ബെംഗളൂരു: സമൂഹത്തിൽ മാന്യനായ ബിസിനസുകാരനെന്ന വ്യാജേന ഉന്നത വനിതാ ഉദ്യോഗസ്ഥരെ ലൈംഗികമായി ചൂഷണം ചെയ്യുകയും ദൃശ്യങ്ങൾ പകർത്തി ബ്ലാക്ക്മെയിൽ ചെയ്യുകയും ചെയ്ത 51-കാരൻ പിടിയിലായി. കൃപലാനി എന്നറിയപ്പെടുന്ന ഇയാളുടെ കെണിയിൽ കസ്റ്റംസ്, ജിഎസ്ടി തുടങ്ങിയ വകുപ്പുകളിലെ അമ്പതോളം ഉന്നത ഉദ്യോഗസ്ഥർ വീണതായാണ് പുറത്തുവരുന്ന ഞെട്ടിക്കുന്ന വിവരം. കേന്ദ്ര സർക്കാർ സർവീസിലുള്ള സ്ത്രീകളുമായി ആസൂത്രിതമായി സൗഹൃദം സ്ഥാപിച്ച ശേഷം ആഡംബര പാർട്ടികളിലേക്ക് ക്ഷണിച്ചായിരുന്നു ഇയാളുടെ ചതിപ്രയോഗം.
വിവാഹ വാഗ്ദാനം നൽകി പീഡിപ്പിക്കുകയും ബെഡ്റൂമിലെ സ്വകാര്യ നിമിഷങ്ങൾ മൊബൈൽ ഫോണിൽ രഹസ്യമായി പകർത്തി സൂക്ഷിക്കുകയുമായിരുന്നു ഇയാളുടെ രീതി. മാനഹാനി ഭയന്ന് പലരും പരാതി നൽകാൻ മടിച്ചതാണ് കൃപലാനിക്ക് തട്ടിപ്പ് തുടരാൻ വളമായത്.
കസ്റ്റംസ് വകുപ്പിലെ 42-കാരിയായ ഉദ്യോഗസ്ഥ നൽകിയ പരാതിയിലാണ് ഇയാളുടെ ക്രൂരതകൾ പുറംലോകമറിഞ്ഞത്. പരാതിക്കാരിയുമായി അടുപ്പത്തിലായ ഇയാൾ സ്വകാര്യ ദൃശ്യങ്ങൾ കാട്ടി അവരെ ഭീഷണിപ്പെടുത്താൻ തുടങ്ങി. തന്റെ ബിസിനസിലെ നികുതി വെട്ടിക്കാനായി ഇവരുടെ ഔദ്യോഗിക പദവി ദുരുപയോഗം ചെയ്യാൻ ശ്രമിച്ച കൃപലാനി, ഒടുവിൽ 18 ലക്ഷം രൂപ ആവശ്യപ്പെട്ടതോടെയാണ് യുവതി പോലീസിനെ സമീപിക്കാൻ ധൈര്യം കാണിച്ചത്. കൃപലാനിയുടെ അറസ്റ്റിന് പിന്നാലെ ഇയാളുടെ മൊബൈൽ ഫോൺ പരിശോധിച്ച പോലീസിന് അക്ഷരാർത്ഥത്തിൽ അശ്ലീല വീഡിയോകളുടെ വൻ ശേഖരമാണ് ലഭിച്ചത്. വിവിധ വകുപ്പുകളിലെ ഉന്നത പദവികൾ അലങ്കരിക്കുന്ന 50-ഓളം സ്ത്രീകളുടെ ദൃശ്യങ്ങൾ ഫോണിൽ കണ്ടെത്തിയിട്ടുണ്ട്.
സ്ത്രീകളെ ലൈംഗികമായി ചൂഷണം ചെയ്യുന്നതിനൊപ്പം അവരുടെ സ്വാധീനം ഉപയോഗിച്ച് വഴിവിട്ട ബിസിനസ് നേട്ടങ്ങൾ കൊയ്യാനും ഇയാൾ മിടുക്കനായിരുന്നു. ഭീഷണിക്ക് വഴങ്ങി ഏതെങ്കിലും ഉദ്യോഗസ്ഥർ ഇയാൾക്ക് ഔദ്യോഗികമായ സഹായങ്ങൾ നൽകിയിട്ടുണ്ടോ എന്ന കാര്യവും പോലീസ് അതീവ ഗൗരവത്തോടെ അന്വേഷിക്കുന്നുണ്ട്. കൂടുതൽ ഇരകൾ പരാതിയുമായി മുന്നോട്ടുവരുമെന്നാണ് പോലീസ് പ്രതീക്ഷിക്കുന്നത്. ബെംഗളൂരു പോലീസിന്റെ പ്രത്യേക സംഘം കേസന്വേഷണം ഊർജിതമാക്കിയിട്ടുണ്ട്. സമൂഹത്തിലെ ഉന്നത തലങ്ങളിൽ സ്വാധീനമുള്ള ഇയാൾ മുൻപും സമാനമായ രീതിയിൽ തട്ടിപ്പുകൾ നടത്തിയിട്ടുണ്ടോ എന്ന കാര്യവും അന്വേഷണ പരിധിയിലുണ്ട്.
A 51-year-old businessman named Kripalani was arrested in Bengaluru for allegedly trapping and blackmailing around 50 high-ranking female officials, including those from Customs and GST departments. He befriended the officials, recorded private moments under the guise of marriage proposals, and used the footage to demand money and official favors. The racket came to light after a 42-year-old Customs official filed a police complaint following an extortion attempt of 18 lakh rupees.