ഹൈദരാബാദ്: നടി സൗന്ദര്യയുടെ മരണവുമായി ബന്ധപ്പെട്ട് രണ്ട് പതിറ്റാണ്ടുകള്ക്കിപ്പുറം തെലുങ്ക് നടന് മോഹന് ബാബുവിനെതിരെ ഗുരുതര ആരോപണം. നടിയുടേത് അപകടമരണമല്ലെന്നും മറിച്ച് മോഹന് ബാബുവുമായി ബന്ധപ്പെട്ട സ്വത്ത് തര്ക്കത്തെ തുടര്ന്നുണ്ടായ ആസൂത്രിത കൊലപാതകമാണെന്നും ആരോപിച്ച് ആന്ധ്രാപ്രദേശിലെ ഖമ്മം ജില്ലയിലെ ചിട്ടിമല്ലു എന്ന വ്യക്തി പരാതി നല്കി. ഖമ്മം എസിപിക്കും ജില്ലാ അധികാരിക്കുമാണ് പരാതി നല്കിയിരിക്കുന്നത്.
ഷംഷാബാദിലെ ജാല്പള്ളി എന്ന ഗ്രാമത്തില് സൗന്ദര്യയ്ക്കും സഹോദരനും ആറ് ഏക്കര് ഭൂമിയുണ്ടായിരുന്നു. ഈ ഭൂമി തനിക്ക് വില്ക്കാന് സൗന്ദര്യയ്ക്കും സഹോദരനും മേല് മോഹന്ബാബു സമ്മര്ദ്ദം ചെലുത്തിയതായി പരാതിക്കാരനായ ചിട്ടിമല്ലു ആരോപിച്ചു. എന്നാല് ഇതിന് വിസമ്മതിച്ചതാണ് പ്രശ്ങ്ങള്ക്ക് കാരണം. സൗന്ദര്യയുടെ മരണശേഷം, മോഹന് ബാബു ഭൂമി കൈവശപ്പെടുത്തിയെന്ന് ചിട്ടിമല്ലു ആരോപിച്ചു സൗന്ദര്യ മരിച്ച് 21 വര്ഷമാവുമ്പോഴാണ് പുതിയ ആരോപണങ്ങള് ഉയര്ന്നിരിക്കുന്നത്.
മാഹന് ബാബുവുമായി സൗന്ദര്യക്കുണ്ടായിരുന്ന വസ്തു തര്ക്കമാണ് നടിയുടെ മരണത്തിലേക്ക് നയിച്ചതെന്ന് ഇയാളുടെ പരാതിയില് പറയുന്നതായി ദേശീയ മാധ്യമങ്ങള് റിപ്പോര്ട്ട് ചെയ്തു. ഷംഷാബാദിലെ ജാല്പള്ളി എന്ന ഗ്രാമത്തില് സൗന്ദര്യക്കും സഹോദരനും ആറ് ഏക്കര് ഭൂമിയുണ്ടായിരുന്നു. ഇത് മോഹന് ബാബുവിന് വില്ക്കാന് ഇരുവരും വിസമ്മതിച്ചതാണ് പ്രശ്നത്തിന് കാരണം. സൗന്ദര്യയുടെ മരണശേഷം മോഹന്ബാബു ഈ ഭൂമി ബലമായി എഴുതിവാങ്ങിയെന്നും ചിട്ടിമല്ലു ആരോപിക്കുന്നു. ഈ വിഷയത്തില് ഇതുവരെ എഫ്ഐആര് രജിസ്റ്റര് ചെയ്തിട്ടില്ല. ഭൂമി കൈയേറ്റത്തില് മോഹന് ബാബുവിന്റെ പങ്ക് അന്വേഷിക്കണമെന്നാണ് പരാതിക്കാരന് സംസ്ഥാന സര്ക്കാരിനോട് ആവശ്യപ്പെട്ടിരിക്കുന്നത്.
