കോഴിക്കോട്: വനിതാ ആക്ടിവിസ്റ്റായ ബിന്ദു അമ്മിണിക്കുനേരെ വീണ്ടും ആക്രമണം. കോഴിക്കോട് നോർത്ത് ബീച്ചിൽ വെച്ച് പ്രകോപനമൊന്നുമില്ലാതെ ഒരാൾ ആക്രമിക്കുകയായിരുന്നെന്ന് ബിന്ദു അമ്മിണി പറഞ്ഞു. സംഭവത്തിൻറെ വീഡിയോ ദൃശ്യങ്ങൾ അവർ ഫേയ്സ്ബുക്കിൽ പങ്കുവെച്ചിട്ടുണ്ട്.
‘ഒരു കേസിന്റെ ആവശ്യത്തിന് കക്ഷികളുമായി നോർത്ത് ബീച്ചിൽ എത്തിയതായിരുന്നു. എന്റെ കൂടെ വന്ന ആളുകളാണെന്ന് മനസ്സിലായതോടെ ആക്രമി അവരുടെ വണ്ടി തടഞ്ഞുവെയ്ക്കുകയും പിന്നാലെ ഓടുകയും ചെയ്തു. അതിനുശേഷം ഞാൻ ഒറ്റയ്ക്ക് ആയപ്പോൾ ആക്രമണം എന്റെ നേരെയായി’, ബിന്ദു അമ്മിണി പറയുന്നു. ഇയാൾ മദ്യലഹരിയിലായിരുന്നെന്നും അവർ പറയുന്നു.
ബിന്ദു അമ്മിണി തന്റെ ഫെയ്സ്ബുക്ക് പേജിൽ പോസ്റ്റ് ചെയ്ത ആദ്യത്തെ വീഡിയോയിൽ സ്കൂട്ടറിൽ വന്ന ഒരാളുടെ ദൃശ്യങ്ങളാണുള്ളത്. കറുപ്പ് ഷർട്ടും വെള്ള മുണ്ടുമാണ് ഇയാൾ ധരിച്ചിരിക്കുന്നത്. അടുത്ത വീഡിയോയിൽ ഇയാൾ ബിന്ദു അമ്മിണിയെ ആക്രമിക്കുന്നതും അവർ തിരിച്ചു പ്രതിരോധിക്കുന്നതും കാണാം.
സംഭവത്തിൽ വെള്ളയിൽ പോലീസ് കേസെടുത്തു. അടിപിടി, സ്ത്രീകളെ അപമാനിക്കൽ എന്നീ വകുപ്പുകൾ ചുമത്തിയാണ് കേസെടുത്തിരിക്കുന്നത്. വാഹനം നിർത്തുന്നതുമായി ബന്ധപ്പെട്ട തർക്കം കൈയാങ്കളിയിൽ എത്തുകയായിരുന്നെന്ന് പോലീസ് പറയുന്നു.
ശബരിമല ദർശനം നടത്തിയതിന് പിന്നാലെ പലപ്പോഴായി ബിന്ദുവിന് നേരെ ആക്രമണം നടന്നിരുന്നു. കഴിഞ്ഞ മാസം കോഴിക്കോട് കൊയിലാണ്ടി പൊയിൽകാവിൽ ബിന്ദുവിനെ ഓട്ടോ ഇടിച്ചുവീഴ്ത്തിയിരുന്നു. മന:പൂർവ്വം ഇടിച്ചു വീഴ്ത്തിയ ശേഷം കടന്നുകളയുകയായിരുന്നെന്ന് അന്നു നൽകിയ പരാതിയിൽ ബിന്ദു പറഞ്ഞിരുന്നു. സംഭവത്തിൽ പരിക്കേറ്റ് ദിവസങ്ങളോളം അവർ ആശുപത്രിയിലായിരുന്നു.
