കൊച്ചി: നടിയെ ബലാത്സംഗം ചെയ്ത കേസില് നടനും നിര്മ്മാതാവുമായ വിജയ് ബാബുവിനെതിരെ നടി ദുര്ഗ കൃഷ്ണ. ഇരയുടെ പേര് വെളിപ്പെടുത്തിയത് മോശമാണെന്നും അത് ചെയ്യാന് പാടില്ലായിരുന്നുവെന്നും ദുര്ഗാ കൃഷ്ണ പറഞ്ഞു. പീഡന കേസ് സംബന്ധിച്ച് കോടതി വിധി വരും വരെ ഒരാളെ ന്യായീകരിച്ചോ തള്ളിപറഞ്ഞോ ഒരഭിപ്രായം പറയുന്നില്ലെന്നും ദുര്ഗ കൃഷ്ണ പറഞ്ഞു. ഉടല് സിനിമയുടെ വാര്ത്താസമ്മേളനത്തിലായിരുന്നു നടിയുടെ പ്രതികരണം.
ദുര്ഗയുടെ വാക്കുകള്
വിജയ് ബാബു കേസില് ആരുടെ ഭാഗത്താണ് തെറ്റെന്ന് എനിക്കറിയില്ല. തെറ്റുകാരനാണ് എന്ന് എവിടെയും പ്രൂവ് ചെയ്തിട്ടില്ല. അതല്ലാതെ ഒരാളെ കുറ്റം പറഞ്ഞിട്ട്, പിന്നീട് അയാള് തെറ്റ് ചെയ്തിട്ടില്ലെന്ന് അറിയുമ്പോള് നമ്മളിരുന്ന് വിഷമിക്കേണ്ടി വരും. എനിക്ക് കൃത്യമായി ധാരണയുള്ള വിഷയങ്ങളില് ഞാന് അത് തുറന്നുപറയാറുമുണ്ട്. വിജയ് ബാബു ഇരയുടെ പേര് വെളിപ്പെടുത്തിയത് മോശമാണ്. അങ്ങനെ ചെയ്യാന് പാടില്ലായിരുന്നു.
പുതുമുഖ നടിക്കെതിരായ ലൈംഗികാതിക്രമ കേസിലെ പ്രതി വിജയ് ബാബു ജോര്ജിയയില് ഉണ്ടെന്ന നിഗമനത്തില് അന്വേഷണ സംഘം. കൂടുതല് വിവരശേഖരണത്തിനായി അയല് രാജ്യമായ അര്മേനിയയിലെ ഇന്ത്യന് എംബസിയുടെ സഹായം തേടിയിട്ടുണ്ട്. ജോര്ജിയയില് ഇന്ത്യക്ക് എംബസി ഇല്ലാത്ത സാഹചര്യത്തിലാണ് അര്മേനിയയിലെ എംബസിയുമായി വിദേശകാര്യ വകുപ്പ് വഴി കൊച്ചി സിറ്റി പൊലീസ് ബന്ധപ്പെട്ടത്. കുറ്റവാളികളെ കൈമാറാന് ഇന്ത്യയുമായി കരാറില്ലാത്ത രാജ്യമാണ് ജോര്ജിയ.
വിജയ് ബാബുവിന്റെ പാസ്പോര്ട്ട് റദ്ദാക്കിയതോടെ ഇഷ്യൂ ചെയ്ത വിസകളെല്ലാം ഉടന് റദ്ദാവും. കൊച്ചി സിറ്റി പൊലീസ് നല്കിയ റിപ്പോര്ട്ടിന്റെ അടിസ്ഥാനത്തിലായിരുന്നു വിജയ് ബാബുവിന്റെ പാസ്പോര്ട്ട് റദ്ദാക്കിയത്. എന്നാല് വിജയ് ബാബുവിനെതിരെ പുറപ്പെടുവിച്ച ബ്ലൂ കോര്ണര് നോട്ടീസിന് യുഎഇ അധികൃതരില് നിന്ന് മറുപടി ലഭിക്കാനുണ്ട്.
