പാലക്കാട്: ക്ഷേത്ര പരിസരത്തെ സിനിമാ ചിത്രീകരണം ബി.ജെ.പി പ്രവര്ത്തകര് തടഞ്ഞു. പാലക്കാട് കടമ്പഴിപ്പുറം വായില്യാംകുന്ന് ക്ഷേത്ര പരിസരത്ത് നടന്ന മീനാക്ഷി ലക്ഷ്മണ് സംവിധാനം ചെയ്യുന്ന ‘നീയാം നദി’ എന്ന സിനിമയുടെ ചിത്രീകരണമാണ് തടഞ്ഞത്.
ചിത്രീകരണ സെറ്റിലെ ഉപകരണങ്ങളും നശിപ്പിച്ചിട്ടുണ്ട്. അതേസമയം, അണിയറ പ്രവര്ത്തകര് ഇതുവരെ പോലീസില് പരാതി നല്കിയിട്ടില്ല. അതേസമയം ക്ഷേത്ര പരിസരത്ത് അനുമതിയില്ലാതെ ചിത്രീകരിച്ചത് ചോദ്യം ചെയ്യുക മാത്രമാണ് ചെയ്തതെന്നാണ് പ്രാദേശിക ബിജെപി നേതൃത്വത്തിന്റെ വിശദീകരണം.
ഹിന്ദു- മുസ്ലിം പ്രണയം പ്രമേയം ആക്കിയ സിനിമ ചിത്രീകരിക്കാന് അനുവദിക്കില്ലെന്ന് ഭീഷണിപ്പെടുത്തിയതായി അണിയറ പ്രവര്ത്തകര് പറഞ്ഞു. ലൗ ജിഹാദാണിതെന്നും ക്ഷേത്ര പരിസരത്ത് മുസ്ലിം മത അടയാളങ്ങള് കൊണ്ടുള്ള ചിത്രീകരണം പാടില്ലെന്നും ബി.ജെ.പി പ്രവര്ത്തകര് വാദിച്ചതായും വിവരം. പോലീസ് ഇടപെട്ട് ചിത്രീകരണം നിര്ത്തിവച്ചിരിക്കുകയാണ്. ചര്ച്ചയ്ക്ക് ശേഷം ആയിരിക്കും ചിത്രീകരണം പുനരാരംഭിക്കുന്നതില് തീരുമാനമാകുക.