ഹൈദരാബാദ്: ഈ കഴിഞ്ഞ ഡിസംബറില്‍ റിലീസ് ചെയ്തു വമ്പന്‍ വിജയം നേടിയ തെലുങ്കു ചിത്രമാണ് അല്ലു അര്‍ജുന്‍ നായകനായി എത്തിയ പുഷ്പ. സുകുമാര്‍ ഒരുക്കിയ ഈ ചിത്രം ഇന്ത്യ മുഴുവന്‍ തരംഗമായി മാറി എന്ന് മാത്രമല്ല, അല്ലു അര്‍ജുന്റെ കരിയറിലെ തന്നെ ഏറ്റവും വലിയ ഹിറ്റായി മാറി. രണ്ടു ഭാഗങ്ങള്‍ ഉള്ള ഈ ചിത്രത്തിലെ വില്ലനായി എത്തിയത് മലയാളി താരം ഫഹദ് ഫാസില്‍, നായികാ വേഷം ചെയ്തത് രശ്മിക മന്ദാന എന്നിവരാണ്. ഇതിന്റെ രണ്ടാം ഭാഗത്തിന്റെ ഷൂട്ടിംഗ് ഈ അടുത്തിടെയാണ് ആരംഭിച്ചത്.
എന്നാല്‍ ഇപ്പോള്‍ ആ ഷൂട്ടിംഗ് നിര്‍ത്തി വെച്ചിരിക്കുകയാണ് എന്ന വാര്‍ത്തകള്‍ ആണ് വരുന്നത്. അതിനു കാരണം കന്നഡ ചിത്രമായ കെ ജി എഫ് 2 നേടിയ ബ്രഹ്മാണ്ഡ വിജയം ആണെന്നും റിപ്പോര്‍ട്ടുകള്‍ സൂചിപ്പിക്കുന്നു. ഇനി പുഷ്പ 2 ശ്രദ്ധ നേടണം എങ്കില്‍, അത് കെ ജി എഫ് 2 നു മുകളില്‍ നില്‍ക്കുന്ന ചിത്രം ആവണമെന്നും അതിനു വേണ്ടി തിരക്കഥയില്‍ കൂടുതല്‍ മാറ്റങ്ങള്‍ വരുത്തണമെന്നുമുള്ള സംവിധായകന്റ്‌റെ ആവശ്യപ്രകാരമാണ് ഷൂട്ടിംഗ് നിര്‍ത്തിയത് എന്നും മാധ്യമങ്ങള്‍ റിപ്പോര്‍ട്ട് ചെയ്യുന്നു.
പ്രശാന്ത് നീല്‍ ഒരുക്കിയ കെ ജി എഫ് 2 ഇപ്പോള്‍ ആയിരം കോടിയിലേക്കു ആണ് കുതിക്കുന്നത്. റോക്കിങ് സ്റ്റാര്‍ യാഷ് നായകനായി എത്തിയ ഈ ചിത്രത്തിന്റെ ആദ്യ ഭാഗം ഇരുനൂറു കോടിക്കു മുകളില്‍ മാത്രമായിരുന്നു നേടിയത്. എന്നാല്‍ രണ്ടാം ഭാഗം അഞ്ചു ഭാഷകളില്‍ എത്തി ഇന്ത്യന്‍ സിനിമയിലെ തന്നെ ഏറ്റവും വലിയ ഹിറ്റുകളുടെ ലിസ്റ്റില്‍ ഇടം പിടിച്ചു. ബോളിവുഡ് താരം സഞ്ജയ് ദത്, രവീണ ടണ്ഠന്‍, ശ്രീനിഥി ഷെട്ടി, പ്രകാശ് രാജ് തുടങ്ങി ഒട്ടേറേ വലിയ താരങ്ങള്‍ ഈ ചിത്രത്തിന്റെ താരനിരയില്‍ ഉണ്ടായിരുന്നു. ഏതായാലും പുഷ്പ 2 നിര്‍ത്തി വെച്ച സാഹചര്യത്തില്‍ പുതിയ ചിത്രം ചെയ്യാനുള്ള ഒരുക്കത്തിലാണ് അല്ലു അര്‍ജുന്‍.
