ഇടുക്കി: സുഹൃത്തുക്കൾക്കൊപ്പം പീരുമേട് പരുന്തുംപാറയിലെത്തിയ യുവാവിനെ കൊക്കയിൽ മരിച്ച നിലയിൽ കണ്ടെത്തി. അടൂരിൽനിന്നു വിനോദസഞ്ചാരത്തിനെത്തിയ സംഘത്തിലെ തെങ്ങമം സ്വദേശി റോബിന്റെ മൃതദേഹമാണ് ഇന്ന് കണ്ടെത്തിയത്.
വിനോദസഞ്ചാര കേന്ദ്രത്തിലെത്തിയ റോബിൻ കൊക്കയിലേക്ക് ചാടി ആത്മഹത്യ ചെയ്യുകയായിരുന്നുവെന്നാണ് പ്രാഥമിക വിവരം. പീരുമേട് പോലീസിന്റെയും ഫയർ ഫോഴ്സിന്റെയും നേതൃത്വത്തിൽ നടത്തിയ തെരച്ചിലിലാണ് മൃതദേഹം കണ്ടെത്തിയത്.
തിങ്കളാഴ്ച രാത്രി 10 മണിയോടുകൂടിയാണ് സംഭവം നടന്നത്. അടുരിൽനിന്ന് അഞ്ചുപേരടങ്ങുന്ന സുഹൃത്തുക്കൾക്കൊപ്പം പരുന്തുംപാറയിലെത്തിയ റോബിൻ മൂത്രം ഒഴിക്കുവാനെന്ന വ്യാജേന കൊക്കയ്ക്ക് സമീപം പോകുകയും കൊക്കയിലേക്ക് ചാടുകയുമായിരുന്നുവെന്നുമാണ് പീരുമേട് പോലീസ് നൽകുന്ന പ്രാഥമിക വിവരം.
കുടുംബപരമായ വിഷയങ്ങളിൽ മാനസിക സമ്മർദമുണ്ടായിരുന്നതിനാൽ റോബിൻ തങ്ങൾക്കൊപ്പം പരുന്തുംപാറയിലേക്ക് വിനോദസഞ്ചാരത്തിനായി എത്തുകയായിരുന്നുവെന്നു സുഹൃത്തുക്കൾ പോലീസിന് മൊഴി നൽകിയിട്ടുണ്ട്.
പീരുമേട് ഫയർ ഫോഴ്സിന്റെയും പോലീസിന്റെയും നേതൃത്വത്തിൽ ഇന്ന് രാവിലെ നടത്തിയ പരിശോധനയിലാണ് റോബിന്റെ മൃതദേഹം കണ്ടെത്തിയത്. പീരുമേട് പോലീസിന്റെ നേതൃത്വത്തിൽ ഇൻക്വസ്റ്റ് തയ്യാറാക്കി നടപടികൾക്ക് ശേഷം മൃതദേഹം അടൂരിലേക്ക് അയച്ചു.