ഹൈദരാബാദ്‌:മദ്യ കമ്പനിയുടെ പരസ്യ ഓഫര്‍ ബഹിഷ്‌കരിച്ച് തെന്നിന്ത്യന്‍ നടന്‍ അല്ലു അര്‍ജുന്‍. പത്ത് കോടി രൂപയുടെ ഓഫര്‍ ആണ് താരം നിരസിച്ചിരിക്കുന്നത്. തന്റെ തീരുമാനം ആരാധകരില്‍ തെറ്റായ സ്വാധീനം ഉണ്ടാക്കുമെന്നതിനാലാണ് താരം കോടികളുടെ ഓഫര്‍ വേണ്ടെന്നുവച്ചത്. ട്രേഡ് അനലിസ്റ്റ് മനോബാലയാണ് ഇക്കാര്യം റിപ്പോര്‍ട്ട് ചെയ്തിട്ടുള്ളത്.
മുമ്പ് പുകയില പരസ്യത്തില്‍ നിന്നും നടന്‍ പിന്മാറിയത് വാര്‍ത്തകളില്‍ ഇടം നേടിയിരുന്നു. പ്രമുഖ പുകയില കമ്പനി കോടികള്‍ വാഗ്ദാനം ചെയ്തു എങ്കിലും പരസ്യം താരം വേണ്ടെന്നു വെക്കുകയായിരുന്നു.
താന്‍ വ്യക്തിപരമായി പുകയില ഉല്‍പ്പന്നങ്ങള്‍ ഉപയോഗികാറില്ല എന്നും ആരോഗ്യത്തിന് ഹാനികരവും ആസക്തിയിലേക്കും നയിച്ചേക്കാവുന്ന ഇവയുടെ പരസ്യം കണ്ട് ആരാധകര്‍ ഉല്‍പ്പന്നം കഴിക്കാന്‍ തുടങ്ങണമെന്ന് താന്‍ ആഗ്രഹിക്കുന്നില്ലെന്നാണ് നടന്റെ പ്രതികരണം.
പരസ്യം വഞ്ചനാപരവും തെറ്റായ വിവരങ്ങള്‍ നല്‍കുന്നതുമാണെന്ന് ചൂണ്ടിക്കാട്ടി സാമൂഹിക പ്രവര്‍ത്തകനായ കോത ഉപേന്ദര്‍ റെഡ്ഡി ഹൈദരാബാദിലെ അംബര്‍പേട്ട് പൊലീസില്‍ പരാതി നല്‍കിയിട്ടുണ്ട്‌.
സിനിമകള്‍ വിജയിക്കുന്നതോടെ പരസ്യങ്ങള്‍ക്ക് മോഡലാവാനും ബ്രാന്‍ഡുകളുടെ അംബാസിഡര്‍മാരാവാനുമൊക്കെ താരങ്ങളെ സമീപിക്കുന്ന പരസ്യ കമ്പനികള്‍ ഇന്നൊരു സ്ഥിരം കാഴ്ചയാണ്. ബോളിവുഡ് താരം ഐശ്വര്യാ റായി മുതല്‍ മലയാളത്തിന്റെ സ്വന്തം മഞ്ജു വാര്യര്‍ വരെ ഇന്ന് പരസ്യ ചിത്രങ്ങളിലെ സജീവ സാന്നിധ്യമാണ്. അടുത്തിടെ പാന്‍മസാല ബ്രാന്‍ഡിന്റെ പരസ്യത്തില്‍ അഭിനയിച്ച ഹിന്ദി നടന്‍ അക്ഷയ് കുമാര്‍ ഈയിടെ ഏറെ വിമര്‍ശനങ്ങള്‍ ഏറ്റുവാങ്ങുകയും ചെയ്തു. വിവാദം കടുത്തപ്പോള്‍ അക്ഷയ് മാപ്പപേക്ഷയുമായി രംഗത്തെത്തി. താന്‍ ഇനി ഒരിക്കലും ഈ തെറ്റ് ആവര്‍ത്തിക്കുകയില്ലെന്നും പരസ്യത്തിന് ലഭിച്ച പണം മുഴുവന്‍ കാരുണ്യപ്രവര്‍ത്തനങ്ങള്‍ക്ക് ഉപയോഗിക്കുമെന്നും അക്ഷയ് കുമാര്‍ പറഞ്ഞിരുന്നു.
