തിരുവനന്തപുരം: പ്രതിപക്ഷ നേതാവ് വി.ഡി സതീശനെതിരേ രൂക്ഷ വിമര്ശനവുമായി ഗവര്ണര് ആരിഫ് മുഹമ്മദ് ഖാന്. പ്രതിക്ഷ നേതാവ് മറുപടി അര്ഹിക്കുന്നില്ല. അദ്ദേഹം സര്ക്കാരിന്റെ അടുത്തയാളാണ്. സതീശന് രാജാവിനോട് (കിംഗ്) കാര്യങ്ങള് ചോദിച്ചു മനസിലാക്കാമല്ലോയെന്നും പിണറായിയെ ചൂണ്ടി പരിഹാസ സ്വരത്തില് ഗവര്ണര് പറഞ്ഞു.
തന്റെ വാ മൂടിക്കെട്ടിയിരിക്കുകയാണ്. രാജ്യത്തിന്റെ യശസിനെ ബാധിക്കുന്ന ഒരു കാര്യവും താന് വെളിപ്പെടുത്തില്ല. രാജ്യത്തിന്റെ പ്രതീകങ്ങളോട് അങ്ങേയറ്റം ബഹുമാനം കാണിക്കേണ്ടതുണ്ടെന്നും ഗവര്ണര് മാധ്യമങ്ങളോട് പറഞ്ഞു. നിയമസഭ പ്രത്യേക സമ്മേളനം വിളിച്ച് ചാന്സലര് ചുമതല മാറ്റണമെന്നും അദ്ദേഹം പറഞ്ഞു.
നേരത്തെ ഗവര്ണര്ക്ക് എതിരെ പ്രതിപക്ഷ നേതാവ് വി.ഡി സതീശന് രംഗത്ത് എത്തിയിരുന്നു. ഗവര്ണര് ചുമതല നിര്വഹിക്കുന്നില്ലെന്നായിരുന്നു സതീശന്റെ വിമര്ശം. ഡി ലിറ്റ് ശിപാര്ശ ഗവര്ണര് സ്വകാര്യമായി പറഞ്ഞാല് പോരെന്നും സതീശന് പറഞ്ഞു.