ജബൽപുർ: മധ്യപ്രദേശിലെ ബർഗി ഡാമിൽ വിനോദസഞ്ചാര ബോട്ട് തകർന്നുണ്ടായ ദുരന്തത്തിൽ നിന്ന് ജീവൻ തിരിച്ചുകിട്ടിയവർ ഇപ്പോഴും ആ നടുക്കത്തിൽ നിന്നും മുക്തരായിട്ടില്ല. സന്തോഷത്തിന്റെ നിമിഷങ്ങൾ എങ്ങനെയാണ് നിമിഷനേരം കൊണ്ട് മരണഭീതിയായി മാറിയതെന്ന് രക്ഷപ്പെട്ടവർ ഓർത്തെടുക്കുന്നു. ശനിയാഴ്ച നടന്ന തിരച്ചിലിൽ രണ്ട് കുട്ടികളുടെ മൃതദേഹങ്ങൾ കൂടി കണ്ടെടുത്തതോടെ ദുരന്തത്തിൽ മരിച്ചവരുടെ എണ്ണം 11 ആയി ഉയർന്നു. കാലാവസ്ഥാ മുന്നറിയിപ്പ് അവഗണിച്ചതാണ് അപകടത്തിന് കാരണമെന്ന് രക്ഷപ്പെട്ട യാത്രക്കാർ ആരോപിക്കുന്നു.
കുടുംബത്തോടൊപ്പം അത്ഭുതകരമായി രക്ഷപ്പെട്ട അഡ്വ. റോഷൻ ആനന്ദ് വർമ ആ ഭീകര നിമിഷങ്ങളെക്കുറിച്ച് വിവരിക്കുന്നത് ഇങ്ങനെ: “ശക്തമായ തിരമാലകളിൽ പെട്ട് ക്രൂസ് ബോട്ട് ആടിയുലയാൻ തുടങ്ങിയതോടെ കസേരകളും മേശകളും തലകീഴായി മറിഞ്ഞു. ബോട്ടിനുള്ളിൽ സ്ത്രീകളും കുട്ടികളും നിലവിളിക്കുകയായിരുന്നു. അരമണിക്കൂറോളം കടുത്ത പരിഭ്രാന്തിയിലൂടെയാണ് ഞങ്ങൾ കടന്നുപോയത്.” ബോട്ട് തകർന്ന് വെള്ളം ഉള്ളിലേക്ക് കയറുമ്പോഴും ലൈഫ് ജാക്കറ്റുകൾ ധരിക്കാൻ കാണിച്ച മനക്കരുത്താണ് റോഷനെയും കുടുംബത്തെയും രക്ഷിച്ചത്. 11 വയസ്സുള്ള കുട്ടിയെ ചേർത്തുപിടിച്ച് നീന്തിയാണ് അവർ കരയ്ക്ക് എത്തിയത്.
ജീവനക്കാരുടെ ഭാഗത്തുനിന്നുണ്ടായ അനാസ്ഥയാണ് ദുരന്തത്തിന്റെ ആഴം കൂട്ടിയതെന്ന് വർമ കുറ്റപ്പെടുത്തുന്നു. അപകടസമയത്ത് യാതൊരുവിധ നിർദ്ദേശങ്ങളോ സഹായമോ ജീവനക്കാരിൽ നിന്ന് ലഭിച്ചില്ല. രക്ഷാപ്രവർത്തനം കൃത്യസമയത്ത് നടത്തിയിരുന്നെങ്കിൽ കൂടുതൽ പേരെ രക്ഷിക്കാമായിരുന്നു. മോശം കാലാവസ്ഥയിൽ ബോട്ട് സർവീസ് നടത്താൻ അനുമതി നൽകിയ ഉദ്യോഗസ്ഥർക്കെതിരെ നടപടി വേണമെന്നും ടൂറിസം മന്ത്രി രാജിവെക്കണമെന്നും അദ്ദേഹം ആവശ്യപ്പെട്ടു.
ദുരന്തത്തിൽ നിന്ന് രക്ഷപ്പെട്ട സവിത വർമ പങ്കുവെക്കുന്നത് ആശുപത്രി അധികൃതരുടെ ക്രൂരമായ സമീപനമാണ്. വർഷങ്ങൾക്ക് ശേഷം ഇസ്രായേലിൽ നിന്ന് അവധിക്ക് നാട്ടിലെത്തിയതായിരുന്നു ഇവർ. ചികിത്സ നൽകുന്നതിന് പകരം പേരും വിലാസവും ചോദിക്കാനാണ് ആശുപത്രി അധികൃതർ താൽപ്പര്യം കാട്ടിയത്. വേണ്ടത്ര ചികിത്സ നൽകാതെ തന്നെ 4,700 രൂപയുടെ ബില്ലാണ് അധികൃതർ ആദ്യം നൽകിയത്. ഓൺലൈൻ പേയ്മെന്റ് സൗകര്യം പോലുമില്ലാത്ത ആശുപത്രിയിൽ ഒടുവിൽ വാരണാസിയിലുള്ള സഹോദരനെ വിളിച്ചാണ് പണം കൈമാറിയത്.
സംഭവത്തിൽ മധ്യപ്രദേശ് സർക്കാർ ഉന്നതതല അന്വേഷണം പ്രഖ്യാപിച്ചിട്ടുണ്ട്. അപകടത്തിൽപ്പെട്ടവർക്ക് നഷ്ടപരിഹാരം പ്രഖ്യാപിച്ചെങ്കിലും ഉത്തരവാദികളായ ഉദ്യോഗസ്ഥർക്കെതിരെ കൊലക്കുറ്റത്തിന് കേസെടുക്കണമെന്ന ആവശ്യം ശക്തമാണ്. ബർഗി ഡാമിലെ വിനോദസഞ്ചാര ബോട്ടുകളുടെ സുരക്ഷാ മാനദണ്ഡങ്ങൾ പുനഃപരിശോധിക്കുമെന്ന് അധികൃതർ അറിയിച്ചു. കാണാതായവർക്കായി തിരച്ചിൽ ഇപ്പോഴും തുടരുകയാണ്.
The death toll in the Bargi Dam boat tragedy in Madhya Pradesh has risen to 11 as survivors share harrowing accounts of their escape. Survivors alleged that the cruise operated despite weather warnings and accused the crew of negligence and hospital authorities of apathy. While the government has announced compensation, demands for strict action against responsible officials and the tourism minister are growing.