കക്കട റോഡില് സിസിലിപുരം റോഡിലായിരുന്നു അപകടം. വിഴിഞ്ഞം പൊലീസ് കേസെടുത്തു. കാര് ഡ്രൈവറെ പൊലീസ് കസ്റ്റഡിയിലെടുത്തിട്ടുണ്ട്. ഭാര്യ: സൗമ്യ (സഹകരണ വകുപ്പ്) മകള്: സാഫല്യ.