കൊച്ചി: തൃപ്പൂണിത്തുറ ഹിൽപാലസ് പോലീസ് സ്റ്റേഷനിൽ വെച്ച് തനിക്കെതിരെ ഉണ്ടായ അധിക്ഷേപങ്ങളെക്കുറിച്ചുള്ള പരാതിയിൽ നടി അൻസിബ ഹസൻ തൃക്കാക്കര എസിപി ഓഫീസിലെത്തി നേരിട്ട് മൊഴി നൽകി. തൃപ്പൂണിത്തുറ വനിതാ സെൽ എസ്ഐ രേഷ്മ, നടി ലക്ഷ്മിപ്രിയ എന്നിവരിൽ നിന്നും സ്റ്റേഷനിൽ വെച്ച് നേരിട്ട മോശം അനുഭവങ്ങളെക്കുറിച്ച് അൻസിബ മുൻപ് മുഖ്യമന്ത്രിക്ക് പരാതി നൽകിയിരുന്നു. ഇതിന്റെ തുടർച്ചയായാണ് ഞായറാഴ്ച ഉച്ചയ്ക്ക് പന്ത്രണ്ടരയോടെ എസിപി മനോജ് കുമാറിന് മുന്നിൽ താരം ഹാജരായി വിശദമായ മൊഴി രേഖപ്പെടുത്തിയത്.
അൻസിബയുടെ മൊഴിയുടെ അടിസ്ഥാനത്തിൽ നടി ലക്ഷ്മിപ്രിയയോടും വനിതാ സെൽ എസ്ഐ രേഷ്മയോടും തിങ്കളാഴ്ച രാവിലെ 11 മണിക്ക് തൃക്കാക്കര എസിപി ഓഫീസിൽ മൊഴി നൽകാനായി ഹാജരാകാൻ പോലീസ് ഔദ്യോഗികമായി ആവശ്യപ്പെട്ടിട്ടുണ്ട്. ആരോപണവിധേയരായ രണ്ടുപേരുടെയും മൊഴിയെടുത്ത ശേഷം യഥാർത്ഥത്തിൽ എന്താണ് സംഭവിച്ചതെന്ന് മനസ്സിലാക്കി തുടർനടപടി സ്വീകരിക്കുമെന്ന് എസിപി വ്യക്തമാക്കി.
മൊഴി നൽകിയ ശേഷം പുറത്തിറങ്ങിയ അൻസിബ മാധ്യമങ്ങളെ കാണുകയും തനിക്ക് പറയാനുള്ള എല്ലാ കാര്യങ്ങളും കൃത്യമായി എസിപിയെ ധരിപ്പിച്ചിട്ടുണ്ടെന്ന് വ്യക്തമാക്കുകയും ചെയ്തു. ഇതോടൊപ്പം നടൻ ടിനി ടോമിനെതിരെ കടുത്ത വിമർശനങ്ങൾ ഉന്നയിച്ച അൻസിബ, അദ്ദേഹത്തിനെതിരെ നിയമനടപടികളിലേക്ക് കടക്കുന്ന കാര്യം തന്റെ അഭിഭാഷകനുമായി ആലോചിച്ച ശേഷം മാത്രമേ തീരുമാനിക്കുകയുള്ളൂവെന്നും അറിയിച്ചു. മുഖ്യമന്ത്രിയുടെ ഓഫീസ് ഈ പരാതി സംസ്ഥാന പോലീസ് മേധാവിക്ക് കൈമാറുകയും, അദ്ദേഹം കൊച്ചി സിറ്റി പോലീസ് കമ്മീഷണർ വഴി തൃക്കാക്കര എസിപിയോട് അന്വേഷിച്ച് അടിയന്തര റിപ്പോർട്ട് നൽകാൻ ആവശ്യപ്പെടുകയുമായിരുന്നു.
അതിനിടെ, താരസംഘടനയായ ‘അമ്മ’യിലെ ആഭ്യന്തര പ്രശ്നങ്ങളിലും അൻസിബ നേരിട്ട അനുഭവങ്ങളിലും പൂർണ്ണ പിന്തുണയുമായി നടൻ ആസിഫ് അലി രംഗത്തെത്തി. അൻസിബ ഇപ്പോൾ പരസ്യമായി പ്രതികരിച്ചത് മറ്റ് വഴികളില്ലാത്ത നിവൃത്തികേട് കൊണ്ടായിരിക്കാമെന്ന് ആസിഫ് അലി പറഞ്ഞു. “ജാതി-മത പരമായ പ്രശ്നങ്ങളിലെ പ്രതികരണങ്ങളിൽ എല്ലാവർക്കും സാമാന്യ ബുദ്ധി വേണം. സംഘടനയ്ക്കുള്ളിലെ പ്രശ്നങ്ങൾ അവിടെത്തന്നെ പരിഹരിക്കാൻ ശ്രമിക്കണം. എന്നാൽ അത് അവിടെ തീരാതെ വരുമ്പോഴായിരിക്കണം പൊതുസമൂഹത്തിന് മുന്നിൽ പറയേണ്ടി വരുന്നത്. അൻസിബയെപ്പോലുള്ളവർ അത്രത്തോളം നിവൃത്തികേട് വന്നതുകൊണ്ടാകാം കാര്യങ്ങൾ പുറത്തുപറഞ്ഞത്,” ആസിഫ് അലി കൂട്ടിച്ചേർത്തു.
അൻസിബ ഉന്നയിച്ച വിഷയങ്ങളെ തുടർന്ന് താരസംഘടനയായ ‘അമ്മ’യിലെ ആഭ്യന്തര തർക്കങ്ങൾ ഇപ്പോൾ പോലീസ് നടപടികളിലേക്ക് വരെ നീങ്ങിയിരിക്കുകയാണ്. ഈ വിവാദങ്ങൾക്കിടയിൽ തിങ്കളാഴ്ച മുതൽ ‘അമ്മ’യുടെ നിർണ്ണായകമായ എക്സിക്യൂട്ടീവ് കമ്മിറ്റി യോഗം ചേരുന്നുണ്ട്. ഈ യോഗത്തിൽ നടി അൻസിബ ഹസൻ ഉൾപ്പെടെ നാല് പേർക്ക് സംഘടന കാരണം കാണിക്കൽ (ഷോ കോസ്) നോട്ടീസ് നൽകിയിട്ടുണ്ട്. വരും ദിവസങ്ങളിൽ ഇവർ ഈ നോട്ടീസിന്മേൽ സംഘടനയ്ക്ക് വിശദീകരണം നൽകേണ്ടി വരും. വരും ദിവസങ്ങളിലും മലയാള സിനിമ ലോകത്ത് ഈ വിവാദം പുകയുമെന്നാണ് സൂചനകൾ.
English Summary
Actress Ansiba Hassan gave her statement to Thrikkakara ACP Manoj Kumar following her complaint to the Chief Minister regarding alleged mental harassment at the Thripunithura Hill Palace Police Station. Ansiba accused actress Lakshmipriya and Women’s Cell SI Reshma of misbehavior. Following her statement, the police have directed both Lakshmipriya and SI Reshma to appear before the Thrikkakara ACP office on Monday for interrogation. Meanwhile, actor Asif Ali extended his solidarity to Ansiba, stating she might have spoken out due to sheer helplessness within the actors’ association ‘AMMA’. Concurrently, ‘AMMA’ has issued a show-cause notice to Ansiba and three others, ahead of its executive committee meeting starting Monday. Ansiba also slammed actor Tini Tom and stated she is consulting her lawyer for legal actions against him.