കൊച്ചി: എറണാകുളത്ത് നിയന്ത്രണം വിട്ട ബസ് വാഹനങ്ങളില് ഇടിച്ച് അപകടം. നിയന്ത്രണം നഷ്ടപ്പെട്ട സ്വകാര്യ ബസ് കാറുകളിലടക്കം 13 വാഹനങ്ങളില് ഇടിച്ചു. കാറുകളില് ഉണ്ടായിരുന്നവര്ക്ക് പരുക്കേറ്റിട്ടുണ്ട്. പരുക്കേറ്റവരെ ആശുപത്രിയിലേക്ക് മാറ്റി.
ഇടക്കൊച്ചിയില് നിന്ന് കാക്കനാടേക്ക് പോയ ബസാണ് അപകടത്തില്പ്പെട്ടത്. ഫൈന് ആര്ട്സ് ഹാളിന് സമീപം ഫോര് ഷോര് റോഡില് ആണ് അപകടം ഉണ്ടായത്. 11 മണിയോടെ ആയിരുന്നു അപകടം. ബസിന്റെ ബ്രേക്ക് പെഡല് ഒടിഞ്ഞ നിലയിലായിരുന്നു. പോലീസെത്തി വാഹനങ്ങള് മാറ്റിയശേഷമാണ് ഗതാഗതം പുനരാരംഭിച്ചത്.
റോഡിന് വശത്ത് പാര്ക്ക് ചെയ്ത ഓട്ടോറിക്ഷയിലാണ് ബസ് ആദ്യം ഇടിച്ചത്. ഓട്ടോ തലകീഴായി മറിഞ്ഞു. ഇതിനുപിന്നാലെ റോഡിലുണ്ടായിരുന്ന നിരവധി കാറുകളിലും ഒന്നിനു പിറകെ ഒന്നായി ബസ് ചെന്നിടിച്ചു. സംഭവത്തില് പതിമൂന്നോളം വാഹനങ്ങള്ക്ക് വലിയതോതിലുള്ള കേടുപാടുണ്ടായി.
മുന്ഭാഗവും വശങ്ങളും പൂര്ണമായി തകര്ന്ന കാറുകളും ഇതിലുണ്ട്. അപകടത്തില് പരിക്കേറ്റവരുടെ നില ഗുരുതരമല്ലെന്നാണ് വിവരം.ബസിന്റെ ബ്രേക്ക് പെഡല് പൊട്ടിയ നിലയിലാണ്. ബസ് അമിത വേഗതയിലാണ് വന്നതെന്നും ദൂരെനിന്നു ബസിന്റെ വരവ് കണ്ട് ആളുകള് ഓടിമാറിയതിനാലാണ് വലിയ അപകടം ഒഴിവായതെന്നും ദൃക്സാക്ഷികള് പറയുന്നു.