മോഹന് ബാബുവില്നിന്ന് ഭൂമി തിരിച്ചുവാങ്ങി പൊതുജന ക്ഷേമാവശ്യങ്ങള്ക്ക് ഉപയോഗിക്കണമെന്നാണ് ചിട്ടിമല്ലു ആവശ്യപ്പെടുന്നത്. ഭൂമി പിടിച്ചെടുത്തതുമായി ബന്ധപ്പെട്ട് നടനെതിരെ വിശദമായ അന്വേഷണം വേണമെന്നും ചിട്ടിമല്ലു പരാതിയില് പറയുന്നു. മോഹന് ബാബുവിന്റെ കുടുംബത്തില് ഇപ്പോള് നടക്കുന്ന പ്രശ്നങ്ങളെക്കുറിച്ചും പരാതിയില് പ്രതിപാദിക്കുന്നുണ്ട്. മോഹന് ബാബുവും ഇളയമകന് മഞ്ചു മനോജും തമ്മില് ഏറെക്കാലമായി നിലനില്ക്കുന്ന നിയമപ്രശ്നങ്ങളാണിതില് ചൂണ്ടിക്കാട്ടിയിട്ടുള്ളത്. മഞ്ചു മനോജിന് നീതി ലഭിക്കണമെന്നും ജാല്പള്ളിയിലെ ആറേക്കര് ഗസ്റ്റ്ഹൗസ് പിടിച്ചെടുക്കണമെന്നും പരാതിക്കാരന് ആവശ്യപ്പെട്ടു.
ഈ നിയമപോരാട്ടം മൂലം തനിക്ക് ഭീഷണി നേരിടുന്നുണ്ടെന്നാണ് പരാതിക്കാരന് അവകാശപ്പെടുന്നത്. തനിക്ക് പോലീസ് സംരക്ഷണം വേണമെന്നും ഇയാള് ആവശ്യപ്പെട്ടിട്ടുണ്ട്. അതേസമയം, ഈ ആരോപണങ്ങളെക്കുറിച്ച് മോഹന് ബാബുവോ അദ്ദേഹത്തിന്റെ പ്രതിനിധികളോ ഔദ്യോഗികമായി പ്രതികരിച്ചിട്ടില്ല.
2004 ഏപ്രില് 17-നാണ് സൗന്ദര്യ ബിജെപിയുടെ തിരഞ്ഞെടുപ്പ് പ്രചാരണത്തിനായി ഹൈദരാബാദിലേക്ക് പോകവേ വിമാനം തകര്ന്ന് മരിച്ചത്. ബെംഗളൂരുവിനടുത്ത് ജക്കൂരിലായിരുന്നു അപകടം. നടി സഞ്ചരിച്ച അഗ്നി ഏവിയേഷന്റെ ചെറുവിമാനം പറന്നുയര്ന്ന് മിനിറ്റുകള്ക്കുള്ളില് ജക്കൂരിലെ കാര്ഷിക സര്വകലാശാലയുടെ കൃഷി വികാസ് കേന്ദ്രം ക്യാമ്പസിനുള്ളില് തകര്ന്നുവീഴുകയായിരുന്നു.
സംഭവത്തില് സൗന്ദര്യയുള്പ്പെടെ നാലുപേരാണ് മരിച്ചത്. മലയാളിയായ പൈലറ്റ് ജോയ് ഫിലിപ്പ്, നടിയുടെ സഹോദരന് അമര്നാഥ് ഷെട്ടി, പ്രാദേശിക ബിജെപി നേതാവ് രമേഷ്കാദം എന്നിവരാണ് മരിച്ച മറ്റുള്ളവര്. വിമാനത്തിലുണ്ടായിരുന്ന നാലുപേരുടേയും മൃതദേഹങ്ങള് കത്തിക്കരിഞ്ഞ നിലയിലാണ് കണ്ടെടുത്തത്.