പാസ്പോര്ട്ട് റദ്ദാക്കിയ ശേഷം ഇന്റര്പോളിന്റെ സഹായത്തോടെ വിജയ് ബാബുവിനെ അറസ്റ്റ് ചെയ്ത് നാട്ടിലെത്തിക്കാനായിരുന്നു പൊലീസ് നീക്കം. അതിനിടെയാണ് താരം ജോര്ജിയയിലേക്ക് കടന്നത്. ഈ സാഹചര്യത്തില് താരത്തിന് കീഴടങ്ങേണ്ടി വരുമെന്നാണ് പോലീസ് പ്രതീക്ഷിക്കുന്നത്. മെയ് 24 നുള്ളില് കീഴടങ്ങിയില്ലെങ്കില് നിര്മ്മാതാവ് കൂടിയായ വിജയ് ബാബുവിന്റെ നാട്ടിലുള്ള സ്വത്ത്വകകള് കണ്ടുകെട്ടാന് പൊലീസ് നിയമോപദേശം തേടിയിട്ടുണ്ട്.
സാമ്പത്തിക കുറ്റാന്വേഷണ വിഭാഗങ്ങള്ക്ക് രഹസ്യവിവരങ്ങള് ലഭിച്ചതിനെ തുടര്ന്ന് സാമ്പത്തിക ഇടപാടുകളിലും അന്വേഷണം നടത്തുന്നുണ്ട്. ക്രൈം ബ്രാഞ്ചിന്റെ കീഴിലുള്ള സാമ്പത്തിക കുറ്റങ്ങള് അന്വേഷിക്കുന്ന സംഘത്തിനാണ് ചുമതലയെന്നാണ് വിവരം. വിജയ് ബാബുവിനെ ബിനാമിയാക്കി കണക്കില് പെടാത്ത പണം സിനിമാ മേഖലയില് നിക്ഷേപിക്കപ്പെട്ടെന്ന് അന്വേഷണ സംഘത്തിന് വിവരം ലഭിച്ചിട്ടുണ്ട്. കഴിഞ്ഞ മാസം 22 നായിരുന്നു നടിയുടെ പരാതിയില് വിജയ് ബാബുവിനെതിരെ പൊലീസ് കേസെടുത്തിരിക്കുന്നത്.
യുവനടിയെ പീഡിപ്പിച്ച കേസില് വിദേശത്ത് ഒളിവില് കഴിയുന്ന വിജയ് ബാബുവിന് തിരിച്ചടി . പ്രമുഖ ഒ ടി ടി കമ്പനി വിജയ് ബാബുവിന്റെ കമ്പനിയുമായുള്ള കോടിക്കണക്കിന് രൂപയുടെ കരാര് റദ്ദാക്കിയിരിക്കുകയാണ് . ഒരു വെബ്സീരസുമായി ബന്ധപ്പെട്ട 50 കോടിയുടെ കരാറാണ് ഇപ്പോള് റദ്ദാക്കിയതെന്നാണ് വിവരം . പീഡനക്കേസില് വിദേശത്ത് ഒളിവില് കഴിയുന്ന വിജയ് ബാബുവിനെതിരെ നടപടി ശക്തമാക്കിയതിന് പിന്നാലെയാണ് ഒ ടി ടി കമ്പനിയുടെ പിന്മാറ്റം
പ്രമുഖ കമ്പനി വെബ്സീരിസുമായുള്ള കരാര് റദ്ദാക്കിയതോടെ ഈ കരാര് താരസംഘടനയായ അമ്മ ഏറ്റെടുത്തേക്കുമെന്നാണ് വിവരം. മറ്റ് ഒ ടി ടി കമ്പനികളും വിജയ് ബാബുവിനെതിരായ കേസിന്റെ വിശദാംശങ്ങള് കൊച്ചി സിറ്റി പൊലീസിനോട് അന്വേഷിച്ചിട്ടുണ്ട്.