കോടികള്‍ പ്രതിഫലം ലഭിച്ചേക്കാവുന്ന പാന്‍ മസാല പരസ്യം കെ.ജി.എഫിലൂടെ റോക്ക് സ്റ്റാറായ യാഷ് വേണ്ടെന്ന് വെച്ച വാര്‍ത്ത അടുത്തിടെ പുറത്ത് വന്നിരുന്നു. യാഷിനെപ്പോലെ തന്നെ മറ്റ് ചില താരങ്ങളും കോടികള്‍ പ്രതിഫലം ലഭിക്കുന്ന പരസ്യങ്ങള്‍ ഉപേക്ഷിച്ചിട്ടുണ്ട്. അവരില്‍ ചിലരാണ് രണ്‍ബീര്‍ കപൂര്‍, ഇമ്രാന്‍ ഹാഷ്മി, സായ് പല്ലവി, അനുഷ്‌ക ശര്‍മ, സുഷാന്ത് സിംങ്, അഭിഷേക് ബച്ചന്‍, സണ്ണി ലിയോണ്‍ എന്നിവര്‍.
കോടികള്‍ വാഗ്ദാനം ചെയ്ത ഫെയര്‍നെസ്സ് ക്രീം പരസ്യം തെന്നിന്ത്യന്‍ താരം സായ് പല്ലവി വേണ്ടെന്നു വെച്ചത് നേരത്തേ തന്നെ വലിയ വാര്‍ത്തയായിരുന്നു. രണ്ട് കോടി രൂപയാണ് സായ് പല്ലവിക്ക് ഫെയര്‍നെസ്സ് ക്രീം പരസ്യത്തില്‍ അഭിനയിക്കാന്‍ പ്രമുഖ ബ്രാന്‍ഡ് ഓഫര്‍ ചെയ്തത്. എന്നാല്‍ ഈ പണം തനിക്ക് ആവശ്യമില്ലെന്ന് താരം വ്യക്തമാക്കുകയായിരുന്നു. അത്തരം ഒരു പരസ്യത്തില്‍ നിന്ന് ലഭിക്കുന്ന പണം കൊണ്ട് താന്‍ എന്താണ് ചെയ്യേണ്ടതെന്നായിരുന്നു സായ് പല്ലവിയുടെ ചോദ്യം. വീട്ടില്‍ ചെന്നാല്‍ മൂന്ന് ചപ്പാത്തിയോ ചോറോ ആണ് താന്‍ കഴിക്കാറുള്ളത്. മറ്റ് വലിയ ആവശ്യങ്ങളൊന്നും തനിക്കില്ല. മുഖക്കുരുവുള്ള തന്റെ മുഖമാണ് ആളുകള്‍ സ്വീകരിച്ചതെന്നും കുറച്ചുകൂടി നിറം വര്‍ധിപ്പിക്കാനായി തന്റെ സഹോദരി ഇഷ്ടമില്ലാത്ത ഭക്ഷണം വരെ കഴിക്കാറുണ്ടെന്നും ഇന്ത്യക്കാരുടെ നിറം ഇതാണെന്നും അതില്‍ മോശം തോന്നേണ്ട കാര്യമില്ലെന്നും സായ് പല്ലവി നിലപാട് വ്യക്തമാക്കിരുന്നു.
ഫെയര്‍നെസ്സ് ക്രീമുകളുടെ പരസ്യത്തില്‍ അഭിനയിക്കില്ലെന്ന് ഉറപ്പിച്ച് പറഞ്ഞ മറ്റൊരു നടിയാണ് ബോളിവുഡ് താരം അനുഷ്‌ക ശര്‍മ. വംശീയതയും ലൈംഗികതയും പ്രചരിപ്പിക്കുന്ന ഉല്‍പ്പന്നങ്ങളെ താന്‍ പ്രോത്സാഹിപ്പിക്കില്ലെന്നാണ് താരം തുറന്നുപറഞ്ഞത്. അഭിനയിച്ച് തുടങ്ങുന്ന ആദ്യ കാലങ്ങളില്‍ അനുഷ്്ക ഫെയര്‍നെസ് ക്രീമുകളുടെ പരസ്യങ്ങളില്‍ ഭാഗമായിരുന്നു. എന്നാല്‍ പിന്നീട് ഇവയില്‍ നിന്നെല്ലാം പിന്മാറുകയായിരുന്നു. അതുപോലെ തന്നെ പുരുഷന്മാരുടെ ഫെയര്‍നെസ് ക്രീമിന്റെ പരസ്യത്തില്‍ അഭിനയിക്കാന്‍ ലഭിച്ച കോടികളുടെ ഓഫര്‍ വേണ്ടെന്നു വെച്ച താരമാണ് സുശാന്ത് സിംഗ് രജ്പുത്. 15 കോടിയാണ് സുശാന്തിന് പ്രമുഖ ബ്രാന്‍ഡ് ഓഫര്‍ ചെയ്തത്. ഫെയര്‍നെസ് ക്രീം പരസ്യത്തില്‍ നിന്ന് പിന്മാറിയ മറ്റൊരു ബോളിവുഡ് താരമാണ് റണ്‍ബീര്‍ കപൂര്‍. 9 കോടിയാണ് പ്രമുഖ ബ്രാന്‍ഡ് റണ്‍ബീറിന് വാഗ്ദാനം ചെയ്തത്. എന്നാല്‍ താരം പരസ്യം വേണ്ടെന്നു വെക്കുകയായിരുന്നു. സമാനമായി ബോളിവുഡ് നടി സ്വര ഭാസ്‌കറും തനിക്ക് ലഭിച്ച കോടികളുടെ പരസ്യ ഓഫര്‍ വേണ്ടെന്നു വെച്ചിരുന്നു. ഫെയര്‍നെസ് ക്രീമിന്റെ പരസ്യത്തിനുവേണ്ടി ലഭിച്ച 2 കോടിരൂപയുടെ പരസ്യ വാഗ്ദാനം നിരസിച്ചുകൊണ്ട് കറുപ്പിനെന്താണ് കുഴപ്പം എന്നാണ് കങ്കണ റണോട്ട് ചോദിച്ചത്.
