CRIME 👮 ഫോർട്ടുകൊച്ചിയിൽ വാഹന പരിശോധനയ്ക്കിടെ ഇരുചക്ര വാഹനം എസ്ഐയെ ഇടിച്ചിട്ട് നിർത്താതെ പോയി, പ്രതികൾക്കായി തെരച്ചിൽ ഊർജ്ജിതമാക്കി പോലീസ്

കൊച്ചി: ഫോര്‍ട്ട് കൊച്ചിയില്‍ വാഹന പരിശോധനയ്ക്കിടെ എസ്.ഐ.യെ അജ്ഞാതന്‍ ഇരുചക്രവാഹനമുപയോഗിച്ച് ഇടിച്ചിട്ട് രക്ഷപ്പെട്ടു. ഇതേത്തുടര്‍ന്ന് ഫോര്‍ട്ട് കൊച്ചി എസ്.ഐ. സന്തോഷിന്റെ കൈയൊടിഞ്ഞു. കൈ കാണിച്ചിട്ടും വാഹനം നിര്‍ത്താന്‍ യാത്രികന്‍ തയ്യാറായില്ല. സംഭവത്തിന്റെ സി.സി.ടി.വി. ദൃശ്യങ്ങള്‍ പുറത്തുവന്നു.

കഴിഞ്ഞ രാത്രിയും ഞായറാഴ്ച പുലര്‍ച്ചെയുമായി കൊച്ചിയില്‍ പോലീസിന്റെ കോമ്പിങ് ഓപ്പറേഷന്‍ നടന്നിരുന്നു. ഇതിന്റെ ഭാഗമായില്‍ ഫോര്‍ട്ട് കൊച്ചിയില്‍ വാഹന പരിശോധന നടത്തുന്നതിനിടെയാണ് പോലീസുകാരനുനേരെ ആക്രമണമുണ്ടായത്. ഇരുചക്രവാഹനം നിര്‍ത്താന്‍ ആവശ്യപ്പെട്ട് എസ്.ഐ. സന്തോഷ് കൈകാണിച്ചു. ഇതോടെ വേഗം കുറച്ച യാത്രക്കാരന്‍ പോലീസിനടുത്തെത്തിയതോടെ വാഹനം വീണ്ടും വേഗം കൂട്ടി പോലീസിനെ ഇടിച്ചിട്ടു.

വേഗം കുറച്ചുള്ള വരവുകണ്ട് വാഹനം നിര്‍ത്തുമെന്ന പ്രതീക്ഷയിലായിരുന്നു പോലീസ്. ഇടിച്ചിട്ടതിനെത്തുടര്‍ന്ന് എസ്.ഐ. നിലത്തടിച്ചു വീണു. വാഹനം പിന്തുടര്‍ന്ന് പിടികൂടാന്‍ മറ്റു പോലീസുകാര്‍ ശ്രമിച്ചെങ്കിലും പരാജയപ്പെട്ടു. തുടര്‍ന്ന് എസ്.ഐ.യെ ആശുപത്രിയിലെത്തിച്ചതോടെ കൈയൊടിഞ്ഞതായും കാലിന് പരിക്കേറ്റതായും കണ്ടെത്തി. സംഭവത്തില്‍ പോലീസ് കേസെടുത്ത് പ്രതിക്കായുള്ള അന്വേഷണം ആരംഭിച്ചു. രണ്ടുപേരാണ് ബൈക്കിലുണ്ടായിരുന്നത്.

മദ്യപിച്ച് വാഹനമോടിക്കുന്നതടക്കമുള്ള നിയമലംഘനങ്ങള്‍ തടയുന്നതിന്റെ ഭാഗമായി കൊച്ചി പോലീസിന്റെ കീഴില്‍ നടക്കുന്ന നടപടിയാണ് കോമ്പിങ് ഓപ്പറേഷന്‍. 370 പേരോളം പോലീസിന്റെ ഓപ്പറേഷനില്‍ പിടിയിലായിരുന്നു. അതില്‍ത്തന്നെ 242 പേരെ മദ്യപിച്ച് വാഹനമോടിച്ചതിനെത്തുടര്‍ന്നാണ് പിടികൂടിയത്.

അതേസമയം, കുണ്ടറയിൽ പൊലീസിനു നേരെ വടിവാൾ വീശി രക്ഷപ്പെട്ട പ്രതികളെ രണ്ടാം ദിവസവും പിടികൂടാനായില്ല.പ്രതികൾ ഒളിവിൽ കഴിഞ്ഞ കരിക്കുഴിയിലെ തുരുത്തുകളിൽ പൊലീസ് ഇന്നും പരിശോധന നടത്തി. രണ്ടു സുഹൃത്തുക്കളെ പൊലീസ് കസ്റ്റഡിയിലെടുത്തു ചോദ്യം ചെയ്യുകയാണ്. വടിവാൾ വീശി രക്ഷപ്പെട്ട പ്രതികളെ കണ്ടെത്താൻ വ്യാപക തെരച്ചിലാണ് രണ്ടാം ദിവസവും പൊലീസ് നടത്തിയത്. കുണ്ടറ, ശാസ്താംകോട്ട, ശൂരനാട്, പുത്തൂർ, ഈസ്റ്റ് കല്ലട എന്നീ സ്റ്റേഷനുകളിലെ 30 ഉദ്യോഗസ്ഥരാണ് തെരച്ചിൽ സംഘത്തിലുള്ളത്.

പടപ്പക്കരയിലെ ആൾതാമസം ഇല്ലാത്ത വീടുകൾ പൊലീസ് പരിശോധിച്ചു. കരിക്കുഴിയിൽ പ്രതികൾ ഒളിവിൽ കഴിഞ്ഞ വീടിന് സമീപമുള്ള കായലിലെ തുരുത്തുകളും ചതുപ്പ് നിറഞ്ഞ പ്രദേശങ്ങളിലും തെരച്ചിൽ നടത്തി.  വെള്ളിമണ് വഴി ഇവർ രക്ഷപെട്ടിട്ടുണ്ടോ എന്നും പൊലീസ് സംശയിക്കുന്നുണ്ട്.

പ്രതികൾക്ക് സഹായം നൽകിയെന്ന് കരുതുന്ന രണ്ടു സുഹൃത്തുക്കളെ പൊലീസ് കസ്റ്റഡിയിലെടുത്ത് ചോദ്യം ചെയ്യുകയാണ്. ഇന്നലെ പുലർച്ചയായിരുന്നു അടൂർ റസ്റ്റ് ഹൗസ് മർദ്ദനക്കേസ് പ്രതികളായ ലൂയി പ്ലാസിഡിനെയും ആൻറണി ദാസിനെയും പിടികൂടാൻ ഇൻഫോപാർക്ക് പൊലീസ് കുണ്ടറ കരിക്കുഴിയിലെത്തിയത്. എന്നാൽ പ്രതികൾ വടിവാൾ വീശി ഭീകരാന്തരീക്ഷം സൃഷ്ടിച്ച് രക്ഷപ്പെടുകയായിരുന്നു.