ബ്രഹ്മാണ്ഡ കന്നഡ ചിത്രമായ കെ ജി എഫ് 2 ഇന്ത്യന്‍ സിനിമയിലെ തന്നെ ഏറ്റവും വലിയ വിജയങ്ങളില്‍ ഒന്നായി കുതിക്കുകയാണ്, ആയിരം കോടി ആഗോള കളക്ഷന്‍ എന്ന മാര്‍ക്കിലേക്കു കുതിക്കുന്ന ഈ ചിത്രത്തിന്റെ ഹിന്ദി പതിപ്പ് മാത്രം മുന്നൂറു കോടിയോളം നേടിക്കഴിഞ്ഞു. തമിഴ്‌നാട്ടിലും റെക്കോര്‍ഡ് കളക്ഷന്‍ നേടുന്ന ഈ ചിത്രം ഇപ്പോള്‍ കേരളാ ബോക്‌സ് ഓഫീസിലും ഒരു അപൂര്‍വ റെക്കോര്‍ഡ് നേടിക്കഴിഞ്ഞു.
കേരളത്തില്‍ നിന്ന് മാത്രം അമ്പതു കോടി കളക്ഷന്‍ നേടുന്ന നാലാമത്തെ മാത്രം ചിത്രമായി കെ ജി എഫ് 2 മാറിക്കഴിഞ്ഞു. പുലി മുരുകന്‍, ബാഹുബലി 2, ലൂസിഫര്‍ എന്നിവയാണ് കേരളത്തില്‍ നിന്ന് മാത്രം ഇതിനു മുന്‍പ് അമ്പതു കോടിക്കു മുകളില്‍ കളക്ഷന്‍ നേടിയ ചിത്രങ്ങള്‍. 86 കോടി കേരളത്തില്‍ നിന്നും നേടിയ മോഹന്‍ലാല്‍- വൈശാഖ് ചിത്രം പുലി മുരുകന്‍ ഒന്നാമത് നില്‍ക്കുന്ന ഈ ലിസ്റ്റില്‍ രണ്ടാം സ്ഥാനം 75 കോടി കേരളത്തില്‍ നിന്ന് നേടിയ ബാഹുബലി 2 എന്ന രാജമൗലി ചിത്രത്തിന് ആണ്.
മോഹന്‍ലാല്‍- പൃഥ്വിരാജ് ചിത്രമായ ലൂസിഫര്‍ 67 കോടി നേടിയാണ് ഈ ലിസ്റ്റില്‍ മൂന്നാമത് നില്‍ക്കുന്നത്. ഇപ്പോള്‍ അന്പതു കോടി ഇവിടെ നിന്ന് പിന്നിട്ട കെ ജി എഫ് 2 അതോടൊപ്പം ഈ വര്‍ഷത്തെ കേരളത്തിലെ ഏറ്റവും വലിയ ബോക്‌സ് ഓഫീസ് ഹിറ്റുമായി മാറി. മമ്മൂട്ടി നായകനായ ഭീഷ്മ പര്‍വ്വം നേടിയ നാല്‍പതു കോടിക്കു മുകളില്‍ ഉള്ള കേരളാ ഗ്രോസ് ആണ് കെ ജി എഫ് 2 മറികടന്നത്. പ്രശാന്ത് നീല്‍ ഒരുക്കിയ ഈ ചിത്രത്തില്‍ നായകനായി എത്തിയത് റോക്കിങ് സ്റ്റാര്‍ യാഷ് ആണ്. മലയാളത്തിന്റെ യുവ സൂപ്പര്‍ താരം പൃഥ്വിരാജ് സുകുമാരന്‍ ആണ് ഈ ചിത്രം കേരളത്തില്‍ തന്റെ പ്രൊഡക്ഷന്‍ ബാനറില്‍ വിതരണം ചെയ്തത്.
