ബിഹാറിൽ കോൺഗ്രസിന് കനത്ത തിരിച്ചടി; രാജ്യസഭാ തിരഞ്ഞെടുപ്പിൽ എംഎൽഎമാർ കൂറുമാറി

പട്ന: ബിഹാറിൽ രാജ്യസഭാ തിരഞ്ഞെടുപ്പിനിടെ കോൺഗ്രസ് എംഎൽഎമാർ കൂറുമാറിയത് ബിജെപിക്ക് കരുത്താകുന്നു. ആറ് അംഗങ്ങൾ മാത്രമാണ് നിയമസഭയിൽ കോൺഗ്രസിനുള്ളത്.  ഇതിൽ മൂന്ന് എംഎൽഎമാർ ബിജെപി സ്ഥാനാർഥിക്ക് അനുകൂലമായി വോട്ട് ചെയ്തത് പാർട്ടിയെ വലിയ പ്രതിസന്ധിയിലാക്കിയിരിക്കുകയാണ്. കൂറുമാറി വോട്ടുചെയ്തവർ ബിജെപിയിലേക്ക് പോയേക്കുമെന്നാണ് സൂചനകൾ. 

കോൺഗ്രസ് നിയമസഭാ കക്ഷിയിൽ നിലവിൽ നേതാവോ വിപ്പോ ഇല്ലാത്തത് പാർട്ടിയിലെ അച്ചടക്കമില്ലായ്മയ്ക്ക് കാരണമായിട്ടുണ്ടെന്നാണ് വിമർശനം ഉയരുന്നത്. ഇത്തരമൊരു നേതൃശൂന്യത പാർട്ടിയിൽ ഒരു പിളർപ്പിനുള്ള സാധ്യതയ്ക്കും വഴി തുറക്കുന്നു.

ആറ് പേരിൽ നാല് പേർ പാർട്ടി വിടുകയാണെങ്കിൽ കൂറുമാറ്റ നിരോധന നിയമപ്രകാരമുള്ള അയോഗ്യതയിൽ നിന്നും അവർക്ക് രക്ഷപ്പെടാൻ സാധിച്ചേക്കും എന്നത് ബിജെപിക്ക് അനുകൂലമായ ഘടകമാണ്. ആയതിനാൽ ഒരു കോൺഗ്രസ് നേതാവ് കൂടി നിരീക്ഷണത്തിലാണെന്നാണ് റിപ്പോർട്ടുകൾ.

നിലവിൽ ബിഹാർ നിയമസഭയിൽ 89 എംഎൽഎമാരുള്ള ബിജെപിക്ക് സഖ്യകക്ഷികളിലെ 28 പേരുടെ പിന്തുണ കൂടി ചേരുമ്പോൾ ആകെ 117 പേരുടെ പിന്തുണയുണ്ട്. കേവല ഭൂരിപക്ഷത്തിന് ആവശ്യമായ 122 സീറ്റുകളിലേക്ക് ഇനി അഞ്ച് സീറ്റുകളുടെ കുറവ് മാത്രമാണുള്ളത്. നാല് കോൺഗ്രസ് എംഎൽഎമാർ കൂടി ബിജെപി പാളയത്തിലെത്തിയാൽ, ജനതാദൾ യുണൈറ്റഡിന്റെ (ജെഡിയു) പിന്തുണയില്ലാതെ തന്നെ ഭൂരിപക്ഷത്തിന് തൊട്ടടുത്ത് (121 സീറ്റുകൾ) എത്താൻ ബിജെപി സഖ്യത്തിന് സാധിക്കും.

മാർച്ച് 16-ന് നടന്ന രാജ്യസഭാ തിരഞ്ഞെടുപ്പിൽ ബിഹാറിലെ അഞ്ച് സീറ്റുകളിലും എൻഡിഎ വിജയിച്ചിരുന്നു. സംസ്ഥാന രാഷ്ട്രീയത്തിൽ ജെഡിയുവിനോടുള്ള ആശ്രയത്വം കുറയ്ക്കാൻ ഈ പുതിയ നീക്കങ്ങൾ ബിജെപിയെ സഹായിക്കുമെങ്കിലും, ദേശീയ തലത്തിൽ സാഹചര്യം വ്യത്യസ്തമാണ്. കേന്ദ്ര ഗവൺമെന്റിന്റെ നിലനിൽപ്പിന് ജെ.ഡി.യുവിന്റെ 12 എംപിമാരുടെ പിന്തുണ അനിവാര്യമാണ്.

English Summary

In a major setback for the Congress party in Bihar, half of its MLAs cross-voted in favor of the BJP candidate during the Rajya Sabha elections. Out of the six Congress MLAs in the state assembly, three supported the BJP, pushing the party into a severe crisis. Reports suggest these MLAs are likely to officially join the BJP soon. Critics point out that the absence of a legislative party leader or a Whip has led to gross indiscipline and a leadership vacuum, potentially leading to a formal split in the Bihar unit of the Congress.