പെപ്‌സിയുടെ പരസ്യത്തില്‍ നിന്ന് പിന്മാറാന്‍ ബോളിവുഡ് ബിഗ് ബി അമിതാഭ് ബച്ചനെ പ്രേരിപ്പിച്ചത് ഒരു കൊച്ചു പെണ്‍കുട്ടിയാണ്. ടീച്ചര്‍ വിഷമാണെന്ന് പറഞ്ഞ പാനീയം കുടിക്കാന്‍ എന്തിനാണ് അമിതാഭ് ബച്ചന്‍ പ്രേരിപ്പിക്കുന്നത് എന്നായിരുന്നു പെണ്‍കുട്ടിയുടെ ചോദ്യം. ഇതിനു ശേഷം മദ്യത്തിന്റേയും ടൊബാക്കോ ഉത്പന്നങ്ങളുടേയും പരസ്യത്തിലും അമിതാഭ് ബച്ചന്‍ അഭിനയിക്കാറില്ല. അതുപോലെ തന്നെ ടൊബാക്കോ ഉത്പന്നത്തിന്റെ പരസ്യത്തില്‍ അഭിനയിക്കാനുള്ള ഓഫര്‍ വേണ്ടെന്നു വെച്ച താരമാണ് സണ്ണി ലിയോണ്‍. ഭാവിയിലും ഇത്തരം പരസ്യങ്ങളില്‍ താന്‍ ഭാഗമാകില്ലെന്നാണ് സണ്ണിയുടെ നിലപാട്. മദ്യത്തിന്റെ പരസ്യത്തില്‍ നിന്നും പിന്മാറിയ മറ്റൊരു ബോളിവുഡ് നടന്‍ ഇമ്രാന്‍ ഹാഷ്മിയാണ്. 4 കോടി പ്രതിഫലം ലഭിക്കുന്ന പരസ്യത്തില്‍ നിന്നാണ് അദ്ദേഹം പിന്മാറിയത്. അഭിഷേക് ബച്ചനും ഇത്‌പോലെ തന്നെ ഒരു പരസ്യം വേണ്ടെന്ന് വെച്ചിരുന്നു.
ശരീരം മെലിയുന്നതിനുള്ള ആയുര്‍വേദ മരുന്നിന്റെ പരസ്യത്തില്‍ മോഡലാവാനുള്ള അവസരം ശില്‍പ ഷെട്ടി നിഷേധിച്ചിരുന്നു. 10 കോടി രൂപയാണ് പ്രതിഫലമായി നിശ്ചയിച്ചിരുന്നത്. താന്‍ വിശ്വസിക്കാത്തതും ഉപയോഗിക്കാത്തതുമായ ഒരു വസ്തു വില്‍ക്കില്ല എന്നാണ് ശില്‍പ ഷെട്ടി പറഞ്ഞത്. ശരിയായ ആഹാരക്രമത്തിനും ചിട്ടയോടെയുള്ള ജീവിതചര്യയ്ക്കും പകരംവയ്ക്കാന്‍ മറ്റൊന്നിനുമാവില്ലെന്നും ജീവിത രീതി ചെറുതായി ഒന്ന് പരിഷ്‌കരികരിച്ചാല്‍ ദീര്‍ഘനാളത്തേയ്ക്കുള്ള ഫലമുണ്ടാകുമെന്നും ശില്‍പ ഷെട്ടി പറഞ്ഞിരുന്നു. ചെന്നൈയിലെ ഒരു പ്രമുഖ വസ്ത്ര വ്യാപാരിയുടെ പരസ്യ ചിത്രത്തിന് പത്ത് കോടി രൂപ പ്രതിഫലം വാഗ്ദാനം ചെയ്‌തെങ്കിലും ആ പരസ്യം തെന്നിന്ത്യന്‍ താരം നയന്‍താര വേണ്ടെന്ന് വെച്ചിരുന്നു.
