![](https://breakingkerala.com/wp-content/uploads/2022/12/electric-scooter-showroom-fire-accident-payyannoor.jpg)
പയ്യന്നൂര്: കണ്ണൂർ പയ്യന്നൂര് നഗരസഭയ്ക്കടുത്ത പിലാത്തറയില് ഇലക്ട്രിക് സ്കൂട്ടര് ഷോറൂം കത്തി നശിച്ചു. പിലാത്തറയിലെ റൂട്ട്മാര്സ് ട്രേഡേഴ്സ് ഷോറൂമിലാണ് ഇന്നലെ വൈകുന്നേരം അഞ്ചുമണിയോടെ തീപിടിത്തമുണ്ടായത്. ഇലക്ട്രിക് സ്കൂട്ടറിന്റെ ബാറ്ററി റീചാര്ജ് ചെയ്തു കൊണ്ടിരിക്കെ പൊട്ടിത്തെറിച്ചു.
ബാറ്ററി പൊട്ടിത്തെറിച്ചു തീപിടിച്ച സമയത്ത് ജീവനക്കാര് ഷോ റൂമിൽ ഉണ്ടായിരുന്നു. ഉടൻ തന്നെ ഷോ റൂമിൽ സൂക്ഷിച്ചിരുന്ന സ്കൂട്ടറുകള് പുറത്തേക്ക് മാറ്റിയതിനാല് വന് ദുരന്തമൊഴിവായി. ഷോ റൂമിനകത്തുണ്ടായിരുന്ന നിരവധി ബാറ്ററികളും മറ്റു ഉപകരണങ്ങളും കത്തിനശിച്ചു. ഷോറൂമിന്റെ ചുമരുകള്ക്കും ഉപകരണങ്ങള്ക്കും നാശനഷ്ടം സംഭവിച്ചു. പൊട്ടിത്തെറിയുടെ ആഘാതത്തില് ഷോറൂമിന്റെ ചുമരുകള് വിണ്ടു കീറി.
തലനാരിഴയ്ക്കാണ് ജീവനക്കാര് അപകടത്തില് നിന്നും രക്ഷപ്പെട്ടത്. പയ്യന്നൂര് അഗ്നിശമന നിലയത്തില് നിന്നും സ്റ്റേഷന് ഓഫീസര് ടി കെ സന്തോഷ് കുമാറിന്റെ നേതൃത്വത്തിലെത്തിയ സംഘം എത്തിയാണ് തീയണച്ചത്. മേലെത്തടം മുരളീധരന്, മഹേഷ് എന്നിവരുടെ ഉടമസ്ഥതയിലുള്ള ഷോറൂം അടുത്തകാലത്താണ് പ്രവര്ത്തനം തുടങ്ങിയത്.